سۋديا قازاق اگروتەحنيكالىق ۋنيۆەرسيتەتىنىڭ ستۋدەنتىن ايامادى

استانا. قازاقپارات - بۇگىن قازاق ۇلتتىق ونەر ۋنيۆەرسيتەتىندە اكىمشىلىك قۇقىق بۇزۋشىلىق ارەكەتتەرى بويىنشا كوشپەلى سوت وتىرىسى ءوتتى.

وندا قوعامدىق جەردە تەمەكى تۇقىلىن تاستاعان ستۋدەنتتەردىڭ دە ءىسى قارالدى، دەپ حابارلايدى قازاقپارات ءتىلشىسى. ءماجىلىس زالىنا الدىمەن جۇمىس جاسىنداعى ازاماتتاردى ءبىر- بىرلەپ كىرگىزىپ، قورشاعان ورتانى لاستاپ، تەمەكى تۇقىلىن تاستاعانى ءۇشىن ۇكىم شىعاردى. وسىلايشا، يۆان شۆەتسوۆ، قاينار شوتپانوۆ، ۆالەنتين وجوگين مەن نۇرلان ەرماعامبەتوۆكە 10 ا ە ك، ياعني 22690 تەڭگە كولەمىندە ايىپپۇل سالىندى.

ال دانابەك كارىباي مەن نۇرجاۋعان قايىرگەلدينگە جەڭىلدىك جاسالدى. ولار ءوز كىناسىن مويىنداپ، ستۋدەنت ەكەندەرىن جەتكىزدى. الايدا قاي جوعارى وقۋ ورنىندا ءبىلىم الىپ جاتقاندارىن جاريالاماۋدى ءجون كوردى. سۋديا ۇلدانا سۇلەيمەنوۆا ولارعا قاتىستى ايىپپۇلدىڭ كولەمىن 30 پايىزعا - 15883 تەڭگەگە دەيىن قىسقارتۋعا شەشىم شىعاردى.

ستۋدەنت رۋستەم ماقتايەۆ بولسا، قاي جەردە وقىپ جاتقانىن اشىق ايتىپ، كىناسىن مويىنداسا دا، سۋديا وعان قاتىستى جازانى جەڭىلدەتكەن جوق. سول قالپىندا، ياعني 22690 مىڭ تەڭگە كولەمىندە قالدىردى. قازاقپارات تىلشىسىنە سۇحبات بەرگەن سۋديا ۇلدانا سۇلەيمەنوۆا وسى شەشىمنىڭ سەبەبى ءتۇسىندىرىپ بەردى.

"قازاق اگروتەحنيكالىق ۋنيۆەرسيتەتىندە ءبىز وسىنداي كوشپەلى سوت وتىرىستارىن ءجيى وتكىزىپ تۇرامىز. سوندىقتان ول جوعارى وقۋ ورنىنىڭ ستۋدەنتتەرى تەمەكى تۇقىلىن تاستاۋ سياقتى قۇقىق بۇزۋشىلىقتىڭ جازاسى جايىندا جاقسى بىلەدى. ماقتايەۆ ءوزى دە ايتىپ تۇر، بىزگە كەلىپ تۇراتىنىڭىزدى جانە ونداي جاۋاپكەرشىلىكتى بار ەكەنىن بىلەمىن دەپ، ياعني ول وسىنداي سوت ماجىلىستەرىنەن قورىتىندى جاساماي، قۇقىق بۇزۋشىلىققا بارىپ وتىر. سول سەبەپتى مەن وعان قاتىستى ايىپپۇلدىڭ كولەمىن 30 پايىزعا تومەندەتۋ شاراسىن قولدانعان جوقپىن"، - دەدى سۇلەيمەنوۆا.

ايتا كەتەيىك، سۋديا قۇرىلىستا جۇمىس ىستەيتىن الماس عابيدەنوۆتىڭ ايىپپۇلىن دا قىسقارتۋدى ءجون كوردى. ال قوعامدىق جەرلەردە الكوگول ىشكەن رومان سەمەنوۆ پەن اناتولي سۆياگين ەكى تاۋلىككە قاماۋعا الىندى.