09:20, 29 - قاڭتار 2017 | GMT +6
كىشكەنە دەلفين سەلفي ءۇشىن قۇربان بولدى - كەسكىن
استانا. قازاقپارات - ارگەنتينانىڭ سانتا تەرەسيتا جاعاجايىندا ءبىر توپ ادام جاعاعا شىعىپ قالعان دەلفيننىڭ بالاسىن دەرەۋ سۋعا جىبەرگەننىڭ ورنىنا، ونىمەن سەلفي جاساپ، ءولتىرىپ تاستاعان.
الەۋمەتتىك جەلىلەردە ادامدار كىشكەنە دەلفيندى باسىنا كوتەرىپ، فوتوعا ءتۇسىپ جاتقان ءساتى بەينەلەنگەن سۋرەتتەر مەن ۆيدەولار جاريالاندى. «ونى سۋعا جىبەرىپ، قۇتقارىپ قالۋعا بولاتىن ەدى. سەبەبى ونى تاۋىپ العان ساتتە ول ءالى دەمالىپ جاتقان بولاتىن. ءبىراق ادامدار كىشكەنە دەلفين ءولىپ قالدى دەپ، ەشكىمدى تىڭداماي، ونىمەن سۋرەتكە تۇسە باستاعان»، - دەيدى وقيعا كۋاگەرى C5N تەلەارناسىنا بەرگەن سۇحباتىندا.
بۇل وقيعا الەۋمەتتىك جەلىلەردە ادامداردىڭ اشۋىن تۋدىردى. سۋرەت ءۇشىن كىشكەنە دەلفيندى ءولتىرىپ تاستاعاندارعا جۇرت نارازىلىعىن ءبىلدىرىپ جاتىر.
