ديماش قۇدايبەرگەنوۆتىڭ اناسى ۇلىنىڭ جەكە ءومىرى جايلى ايتىپ بەردى
بايقاۋدىڭ العاشقى كەزەڭىندە ديماش فرانسۋز تىلىندە SOS d'un terrien en détresse ءانىن ورىنداسا، ەكىنشى كەزەڭدە ۆيتاستىڭ "وپەرا №2" ءانىن ءساتتى ورىنداپ شىقتى. ساناۋلى كۇندەردىڭ ىشىندە ديماشتىڭ قازاقستان مەن قىتايدا ءسۇيىپ تىڭدايتىن جانكۇيەرلەرى پايدا بولدى.
Tengrinews.kz ءتىلشىسى ءانشىنىڭ اناسى سۆەتلانا ايتبايەۆامەن بايلانىسقا شىعىپ، ديماشتىڭ I Am a Singer بايقاۋىنىڭ 3- كەزەڭىنە قالاي دايىندالىپ جاتقانىن سۇرادى.
ديماشتىڭ اناسىنىڭ ايتۋىنشا، ولار كۇنىنە ەكى رەت - تاڭەرتەڭ جانە كەشكە سويلەسىپ تۇرادى.
«ءبىز بۇگىن تاڭەرتەڭ عانا سويلەستىك. ول دايىندىقتىڭ قالاي ءوتىپ جاتقانىن ايتىپ بەردى، بارلىعى جاقسى سياقتى. ونىڭ داۋسىنان-اق ماتەريالدى 100 پايىزعا بىلەتىنىن ءتۇسىندىم. بۇل ونىڭ وركەسترمەن جانە ديريجەرلەرمەن جاقسى قارىم-قاتىناستا ەكەنىن بىلدىرەدى. دايىندىقتان شىعىپتى، ەموتسياعا تولى. ديماش ءۇشىنشى كەزەڭدە اعىلشىن تىلىندە ءان ورىندايدى. ول بۇل ءاندى جاقسى بىلەدى. جاقسى ونەر كورسەتەدى دەپ ويلايمىز»، - دەدى سۆەتلانا ايتبايەۆا. ونىڭ ايتۋىنشا، ديماش ءساۋىر ايىنىڭ سوڭىنا دەيىن قىتايدا بولادى. سەبەبى، بايقاۋدىڭ ءالى شامامەن 10 كەزەڭى بار ەكەن.
سۆەتلانا ايتبايەۆا كەز كەلگەن انا سياقتى بوتەن ەلدە جۇرگەن ۇلى ءۇشىن الاڭدايدى.
«ارينە، ءبىز ونى سوڭعى كەزەڭدە دەيىن جەتۋىن قالايمىز. سەبەبى، بۇل ۇلكەن جوبا ءارى جوبانىڭ باعدارلاماسى دا وتە قيىن. ءار كەزەڭ سايىن ءبىر قاتىسۋشى شىعادى. مەن انا رەتىندە ونىڭ بارلىق 13 كەزەڭنەن ءوتىپ، فينالعا جەتۋىن تىلەيمىن»، - دەدى سۆەتلانا ايتبايەۆا.
سونداي-اق، ديماشتىڭ اناسى ينتەرنەتتە ۇلى جايلى جاريالانىپ جاتقان جاڭالىقتاردى مينۋت سايىن قاراپ وتىراتىنىن ايتىپ ءوتتى. ايتا كەتەيىك، كەشە ب ا ق- تاردا رەسەيلىك ءانشى ۆيتاستىڭ ارىزى جايلى دا ايتىلعان بولاتىن، ءبىراق كەيىننەن بارلىق ماسەلە شەشىلىپتى.
«ارينە، ءبىز ۋايىمدادىق. ديماشقا حابارلاستىم. ءبىراق ول بايسالدى تۇردە جاۋاپ بەردى. ۇلىمنىڭ اتىنا مۇنداي مازمۇنداعى حات كەلگەن جوق، ول ارىز تەلەارناعا (Hunan TV - اۆتور) تۇسكەن ەكەن. تانىمال ادامداردىڭ ءوزى وسىعان اسەر ەتىپ جاتسا، دەمەك ديماش ءاندى وتە جاقسى ورىنداپ شىقتى! ۆيتاس ديماشتىڭ ونەرىن باعالادى دەگەن ءسوز. ارينە، ۇلىمنىڭ شىعارماشىلىق جولىندا ەشقانداي دا قيىندىقتار بولماعانىن قالايمىن»، - دەدى ءانشىنىڭ اناسى.
اناسىنىڭ ايتۋىنشا، ديماش قۇدايبەرگەنوۆ مۋزىكامەن بەس جاسىنان باستاپ اينالىسقان. قازىر ديماش 22 جاستا، اقتوبەدەگى جۇبانوۆ اتىنداعى مۋزىكالىق كوللەدجدى اياقتاعان. ال قازىر ديماش استاناداعى قازاق ۇلتتىق ونەر ۋنيۆەرسيتەتىنىڭ 3-كۋرس ستۋدەنتى ەكەن.
سونداي-اق، ءانشىنىڭ اناسى ديماشتىڭ جەكە ءومىرى جايلى دا ايتىپ بەردى.
«ول قىزدارمەن قارىم- قاتىناستارى جايلى ايتا بەرمەيدى، ياعني، ازىرشە ونىڭ قىزى جوق دەگەن ءسوز. قازىر ول ءۇشىن ەڭ باستىسى - مۋزىكا جانە شىعارماشىلىق. ديماش بوس ۋاقىتىن وسىعان ارنايدى، ونىڭ اڭگىمەلەرىنىڭ بارلىعى تەك مۋزىكا مەن رەپەرتۋار جايىندا. ارينە، ءبىز ديماشتى وقۋىن اياقتاپ، مانساپ جولىن قۇرىپ، ۇيلەنەدى دەپ سەنەمىز. ءبىز سول تۋرالى ارماندايمىز جانە سول ءساتتى كۇتەمىز»، - دەدى ءانشىنىڭ اناسى.
ايتا كەتەيىك، ديماش قۇدايبەرگەنوۆ 28 -قاڭتاردا قىتايدا ءوتىپ جاتقان I Am a Singer مۋزىكالىق كونكۋرسىنىڭ ەكىنشى كەزەڭىندە دە جەڭىمپاز اتانعان بولاتىن. ءانشى رەسەيلىك اتاقتى ۆيتاستىڭ "وپەرا 2" اتتى تۋىندىسىن ورىنداعان ەدى. ۆيدەونى مىنا جەردەن كورۋگە بولادى.
ال تەلەشوۋدىڭ ءبىرىنشى كەزەڭىندە ءانشى SOS d'un terrien en détresse ءانىن فرانسۋز تىلىندە ورىنداپ، جەڭىمپاز اتانعان بولاتىن. ايتا كەتەيىك، ديماش قۇدايبەرگەنوۆ قاتىسىپ جاتقان كونكۋرستا 14 كەزەڭ بار. كونكۋرس قىتايدىڭ چاڭشا قالاسىندا ءوتىپ جاتىر.
