نۇرلان نوعايەۆ بالىقتى شەتەلگە وڭدەپ ساتۋدىڭ ماڭىزىن ءتۇسىندىردى
دەپ حابارلايدى اتىراۋ وبلىسى اكىمدىگىنىڭ باسپا ءسوز قىزمەتى.
كەڭەستە نۇرلان نوعايەۆ بالىق شارۋاشىلىعىنىڭ وڭدەلگەن ونىمدەرىن ەكسپورتقا شىعارۋ ماسەلەسىن العا قويدى.
«اتىراۋلىق بالىقتى رەسەيلىك كاسىپكەرلەر ساتىپ الىپ، تەرەڭ وڭدەپ ساتىپ وتىر. بۇنى ءبىز نەگە جاساي المايمىز؟ ەلباسى بيىلعى جولداۋىندا اۋىل شارۋاشىلىعى سالاسى ەلىمىز ءۇشىن ستراتەگيالىق باسىم باعىتتاردىڭ ءبىرى ەكەندىگىن ايتتى. سول سەبەپتى ءبىز اتىراۋ وبلىسىندا ەكونوميكانى ءارتاراپتاندىرا وتىرىپ، ەكسپورتقا تەرەڭ وڭدەلگەن ءونىمدى شىعارۋعا دەن قويۋىمىز كەرەك»، - دەدى ول.
ونىڭ ايتۋىنشا، بۇل تۇستا ءتۇرلى قيىندىقتار بولۋى مۇمكىن. ايتسە دە، بۇل ءتۇپتىڭ تۇبىندە كاسىپكەر ءۇشىن دە، قاراپايىم تۇرعىندار ءۇشىن دە وراسان زور پايدا. جاڭا جۇمىس ورىندارىنىڭ كوپتەپ اشىلۋى دا ماڭىزدى ەكەندىگى ايتىلدى.
ايتا كەتەلىك، ايماقتا بالىق اۋلاپ ساتۋمەن اينالىساتىن جيىرماعا جۋىق كومپانيا بار. وندىرىلگەن ءونىمنىڭ توقسان پايىزعا جۋىعى رەسەيگە، قالعان بولىگى ۋكراينا، گەرمانيا، فرانتسيا ەلدەرىنە ساۋدالاپ وتىر. ايتسە دە، ەكسپورتقا شىعارىلىپ جاتقان ونىمدەردىڭ كوپ بولىگى وڭدەلمەگەن كۇيدە كەتىپ جاتىر. بالىقتى وڭدەپ ساتاتىندار قاتارىندا «كاسپيي بالىق»، «امانگەلدى» سياقتى وندىرىستىك كووپەراتيۆتەر بار. ماسەلەن، «كاسپيي بالىق» كووپەراتيۆى ەشقانداي قالدىقسىز جۇمىس ىستەيدى. كومپانيا مەنەدجەرلەرىنىڭ ايتۋىنشا، بالىق قالدىقتارىنان ۇن جاسالىپ، ول مال ازىعى رەتىندە ساتىلادى.
بالىقشىلار جيىن بارىسىندا بالىقتى تەكسەرۋدەن وتكىزۋدىڭ قيىندىعىنا قاتىستى ماسەلە كوتەردى. ولاردىڭ ايتۋىنشا، كاسىپكەرلەر اۋلاعان بالىقتارىن ساتار الدىندا زەرتحانادان تەكسەرۋدەن وتكىزۋ ءۇشىن جول ازابىن تارتىپ وبلىس ورتالىعىنا بارۋى كەرەك. قۇرمانعازى اۋدانىندا وسىنداي زەرتحانانىڭ جوق ەكەنىن العا تارتىپ، قيىندىعىمەن ءبولىستى.
ايماق باسشىسى نۇرلان نوعايەۆ ورىنباسارىنا بۇل ماسەلەمەن اينالىسىپ، اۋداننان زەرتحانا اشۋدى قامتاماسىز ەتۋدى تاپسىردى.
جيىندا ايماق باسشىسى بىلتىرعى قۇرمانعازى اۋدانىنا ساپارى كەزىندەگى تاپسىرمالاردىڭ ورىندالۋىن دا سۇرادى. اۋدان اكىمى بەرىلگەن 67 تاپسىرمانىڭ 29-ىن عانا بىتىرگەندىگىن ايتتى. قالعان تاپسىرمالار ورىندالىپ جاتىر.
ايتا كەتەلىك، اتىراۋ وبلىسىندا 40 بالىق شارۋاشىلىعى ۋچاسكەسى بار. بالىق اۋلاۋدى كاسىپ ەتكەن 19 بالىق شارۋاشىلىعى بار.
