جيىرما جىل بويى تۇسىرۋگە رۇقسات ەتىلمەگەن فيلم
گيلليامنىڭ بۇل جوباسىنىڭ تۇسىرىلمەۋىنە قارجىلاي جانە زاڭعا بايلانىستى ماسەلەلەر سەبەپ بولعان. «مەن ءتۇسىرىلىمدى باستاۋعا بىرنەشە رەت تالپىنعانمىن، ءبىراق بولمادى، ەندى فيلمنىڭ ءتۇسىرىلىمى ءبىتىپ، ونى ءوز كوزىممەن كورمەيىنشە ەشتەڭە ايتا المايمىن» ، - دەدى رەجيسسەر. ءتۇسىرىلىمى سونشالىق جىر بولعان فيلم تۋرالى 2002 - جىلى «لا- مانچتا جوعالعاندار» اتتى دەرەكتى فيلم تۇسىرىلگەن. جوبامەن جۇمىس جاسالعان 20 جىل ىشىندە تۇسىرىمگە دجونني دەپپ، يۋەن ماكگرەگور، جان روشفور، روبەرت ديۋۆال، ادام درايۆەر، دجوناتان پرايس، ستەللان سكارسگارد جانە روسسي دە پالما سىندى اكتەرلەر مەن اكتريسالار قاتىسقان.
ەستەرىڭىزگە سالا كەتەيىك، الەم ادەبيەتىنىڭ جاقۇتى «دون كيحوت» رومانىنىڭ اۆتورى سەرۆانتەس 1547 -جىلى الكالا- دە- انارەس ەلدى مەكەنىندە قاراپايىم كەدەي وتباسىندا دۇنيەگە كەلگەن. كەيىن ۆاليادوليدا قالاسىنداعى يەزۋيتتەر كوللەگياسىندا ءبىلىم الادى. ەۋروپا فلوتىنىڭ تۇرىكتەرمەن سوعىسى كەزىندە يسپان اسكەرى قاتارىندا قىزمەت ەتىپ، ۇرىس بارىسىندا سول قولىنان ايىرىلادى. 1575 -جىلى وتانىنا قايتىپ كەلە جاتقان جولدا تەڭىز قاراقشىلارىنىڭ قولىنا ءتۇسىپ، الجيرگە قۇلدىققا ساتىلىپ كەتەدى. تۇتقىننان 1580 -جىلى ميسسيونەرلەر بوساتىپ الدى. اسكەري قىزمەتتەن ورالعان سوڭ، كەش بولسا دا ادەبي شىعارمالار جازۋمەن اينالىسا باستايدى. الايدا بۇل مانساپ ەشقانداي قارجىلىق پايدا اكەلمەگەندىكتەن، جان باعۋ ماقساتىندا 1587 -جىلى سيەۆيلياعا كوشەدى. ول جەردەگى پورتتا ساۋدا ىسىمەن اينالىسىپ، بىرنەشە رەت تۇرمەگە جابىلدى. سەرۆانتەس تۇڭعىش شىعارمالارىندا جاستىق شاق پەن ماحاببات تاقىرىپتارىن قوزعاي باستادى. 1585 -جىلى جارىق كورگەن «گالاتەيا» پاستورالدىق رومانىندا ەكى باقتاشىنىڭ سۇلۋ گالاتەياعا عاشىق بولۋى بەينەلەدى. ونىڭ وتىزعا جۋىق درامالىق شىعارماسى مادريد تەاترلارىندا ساحنالانعان بولاتىن. «الجير كاتورگاسى» اتالاتىن پەساسى سۇيىسپەنشىلىك تۋرالى ءسوز ەتسە، «الجير ادەت- عۇرپى» شىعارماسى الجيرلىك جۇبايلاردىڭ تاعدىرىن بەينەلەيدى. «نۋمانسيا» تراگەدياسىندا سەرۆانتەس ريم اسكەرى شابۋىلىنا قارسى توتەپ بەرگەن ەجەلگى قالا تۇرعىندارىنىڭ ەرلىگىن ناسيحاتتاعان. ال، «ناقىل نوۆەللالارى» پوۆەسىندە ەرلىك پەن ماحاببات، ۋاقىت، مىنەز ماسەلەلەرى جايلى تولعانىستار، ادامگەرشىلىك، قايىرىمدىلىق تاقىرىپتارى قامتىلعان. ونىڭ «پارناسقا ساياحات» پوەماسى، «سەگىز كومەديا مەن ينتەرمەديا» ت. ب. كوپتەگەن تۋىندىلارى بار. ءبىراق، ونىڭ سەرۆانتەس ەسىمىن دۇنيە جۇزىنە تانىتقان شىعارماسى - «دون كيحوت» رومانى. العاش رەت جازۋشى بۇل تۋىندىعا تۇرمەدە وتىرعان كەزىندە كىرىسكەن. شيەلەنىسكەن وقيعالارعا تولى جاقۇت تۋىندىدا 700 گە جۋىق كەيىپكەر بەينەلەنگەن. قايتا ورلەۋ ءداۋىرى ۇزدىك تۋىندىلارىنىڭ ءبىرى سانالاتىن شىعارما الەم ادەبيەتىنە زور ىقپال ەتتى. روماندا ادامگەرشىلىك قاسيەتى مول، ءبىراق ومىردەن مۇلدە الشاق تۇرعان قيالشىل يدەاليست، سەرى دون كيحوتقا قاراپايىم دا ىسكەر، ومىرگە بەيىم اتقوسشى سانچو پانسا بەينەسى قارسى قويىلعان. دون كيحوت بەينەسى كەيىن قيالشىلدىقتى، شىنايى ومىردەن الىستاعان ادامدارعا بايلانىستى قولدانىلاتىن جالپى ەسىمگە اينالدى. كەرەمەت تالانت يەسىنىڭ ءومىرىن زەرتتەگەن بيوگرافتارىنىڭ ءبىرى ءشالدىڭ وعان بەرگەن مىنەزدەمەسىنە ءمان بەرسەك دون كيحوت پەن اۆتور مىنەزى جانە كوزقاراسىنا قاتىستى پاراللەلدىك بايقالادى. ۇلى جازۋشىنىڭ شىعارماشىلىعىمەن تەرەڭىرەك تانىسقىڭىز كەلسە ءا. باجەنوۆتىڭ اۋدارماسىنداعى سەرۆانتەس شىعارمالارىنىڭ 4 تومدىعىن وقىڭىز. كلاسسيكالىق الەم ادەبيەتىنىڭ تەڭدەسىز تۋىندىسىن ءبىلۋ - ادەبيەتسۇيەر قاۋىمنىڭ پارىزى.
Massaget.kz
