اق ازيادانىڭ الاۋى تۇتاندى - فوتو

ساپپورو. قازاقپارات - بۇگىن جاپونيانىڭ ساپپورو قالاسىندا Ⅷقىسقى ازيا ويىندارىنىڭ رەسمي تۇردە سالتاناتتى اشىلۋ ءراسىمى ءوتتى، دەپ حابارلايدى ساپپوروداعى قازاقپارات ءتىلشىسى.

 رەسمي تۇردە اشىلعان اق ازيادا ويىندارىنىڭ شەرۋىندە قازاقستان تۋىن شاڭعى جارىسىنان بەس دۇركىن قازاقستان چەمپيونى ەردوس احماديەۆ ۇستاپ شىقتى.

 وسى ورايدا ايتا كەتەيىك، ازيادا ويىندارىنىڭ تاريحى 1952 -جىلدان باستالادى. ال 1986 -جىلى العاش رەت قىسقى ازيادا ويىندارى ۇيىمداستىرىلدى. اۋقىمدى جارىس ءتورت جىلدا ءبىر رەت وتكىزىلىپ تۇرادى. ازيادا ويىندارى ازيانىڭ وليمپيادالىق كەڭەسىنىڭ باسشىلىعىمەن جۇزەگە اسىرىلادى. قىسقى ازيادا ويىندارىنىڭ تاريحىنا ۇڭىلەتىن بولساق، العاشقى جارىس وسى ساپپورو (جاپونيا) قالاسىندا 1986 -جىلى 1-8 - ناۋرىز ارالىعىندا وتكەن ەدى.

مۇندا سپورتتىڭ 8 ءتۇرى بويىنشا جۇلدەلەر ساراپقا سالىنعان. اتالمىش جارىسقا 7 ەلدىڭ سپورتشىلارى قاتىسىپ، تەك 4 ەلدىڭ سپورتشىلارى عانا جۇلدەلى ورىندارعا يە بولعان. ەكىنشى قىسقى ازيادا ويىندارى 1990 -جىلدىڭ 9-14 - ناۋرىز ارالىعىندا تاعى دا ساپپورو قالاسىندا ءوتتى. مۇندا سپورتشىلار سپورتتىڭ 6 ءتۇرى بويىنشا باق سىناستى. 10 ەلدىڭ سپورتشىلارى قاتىسقان ەكىنشى قىسقى ازيادا ويىندارىنان 5 ەلدىڭ سپورتشىلارى عانا ەلدەرىنە جۇلدەمەن ورالعان.

 قازاقستان رەسپۋبليكاسى 1996 -جىلى 4-11 - اقپاندا حاربين (قىتاي) قالاسىندا وتكەن ءۇشىنشى قىسقى ازيادا ويىندارىنا العاش رەت قاتىستى. بۇل جولى سپورتتىڭ 7 ءتۇرى بويىنشا مەدالدار ساراپقا سالىنعان. قىتاي جەرىندە وتكەن جارىسقا 17 ەلدىڭ سپورتشىلارى قاتىسىپ، 5 ەلدىڭ سپورتشىلارى جۇلدەلى ورىنداردى ءوزارا بولىسكەن. بايراقتى باسەكەدە قازاقستاندىق سپورتشىلار 14 التىن مەدال ەنشىلەپ، جالپى كوماندالىق ەسەپتە 2 - ورىنعا تۇراقتادى.

1999 -جىلى كانگۆون (كورەيا) قالاسىندا وتكەن 4- قىسقى ازيادا ويىندارىندا دا قازاقستان سپورتشىلارى جاقسى ونەر كورسەتتى. ولار 10 التىن، 8 كۇمىس جانە 7 قولا جۇلدەنى قانجىعالارىنا بايلادى. 2003 -جىلى اوموري (جاپونيا) قالاسىندا وتكەن جارىستا دا قازاقستاندىقتار تاماشا ويىن ورنەگىن كورسەتە ءبىلدى.

جاپون جەرىندە وتانداستارىمىز 7 التىن، 7 كۇمىس جانە 6 قولا مەدالعا يە بولعان. ال 2007 -جىلى چانگۋين (قىتاي) قالاسىندا وتكەن 6- قىسقى ازيادا ويىندارىندا قازاقستاندىق سپورتشىلار 6 التىن، 6 كۇمىس جانە 6 قولا مەدالدى قاناعات تۇتتى.

 2011 -جىلعا دەيىن قىسقى ازيادا ويىندارى تەك جاپونيا، قىتاي، كورەيا ەلدەرىندە عانا وتكىزىلىپ كەلگەن. ال VII قىسقى ازيادا ويىندارى تۇڭعىش رەت ت م د ەلدەرى اراسىندا قازاق ەلىندە بايراعىن جەلبىرەتتى. وندا وتانداستارىمىز 32 التىن، 21 كۇمىس، 17 قولا مەدال ەنشىلەپ، جالپى ەسەپتە ءبىرىنشى ورىندى جەڭىپ العان بولاتىن.

مىنە، بۇگىن وسى ءىرى جەڭىستەن كەيىنگى كەزەكتى ازيادا ويىندارىنىڭ الاۋى تۇتاندى. جەرلەستەرىمىزگە تەك جەڭىستى جولدار جالعاسا بەرسىن دەپ تىلەيىك.

ەستەرىڭىزگە سالا كەتەيىك، VIII قىسقى ازيادا ويىندارى جاپونيانىڭ ساپپورو قالاسىندا 19-26 - اقپان ارالىعىندا وتەدى. جالپى جارىستا 31 ەلدىڭ سپورتشىلارى 11 سپورت تۇرىنەن 64 مەدال جيىنتىعىن ساراپقا سالادى. بۇل ءباسى بيىك دوداعا ەلىمىزدىڭ نامىسىن قورعاۋعا 153 سپورتشى كەلدى.

 ايتا كەتكەن ءجون، كەشە العاشقى ىرىكتەۋ سىندارى باستالعان بولاتىن. وندا حوككەيدەن قازاقستاننىڭ ايەلدەر قۇراماسى جەرگىلىكتى سپورتشىلارمەن باق سىناسىپ، وكىنىشكە قاراي، قارسىلاستارىنان 0:5 ەسەبىمەن ۇتىلىپ قالدى. ال ەرتەڭ، ياعني 20 - اقپان كۇنى ءبىزدىڭ حوككەيشى ارۋلارىمىز قىتاي قۇراماسىمەن وينايدى.

اۆتور: كۇنسۇلتان وتارباي