ەكسپوداعى اۆستريا پاۆيلونى ادام كۇشىمەن عانا قوزعالادى

بۇگىن جۋرناليستەرمەن كەزدەسكەن پاۆيلوننىڭ باس ساۋلەتشىسى يوحانن موزەر ءوزىنىڭ جوباسى تۋرالى جان- جاقتى ايتىپ بەردى، دەپ حابارلايدى قازاقپارات.
ارحيتەكتوردىڭ ايتۋىنشا، اۆستريا پاۆيلونى ۇلكەن ماشينا ىسپەتتى جۇمىس ىستەيدى. ءبىراق، پاۆيلون «قوزعالىپ»، ياعني، قۋات ءبولىپ، جۇمىسىن باستاۋ ءۇشىن كەلگەن ادامدار ءوزىنىڭ دەنە قوزعالىسى ارقىلى قۋات تاراتۋى كەرەك. ادام كوبىرەك جۇگىرسە، بولىنەتىن ەنەرگيا دا كوپ بولادى. ال، دەنە ءبىتىمى سپورتقا بەيىم، كوپ قوزعالىپ، تيىسىنشە كوپ ەنەرگيا بولگەن ادام اۆسترياعا جولداما ۇتىپ الا الادى.
«بۇل جوبامىزدى قازىلار القاسىنا ۇسىنعان كەزدە، ولار قاتتى تاڭ قالدى. «اۆستريانىڭ وزىق تەحنولوگيالارى قايدا قالادى؟» دەدى ولار. ءبىراق، ءبىزدىڭ ماقساتىمىز تەحنولوگيالار قۋات تاراتقانىمەن، الەمدەگى نەگىزگى كۇش- قۋات يەسى ادام ەكەنىن كورسەتۋ»، - دەيدى جوباسىن تانىستىرعان موزەر.
اۆستريا پاۆيلونىنىڭ نەگىزگى ۇرانى - «اۆستريا - جاننىڭ «اقىلى» مەن جۇرەكتىڭ كۇشىمەن» دەپ اتالادى. اقىل دەگەنىمىز - ادامنىڭ بويىنداعى يدەيا، شىعارماشىلىق الەۋەت. ال، جۇرەك - قورشاعان ورتاعا دەگەن ماحاببات، ءوز ىسىڭە دەگەن ماحاببات، دەيدى جوبا اۆتورى.
«مىسالى، پاۆيلوننىڭ جارىعى قوسىلىپ نە بولماسا ەلەكتر شاينەگىن قايناتۋ ءۇشىن كەلگەن ادامدار قوزعالىپ، قۋاتىن شىعارۋى كەرەك. وسىلايشا، ادامزات قۋات شىعارۋدىڭ قانداي قيىن ەكەنىن سەزىنە الادى. سوندىقتان، اۆستريا پاۆيلونى قوسىلسىن دەسەڭىزدەر، قازىردەن باستاپ دايىندالىڭىزدار. بىزگە قازاقستان ازاماتتارىنىڭ قۋاتى وتە قاجەت»، - دەيدى ساۋلەتشى.
ەستەرىڭىزگە سالا كەتەيىك، بۇگىن «استانا ەكسپو-2017» ۇلتتىق كومپانياسى اۆستريا رەسپۋبليكاسىنىڭ وكىلدەرىنە ولاردىڭ پاۆيلونىن رەسمي تۇردە تاپسىردى. پاۆيلوننىڭ اۋماعى 870 شارشى مەتر.
اۆتور: كەنجەكەي توقتامۇرات قىزى