اقتوبەلىكتەر مال ۇرلاعانداردىڭ اتى- ءجونى مەن فوتوسىن ءىلىپ قويۋدى تالاپ ەتتى
دەپ حابارلايدى «قازاقپارات» ءتىلشىسى.
قىسى- جازى مالىن باعىپ، جەم- ءشوبىن دايىنداپ وتىرعان اقتوبەلىكتەر ۇرلىقتان شارشاعان. ەندى ولار ءتورت تۇلىككە اۋىز سالعانداردىڭ اتى- ءجونى مەن ءتۇر- تۇلعاسىن ءبىلىپ ءجۇرۋدى قالايدى.
«اقتوبە قالاسىنداعى اۆتوبۋستاردا قالتاعا ءتۇسىپ، تەلەفون مەن اقشا ۇرلايتىنداردىڭ فوتوسى ءىلۋلى تۇر. ءتىپتى، وبلىستىق ىشكى ىستەر دەپارتامەنتىنىڭ تەلەفونى مەن مەكەنجايى جازىلعان. سول ءادىستى مال ۇرلىعىمەن ۇستالعاندارعا دا پايدالانۋ قاجەت. ءبىز ۇرلىقشىنىڭ اۋىلدان، قالادان، باسقا وڭىردەن كەلىپ جۇرگەنىن بىلگىمىز كەلەدى. ءتىپتى، كورشىمىز شىعار. ۋچاسكەلىك ينسپەكتورعا ايتىپ ەدىك، «قۇقىعىمىز جوق، بولمايدى» دەپ شىعارىپ سالدى»، - دەدى اقتوبە قالاسى، سازدى اۋىلىنىڭ تۇرعىنى ابۋباكىر مۇڭايتپاسوۆ.
اۋىل تۇرعىنىنىڭ بۇل ۇسىنىسى وبلىس اكىمى بەردىبەك ساپاربايەۆتىڭ كوڭىلىنەن شىقتى. بۇدان بىلاي ءار ۋچاسكەلىك ينسپەكتوردىڭ بولىمشەسىندە مال ۇرلىعىمەن ۇستالىپ، جازالانعانداردىڭ اتى- ءجونى مەن فوتوسى ءىلۋلى تۇراتىن بولدى.
«ءىلۋ قاجەت. حالىق دۇرىس ايتادى. بۇل قيىن جۇمىس ەمەس، ورىنداڭىزدار»، - دەدى بەردىبەك ساپاربايەۆ.
اۋىل تۇرعىندارىنىڭ ايتۋىنشا، ەگەر ۇرلىقشىنىڭ تەگى بەلگىلى بولسا، ساقتىق شارالارى كۇشەيەدى. ولار «وسى ارقىلى مال ۇرلىعى دەرەگى ازايادى» دەپ وتىر.
التىناي ساعىندىقوۆا
