ماڭعىستاۋداعى پەرزەنتحانادا دارىگەرلەردى تاڭ-تاماشا ەتكەن عاجايىپ بولدى - فوتو

استانا. قازاقپارات - ماڭعىستاۋ وبلىسىنداعى پەرزەنتحانادا 13 -قاڭتاردا دارىگەرلەردى تاڭ- تاماشا ەتكەن عاجايىپ بولدى.
None
None

جانسەرىك تۇياقبايەۆ پەن اقمارال جالاجانوۆانىڭ وتباسىندا ۇشەم دۇنيەگە كەلىپ، اتا-انالاردى عانا ەمەس، اكۋشەرلەردى دە تاڭعالدىرعان. سەبەبى، جەرگىلىكتى «لادا» باسىلىمىنىڭ مالىمەتىنشە، ايەلدىڭ ءوزى دە، دارىگەرلەر دە ەگىز تۋادى دەپ ويلاعان. ءۇشىنشى نارەستەنى اقتاۋ مەن الماتىدا وتكىزىلگەن ۋلترادىبىستىق زەرتتەۋ دە كورسەتە الماعان.

«ايەل بىزگە 28 -جەلتوقساندا شەتپەدەن كەلدى، دياگنوزى «جۇكتىلىكتىڭ 31-اپتاسى، ەگىز، جەڭىل دارەجەدەگى پرەەكلامپسيا» بولدى. 12 -قاڭتاردا ايەل قان قىسىمى كوتەرىلىپ، السىرەي باستاعان سوڭ جانساقتاۋ بولىمىنە اۋىستىردىق، 13 -قاڭتاردا دوكتورلار كوسيليۋمىندا وعان وتا جاساۋ تۋرالى شەشىم شىعاردىق، سەبەبى جۇكتىلىك مەرزىمى 34-اپتاسى، جوعارى دارەجەدەگى پرەەكلامپسيا جانە ىشتەگى نارەستە دۇرىس جاتپاي قالدى. وسىنداي دياگنوزبەن وتا جاسالدى. وتا كەزىندە ەكىنشى نارەستەنى الىپ شىققان سوڭ، ءۇشىنشىسىنىڭ بارى انىقتالدى، وسىلايشا ونى دا شىعارىپ الدىق»، - دەدى وتا جاساعان دارىگەر، پەريناتالدىق ورتالىقتىڭ باس دارىگەرىنىڭ ورىنباسارى جاپىراق ەپەنوۆا.

 

اقمارالدىڭ ءوزى دە 33 جاسىندا ۇشەم بوساناتىنىن كۇتپەگەنىن ايتىپ وتىر. كۇيەۋى ەكەۋى قىز قالاپتى. بۇل وتباسىندا وسىعان دەيىن ءتورت بالا بولعان، ەندى ولار جەتى بالانىڭ اتا-اناسى اتانىپ وتىر. ايەل بىرنەشە رەت ۋلترادىبىستىق زەرتتەۋدەن وتكەن، الايدا ولاردىڭ ءبىرى دە ۇشەم ەكەنىن انىقتاي الماعان.

«بۇل ايەل بىزدە جۇكتىلىكتىڭ بەس اپتاسىنان بەرى قارالىپ ءجۇر. سول كەزەڭدە الماتىدا، رەپرودۋكسيا ورتالىعىندا قارالعان. سول جاقتا ۋلترادىبىستىق زەرتتەۋ جۇرگىزگەن، ەگىز بولادى دەگەن قورىتىندى جاسالعان. كەيىن، ارينە، اقتاۋدا ءتورت رەت زەرتتەۋدەن وتكىزىلدى، بارلىعىندا دا ەگىز كورسەتىلدى. مۇنداي كۇتپەگەن جاڭالىققا قۋاندىق. مۇنداي جاعداي بولمايدى. ءوز باسىم ءبىرىنشى رەت كورىپ وتىرمىن»، - دەدى ەپەنوۆا.

«ەگىز بولادى دەپ ويلادىم. دارىگەرلەر وسىلاي دەگەن. وتا كەزىندە ەسىمدى ءبىلىپ جاتتىم، ەكەۋ ەمەس، ءۇش بالا بوسانعانىمدى ايتقاندا، باقىتتى بولدىم. وسى كەزدە مەن «جارايسىڭ» دەدىم. دارىگەرلەر «كىم جارايدى؟» دەپ سۇرادى، ولارعا «مەن» دەدىم. ولار ءتىپتى قول شاپالاقتادى»، - دەدى اقمارال جالاجانوۆا.



«مەن وتە باقىتتىمىن، جاراتقانعا العىسىم زور، دارىگەرلەرگە، جانىمىزدا بولعانداردىڭ بارلىعىنا العىس ايتامىن! ءاربىر وتباسىعا وسىنداي باقىت تىلەيمىن»، - دەدى ۇشەمنىڭ اكەسى.

 

ءبىرىنشىسى - قىز بالا 12.00-دە بوسانعان، وعان مەدينا دەگەن ەسىم بەرىلدى. ونىڭ سالماعى 2 كەلى 270 گرامم. ءبىر مينۋت وتكەندە نۇريسلام دەگەن ۇل بالا دۇنيەگە كەلدى، سالماعى 2 كەلى 480 گرامم. ال ءۇشىنشىسى - ادەمى 1 كەلى 940 گرامم بوپ دۇنيەگە كەلىپتى. دارىگەرلەر ولارعا سىيلىق جاسادى.

 

ۇشەم ءبىراز ۋاقىت بالالار جانساقتاۋ بولىمىندە جاتتى. ال كەشە بالالار مەن اناسى جاعدايى جاقسارىپ، شەتپەگە جول ءجۇرىپ كەتتى.

 






Kaz.tengrinews.kz

  

سوڭعى جاڭالىقتار