ساندىق تۇبىندە ساقتالىپ كەلگەن ماعجان جۇمابايەۆتىڭ قاسقىر ىشىگى - فوتو
قاسقىر ىشىكتىڭ ءباتيما اپايدىڭ وتباسىندا پايدا بولۋىنىڭ تاريحى دا وزگەشە قىزىق. ماعجان جۇمابايەۆتىڭ اناسى مەن ءباتيما اشىربەك قىزىنىڭ اناسى قاراۋىل رۋىنىڭ ىشىندە جاۋھار دەگەن اتادان تاراعان اعايىنداس بولىپ كەلەتىن كورىنەدى. ولار سول كەزەڭدە سولتۇستىك قازاقستان وبلىسىنىڭ قارا وي دەگەن جەرىن مەكەن ەتكەن. ەكىنشىدەن، ءباتيما اپايدىڭ اكەسى اشىربەك بي- بولىس بولماسا دا، سول دەڭگەيدەگى ادامداردىڭ قونىستاناتىن ۇيىنە اينالعان. ۇشىنشىدەن، اشىربەك اقساقالدىڭ قايىناعاسى جاقيا اۋباكىروۆ دەگەن كوزى اشىق، كوكىرەگى وياۋ ازامات ماعجانمەن بىرگە جۇرگەن. سول تۇستا ماعجان جۇمابايەۆ ومبىدا وقىپ جۇرگەن كەزىندە اشىربەك اقساقالدىڭ ۇيىندە تۇستەنىپ، ارالاس- قۇرالاستىعى جاراسىپ كەتەدى. ماعجان جۇمابايەۆ قاسقىر ىشىكتىڭ تەرىسىن لەنينگراد قالاسىنان ساتىپ اكەلىپ، ەلىنە كەلگەن سوڭ كەنجەتاي دەگەن شەبەرگە ىشىك قىلىپ تىكتىرتەدى. 1929- جىلدان 38- جىلعا دەيىنگى ارالىقتا اقىننىڭ شىعارماشىلىعىندا ۇنسىزدىك ورناپ، قۇلازىپ جۇرگەن كەزىندە، اتالعان ىشىكتى اشىربەك اقساقالدىڭ يىعىنا جاۋىپ كەتەدى.
ماعجاننىڭ قاسقىر ىشىگى 1959- جىلعا دەيىن اشىربەك اقساقالدىڭ ۇيىندەگى ءتورت قۇلاقتى ساندىقتا تىعۋلى كۇيىندە جاتا بەرەدى. ول كەزدە قاسقىر ىشىكتى كيمەك تۇگىلى، ونى ماعجاننىڭ بەرگەن سىيى دەپ ايتۋعا دا سەسكەنەتىن زامان بولاتىن، - دەيدى 83 جاستاعى قاريا. سول جىلى ءباتيما اپايدىڭ جولداسى قايىربەك حاسەنوۆ جوعارى ءبىلىم الىپ كەلىپ، ديپلومىن قايىناتاسىنا كورسەتۋگە بارعاندا كيەلى قاسقىر ىشىكتى كۇيەۋ بالاسىنىڭ يىعىنا جاۋىپ، امانات ەتىپ تابىستايدى. اتادان بالاعا ميراس رەتىندە قالىپ كەلە جاتقان جادىگەردى ءباتيما اپاي دا كۇنى بۇگىنگە دەيىن ساندىقتا ساقتاپ كەلگەن.
ماعجاننىڭ شەبەرگە تىكتىرگەن قاسقىر ىشىگىنىڭ ءبىر تۇيمەسىن دە قايتا قاداعان ەمەسپىن، - دەيدى ءباتيما اجەي. 81 -جىلدان استام ساندىقتا كوزدىڭ قاراشىعىنداي ساقتالىپ كەلگەن قۇندى دۇنيە ءالى دە يەنەدەن جاڭا شىققانداي. ماعجاننىڭ ءوزى كەزىندە جىرلاعان ارىستانداي ايباتتى، جولبارىستاي قايراتتى، قىرانداي كۇشتى قاناتتى سەنگەن جاستار بۇل جادىگەردىڭ قادىرىنە جەتسە دەگەن يگى تىلەكپەن اتتاندىق ءباتيما اپايدىڭ ۇيىنەن.
kokshetautv.kz
