قوش بول، ۋنيۆەرسيادا
ۋنيۆەرسيادانىڭ جابىلۋ ءراسىمى جەزتاڭداي ءانشى ارداق بالاجاننىڭ ءان شاشۋىمەن باستالدى. كەلەسى كەزەكتە ءجاميلا سەركەبايەۆا سكريپكادا تۇركەشتىڭ «كوڭىل اشار» كۇيىمەن ارلەي ءتۇستى. ال « ۇلىتاۋ توبى» ماحامبەتتىڭ «جۇمىر قىلىش» كۇيىن توگىلتتى.
شارانىڭ باستى ءساتىنىڭ ءبىرى سپورتشىلار شەرۋىندە كانادالىق سپورتشىلار ريزاشىلىقتارىن ءبىلدىرىپ، «الماتىعا راحمەت» دەگەن جازۋى بار پلاكات الىپ شىقتى.
ايتا كەتەيىك، ۋنيۆەرسياداعا 57 ەلدەن 2000 مىڭعا جۋىق سپورتشى قاتىستى. ۋنيۆەرسيادا ويىندارىندا 12 سايىس بويىنشا 85 مەدال جيىنتىعى ساراپقا سالىندى. جالپى كوماندالىق ەسەپتە رەسەي كومانداسى ءبىرىنشى ورىن الدى. ولاردىڭ ەنشىسىندە 28 التىن، 27 كۇمىس جانە 15 قولا مەدال بار. ەكىنشى ورىندا قازاقستان قۇراماسى. ءبىزدىڭ سپورتشىلار بايراقتى باسەكەدە 11 التىن، 8 كۇمىس جانە 17 قولا جەڭىپ الدى. ۇزدىك ۇشتىكتى وڭتۇستىك كورەيا تۇيىندەدى.
بۇل ەلدىڭ سپورتشىلارىندا 11 التىن، 5 كۇمىس جانە 5 قولا مەدال بار.
وسىعان وراي، قازاقستان پرەزيدەنتى نۇرسۇلتان نازاربايەۆ 28- دۇنيەجۇزىلىك قىسقى ۋنيۆەرسيادادا قازاقستان ۇلتتىق قۇراماسىنىڭ زور جەتىستىككە جەتۋىنە وراي قۇتتىقتاۋ جولدادى. مەملەكەت باسشىسى الماتىداعى 28- دۇنيەجۇزىلىك قىسقى ۋنيۆەرسيادادا جوعارى ناتيجە كورسەتكەن ۇلتتىق قۇرامانىڭ مۇشەلەرىن قۇتتىقتادى. ۋنيۆەرسيادانىڭ جابىلۋ سالتاناتى 80 ەلدە ترانسلياتسيالاندى. سالتاناتتى شاراعا ق ر ۇكىمەت باسشىسى باقىتجان ساعىنتايەۆ، حالىقارالىق ستۋدەنتتەر سپورتى فەدەراتسياسىنىڭ پرەزيدەنتى ولەگ ماتىسين، الماتى اكىمى باۋىرجان بايبەك جانە كەلەسى ۋنيۆەرسيادا ويىندارىن وتكىزەتىن رەسەيدىڭ كراسنويارسك قالاسىنىڭ باسشىلىعى قاتىستى.
ءوز سوزىندە قازاقستان ۇكىمەتىنىڭ باسشىسى الماتى ۋنيۆەرسياداسى الەم سپورتىنىڭ تاريحىنا وزىندىك ءىزىن قالدىرعانىن ايتتى. «1000 جىلدىق تاريحى بار الماتى ەكى اپتا بويى الەمنىڭ سپورت سۇيەر قاۋىمىنىڭ كوز تارتار ورتالىعىنا اينالدى. وسى ۋاقىت ىشىندە الەم قازاقستاندى، قازاقستان الەمدى جاڭا قىرىنان تانىدى. حالىقارالىق قاۋىمداستىق حالقىمىزدىڭ تامىرى تەرەڭ مادەنيەتى مەن قانىنا بىتكەن قوناقجايلىلىعىن، ۇزدىكسىز دامۋ مەن الەمدىك باسەكەلەستىكتەگى قايراتىن سەزدى. الماتى ۋنيۆەرسياداسى الەم سپورتىنىڭ تاريحىنا وزىندىك ءىزىن قالدىردى»، - دەدى قازاقستان ۇكىمەتىنىڭ باسشىسى باقىتجان ساعىنتايەۆ.
ال، 28- بۇكىلالەمدىك قىسقى ۋنيۆەرسيادانىڭ جابىلۋ سالتاناتىندا حالىقارالىق ستۋدەنتتەر سپورتى فەدەراتسياسىنىڭ باسشىسى ولەگ ماتىتسين ۋنيۆەرسيادانىڭ تاريحىندا بۇرىن- سوڭدى زالعا لىق تولعان حالىقتى كورمەگەندىگىن ايتتى. «FISU حالىقارالىق ستۋدەنتتەر سپورتى فەدەراتسياسىنىڭ اتىنان قىسقى ۋنيۆەرسيادانى جوعارى دەڭگەيدە وتكىزگەنى ءۇشىن ق ر پرەزيدەنتى نۇرسۇلتان نازاربايەۆقا جانە ۇيىمداستىرۋعا اتسالىسقان بارشا حالىققا ريزاشىلىعىمدى بىلدىرگىم كەلەدى. الماتى قالاسىنىڭ اكىمى باۋىرجان بايبەككە جانە سپورتسۇيەر قاۋىمعا العىسىم شەكسىز. سپورتشىلار مەن ەرىكتىلەرگە قولداۋ تانىتقاندارىڭىز ءۇشىن راحمەت دەيمىن. ۋنيۆەرسيادانىڭ تاريحىندا بۇرىن- سوڭدى زالعا لىق تولعان وسىنشاما كورەرمەندى كورمەگەنمىن. بۇل، ارينە سىزدەردىڭ سپورتقا دەگەن ىنتا- جىگەرلەرىڭىزدىڭ جوعارى ەكەندىگىنىڭ ايقىن دالەلى. سىزدەردى 2019 -جىلى كراسنويارسكىدە وتەتىن قىسقى ۋنيۆەرسيادادا اسىعا كۇتەمىن. 28^- ء^شى بۇكىلالەمدىك قىسقى ۋنيۆەرسيادانى رەسمي تۇردە جابىق دەپ جاريالايمىن!»، - دەپ تۇيىندەدى ءوز ءسوزىن ولەگ ماتىسين.
ۋنيۆەرسيادا ويىندارىنىڭ جابىلۋ سالتاناتىندا الماتى اكىمى باۋىرجان بايبەك ءدۇبىرلى دودانى وتكىزۋگە اتسالىسۋشىلارعا شىنايى ريزاشىلىعىن ءبىلدىردى. «28- قىسقى ۋنيۆەرسيادا ويىندارىنىڭ ءساتتى وتۋىمەن بارشاڭىزدى شىن جۇرەكتەن قۇتتىقتايمىن. بۇگىن بارشا سپورتشىلار، كوماندالار جەڭىسكە جەتكەن ايتۋلى كۇن. ۋنيۆەرسيادا تاريحىنىڭ تاعى ءبىر مازمۇندى پاراعى جابىلعالى تۇر. وسى جوبانىڭ جۇزەگە اسىرىلۋىنا تىكەلەي قامقور بولعان ەلباسىمىز نۇرسۇلتان ءابىش ۇلى نازاربايەۆقا، ەل ۇكىمەتىنە العىسىمىز شەكسىز. جاڭا FISU پرەزيدەنتى ماتىتسين مىرزا ءوزىنىڭ جوعارى باعاسىن بەردى. سول ارقىلى حالقىمىزدىڭ اۋىزبىرشىلىگىن، مەملەكەتىمىزدىڭ الەۋەتىن، ۇيىمداستىرۋشىلاردىڭ ەڭبەگىن اتاپ ءوتتى. ول ءۇشىن مىڭدا ءبىر راحمەت.
بارلىق شارالارعا كورەرمەندەردىڭ بەلسەندى قاتىسۋى، مەرەكەلىك كوڭىل- كۇيمەن جانكۇيەر بولۋى، حالىقتىڭ ىستىق ىقىلاسى ءبىز ءۇشىن ەڭ ۇلكەن باعا. وسى ءدۇبىرلى دودانى وتكىزۋگە تىكەلەي اتسالىسقان FISU حالىقارالىق ۇيىمنىڭ وكىلدەرىنە، بارلىق ۇيىمداستىرۋشىلار، قازاقستاننىڭ ستۋدەنتتىك فەدەراتسياسىنا، ەرىكتىلەر مەن ستۋدەنت جاستارعا، جانكۇيەرلەرگە العىسىمىزدى بىلدىرەمىز»، - دەدى باۋىرجان بايبەك.
سونىمەن قاتار، ۋنيۆەرسيادانىڭ جابىلاۋىنا سايىستاردىڭ ءساتتى وتۋىنە كومەكتەسكەن ەرىكتىلەرگە العىس ايتىلدى. 28-بۇكىلالەمدىك قىسقى ۋنيۆەرسياداعا 20 ەلدەن كەلگەن 3000 ەرىكتى قاتىستى.
ايتا كەتەيىك، ەرىكتىلەر اراسىندا 78 جاستاعى كانادالىق ەنتوني مايكل حيللدىڭ ەسەمى مەن 3- توپ مۇگەدەگى سەرىك ەسمانوۆتىڭ ەسىمى ەرەكشە اتالدى. جابىلۋ شاراسىنىڭ ەڭ ماڭىزدى ءساتى ارينە، فيسۋ جالاۋىنىڭ كەلەسى ۋنيۆەرسيادا وتەتىن قالاعا تاپسىرىلۋى مەن الاۋدىڭ ءسوندىرىلۋ ءراسىمى بولدى. الماتى قالاسىنىڭ اكىمى باۋىرجان بايبەك حالىقارالىق ستۋدەنتتىك سپورت فەدەراتسياسىنىڭ جالاۋىن كراسنويارسك قالاسىنىڭ مەرى ەدحام اكبۋلتاوۆكا تابىس ەتتى. جالاۋدى قابىلداپ العان رەسەيلىكتەر الماتىداعى ۋنيۆەرسيادانىڭ جابىلۋىندا ءوز قالالارىن تانىستىردى. وندا رەسەيلىك مانەرلەپ سىرعاناۋشى، وليمپيادا چەمپيونى الەكسەي ياگۋدين ونەر كورسەتتى. «الماتى ارەنادا» وتكەن شارادا كراسنويارسك قالاسىنىڭ تاريحىن، مادەنيەتىن، ونەرى تانىستىرىلدى. ۋنيۆەرسيادانىڭ جابىلۋ سالتاناتى قازاق ەستارداسىنىڭ جارىق جۇلدىزدارى ءالي وقاپوۆ پەن داستان ورازبەكوۆتىڭ «الاۋ» اتتى انىمەن اياقتالدى.
اۆتور: الماس مۇقاش ۇلى
