قازاقستان كيبەرقالقانمەن قورعالادى
«كيبەرقىلمىسپەن كۇرەستىڭ وزەكتىلىگى بارعان سايىن ارتا تۇسۋدە. ۇكىمەت پەن ۇلتتىق قاۋىپسىزدىك كوميتەتىنە «قازاقستان كيبەرقالقانى» جۇيەسىن قالىپتاستىرۋ شارالارىن قابىلداۋدى تاپسىرامىن» ، - دەپ اتاپ ءوتتى نۇرسۇلتان نازاربايەۆ 31 -قاڭتار كۇنى جاريالانعان جولداۋىندا.
ودان بولەك، مەملەكەت باسشىسى ءدىني ەكسترەميزمدى ناسيحاتتاۋدىڭ الدىن الۋ، اسىرەسە ينتەرنەت پەن الەۋمەتتىك جەلىدە ونىڭ جولىن كەسۋ جۇمىسىن جۇرگىزۋ قاجەتتىگىن باسا ايتتى.
«باس بوستاندىعىنان ايىرۋ ورىندارىندا سوتتالعانداردى تەولوگيالىق تۇرعىدان ساۋاتتاندىرۋ قىزمەتتەرىنىڭ ماقساتتى جۇمىسى ۇيىمداستىرىلۋعا ءتيىس. وسكەلەڭ ۇرپاقتى رۋحاني- ادامگەرشىلىك رۋحىندا تاربيەلەۋ ءۇشىن قوسىمشا قادامدار جاساۋ كەرەك» ، - دەدى ن. نازاربايەۆ.
تەرروريزمگە قارسى كۇرەس ماسەلەلەرىنە توقتالعان پرەزيدەنت دەسترۋكتيۆتى كۇشتەردى قارجىلاندىراتىندارعا، شەتەلدىك تەرروريستىك ۇيىمدارمەن بايلانىس جاسايتىندارعا قارسى كۇرەس جۇرگىزۋ ءىسىنىڭ نەگىزگى ماسەلە بولىپ سانالاتىنىن ايتتى.
بۇل ىسكە مەملەكەتتىك ەمەس سەكتوردى جانە ءدىني بىرلەستىكتەردى بەلسەندى تۇردە تارتۋ قاجەت، - دەدى ول. - وسى شارانىڭ ءبارى مەنىڭ تاپسىرمام بويىنشا ازىرلەنىپ جاتقان، 2017-2020 -جىلدارعا ارنالعان ءدىني ەكسترەميزم مەن تەرروريزمگە قارسى ارەكەت جونىندەگى مەملەكەتتىك باعدارلامادا ەسكەرىلۋگە ءتيىس.
