استانا پروتسەسى اياسىندا اسكەري ساراپشىلاردىڭ كەڭەسى باستالدى

استانا. قازاقپارات - سيريالىق رەتتەۋ جونىندەگى حالىقارالىق كەزدەسۋ (استانا پروتسەسى) اياسىندا اسكەري ساراپشىلاردىڭ كەڭەسى باستالدى.

بۇل جايىندا قازاقپارات كەلىسسوزدەردى ۇيىمداستىرۋعا قاتىسى بار سەنىمدى دەرەككوزىنە سىلتەمە جاساپ حابارلايدى. «كەلىسسوزدەر بارىسىندا اسكەري ساراپشى دەلەگاتسيالاردىڭ الدىن الا بولجامعا سايكەس، سوعىستى توقتاتۋدى باقىلاۋ تەتىكتەرى بويىنشا كەڭەسى ءجۇرىپ جاتىر»، - دەدى ول كەلىسسوزدەر ءجۇرىپ جاتقان «ريكسوس» قوناق ۇيىندە قازاقپارات تىلشىسىنە. ەلورداداعى «ريكسوس» قوناق ۇيىندە ءوتىپ جاتقان سيريا جانجالىن رەتتەۋ جونىندەگى حالىقارالىق كەزدەسۋگە سيريانىڭ ۇكىمەتتىك دەلەگاتسياسىنان ب ۇ ۇ جانىنداعى وسى ەلدىڭ تۇراقتى وكىلى باسار ال-دجافاري، شامامەن 15 وپپوزيتسيالىق توپتىڭ وكىلى، ر ف پرەزيدەنتىنىڭ سيريالىق رەتتەۋ ماسەلەلەرى جونىندەگى ارناۋلى وكىلى الەكساندر لاۆرەنتيەۆ، تۇركيا سىرتقى ىستەر ءمينيسترنىڭ ورىنباسارى سەدات ونال يران يسلام رەسپۋبليكاسى سىرتقى ىستەر ءمينيسترىنىڭ ورىنباسارى سادەك حۋسەين دجابەري انساري، ب ۇ ۇ باس حاتشىسىنىڭ سيريا جونىندەگى ارناۋلى وكىلى ستاففان دە ميستۋرا مەن قازاقستانداعى ا ق ش ەلشىسى دجورد كرول قاتىسۋدا. ايتا كەتەيىك، كەلىسسوزگە قاتىسۋشى تاراپتار ساعات 14.00-دە استانا پروتسەسىنىڭ ناتيجەلەرىن جاريا ەتۋ ءۇشىن قورىتىندى باسپا ءسوز ءماسليحاتىنا شىعادى دەپ كۇتىلۋدە. كەلىسسوزدەرگە قاتىسۋشىلاردى قابىلداۋشى تاراپ بارلىق دەلەگاتسيا وكىلدەرىنە باسپا ءسوز ءماسليحاتى وتكىزىلەتىن ارنايى زال دايىنداپ قويعان.

ق ر سىرتقى ىستەر مينيسترلىگى وكىلى باق الدىنا كىمنىڭ شىعاتىندىعىن ءدوپ باسىپ ايتا الار ەمەس. دەگەنمەن، ب ۇ ۇ باس حاتشىسىنىڭ سيريا جونىندەگى ارناۋلى ەلشىسى ستاففان دە ميستۋرانىڭ جۋرناليستەرگە بريفينگ وتكىزۋ مۇمكىنشىلىگى جوعارى بولىپ تۇر.

اۆتور: مارلان جيەمباي