بار ماسەلە ماكياجدا ما؟

ماكياج (بەت- مويىنعا ءتۇرلى وپا- دالاپ جاعۋ). راس، قىز - قىلىعىمەن، جاراسىمدى كيىمىمەن جانە make-up جاساي بىلۋىمەن ادەمى. الدىڭعى ەكەۋىن قايدام، مەيك-اپ جاساۋدى ماڭعاز سۇلۋلار ابدەن مەڭگەرىپ العان. مەيلى، ماقاتايەۆتىڭ ءوزى «ادەمىلىك بىزگە كوپتىك ەتپەيدى» دەدى ەمەس پە؟ سۇلۋ بولسىن، سۇلۋلىققا ۇمتىلسىن. ءبىراق كاسىبي بويانا ءبىلۋ نەگە بەلەڭ الىپ كەتتى؟ ءسىرا، بيزنەس كوزى بولعاندىقتان شىعار؟ الدە، بارلىق گاپ - جىگىتتەردە مە؟..
جان دۇنيەنىڭ سۇلۋ بولعانى جەتكىلىكسىز بە؟
وسىدان بىرنەشە جىل بۇرىن عانا كاسىبي مەيك-اپ جاساتۋ ۇلكەن شارۋا ەدى. ءارى وعان مەرەكەلىك كەش سەكىلدى ماڭىزدى سىلتاۋ ءھام سەبەپ كەرەك-ەتىن. قازىر كۇندە جيىن، كۇندە توي. توي بولماسا دا، «كۇندە ادەمى بولىپ ءجۇرۋ كەرەك» دەگەن ۇستانىم. وسىنى باستى نازارعا العان ارۋلار «ءوزىڭ بويانىپ ۇيرەن» سەكىلدى كۋرستارعا جازىلىپ، بەت ارلەۋدىڭ قىر- سىرىن ۇعىپ الادى. كەيبىرى ءوزى ءبىلىپ العان سوڭ، بۇل سالانى بيزنەس ەتەدى. شەتەلدە بيۋتي- يندۋستريا وتە جاقسى دامىعان. ءتىپتى سۇلۋلىق سالونىن اشاتىندار دا - كاسىبي بىلىكتى ماماندار. ال بىزدە ءبىر اتتاساڭ -ءدارىحانا، ەكى اتتاساڭ - سۇلۋلىق سالونى. ەندى ءبىرى ينستاگرامنان پاراقشا اشىپ، تاپسىرىستى ۇيدەن قابىلداپ وتىرا بەرەدى.
كاسىپتىڭ ءدال وسى ءتۇرى بۇگىندە ترەندكە اينالىپ كەلەدى. قىزداردىڭ سۇلۋلىققا جاپپاي بەت بۇرۋىنا بىرنەشە فاكتور اسەر ەتسە كەرەك. ءبىرى - زامان تالابى. «جان دۇنيەسى سۇلۋ بولسا جەتەدى» دەيتىن سابازدارىڭ ءبارىبىر بەت- بەينەگە قاراماي قويمايدى. دەمەك، ءبىرىنشى سىرت كەلبەتىڭ كوز تارتپاسا، جۇرەگىنەن ورىن تابۋىڭ نەعايبىل؟ ءوز- وزىنە قارامايتىن، شاشى ۇيپا- تۇيپا، بەتىنە بەزەۋ قاپتاعان قىز بولساڭىز، «باستىسى جۇرەگىم ادەمى» دەپ جۇرە بەرمەڭىز. جىگىت اتاۋلىسى جيناقىلىقتى جاقسى كورەدى. جاساندىلىققا جول بەرمەي، سۇلۋلىعىڭىزدى ەسەلەۋگە بولادى.
اسەر ەتەتىن كەلەسى فاكتور - تۇرمىستىق احۋال. اقشا ادام بالاسىنا ەشقاشان ارتىق ەتكەن ەمەس. بوس ۋاقىتىندا بىرەۋدى بوياندىرىپ كەلۋ ادامعا دا، وزىنە دە قۋانىش سىيلاي الادى. ياعني، قوسىمشا كاسىپ كوزىنە اينالىپ وتىر.
ۇشىنشىدەن - ءوز- وزىڭە ريزا بولۋ سەزىمى. ۇنەمى ءىلتيپات ەستۋ، قوعام نازارىن «بۇلت اراسىنان شىققان كۇندەي» اۋدارۋدىڭ وزىندىك راقاتى بار. وسىنى ابدەن ءبىلىپ العان بويجەتكەندەر ءتۇرلى كۋرستاردى وقىپ الىپ، ءتىپتى بولماسا ونلاين ۆيدەو- ساباقتار ارقىلى دا ەكى قولعا ءبىر كۇرەك تاۋىپ ءجۇر.
ۆيزاجيستەرگە سۇرانىس ازايدى
2015 -جىلى ەل باسىنا تۇسكەن داعدارىس بيزنەستىڭ بۇل سالاسىنا اسەر ەتپەي قويماعانى انىق. كوپشىلىگى قىزمەتتەر ءۇشىن الاتىن اقىنى ازايتىپ نە ءتۇرلى اكتسيالاردى كوبەيتۋ ارقىلى تۇتىنۋشىلاردى تارتۋعا تىرىسىپ باقتى. باسەكەگە شىداماعاندارى - كەتتى. دەسە دە، داعدارىسقا قاراماستان ەلىمىزدەگى كوسمەتيكا، جەكە باس گيگيەناسى قۇرالدارى مەن سۇلۋلىق سالوندارى ۇسىناتىن قىزمەتتەر نارىعى قارقىندى دامىپ كەلەدى. بۇعان 2016 -جىلعا ارنالعان Euromonitor بولجامىنىڭ ءدال كەلگەنى سەبەپ. ولاردىڭ مالىمەتىنە سۇيەنسەك، وتكەن جىلى بيۋتي- بيزنەستىڭ نارىقتاعى كولەمى 3,9 پايىزعا ۇلعايىپ، 547,23 ملن اقش دوللارىنا جەتكەن. ال 2015-2019 -جىلدار ارالىعىندا ول كولەم تىپتەن 15,8 پايىزعا وسەدى دەگەن بولجام بار. Hollywood سۇلۋلىق ورتالىعىنىڭ نەگىزىن سالۋشى يننا سانيكوۆانىڭ ايتۋىنشا، سوڭعى كەزدەرى ۆيزاجيست قىزمەتىنە جۇگىنەتىندەر سانى ازايعان.
«سالونعا كەلۋشىلەر سانى داعدارىستان كەيىن وزگەردى دەۋگە كەلمەيدى. ءبىراق كەيبىر قىزمەتتەردى تۇتىناتىندار ازايدى. ءارى كليەنتتەر بۇرىن باعاسىنا قاتتى باس قاتىرمايتىن. ال ءقازىر وزىنە ەڭ كەرەك دەگەنىن عانا تاڭدايدى. بىزگە كوبىنە مانيكيۋر، پەديكيۋر جاساتۋعا، شاش قيدىرۋعا، بوياتۋعا، دەپيلياتسيا جاساتۋعا كەلەدى. ال ۆيزاجيستەرگە دەگەن سۇرانىس ازايدى. ەسەسىنە، بەت ارلەۋ كۋرستارىن وقىعىسى كەلەتىندەر سانى ارتتى» دەيدى سانيكوۆا.
نەگە دەكوراتيۆتى كوسمەتيكا وندىرمەيمىز؟
قازاقستانعا سىرتتان كەلەتىن تاۋارلاردىڭ باسىم كوپشىلىگى - كوسمەتيكا. كوبىنە اقش، كورەيا سىندى ەلدەردەن جول تارتادى. ەڭ وكىنىشتىسى - ءبىز تۇتىنۋشى عانا ەكەندىگىمىز. وپا- دالاپ، ءاتىر مەن لاك دەگەندەرىڭىز مۇناي مەن گاز، مەتالل مەن استىقتىڭ اقىسىنا الىنادى. ال نەگىزىندە ەلىمىزدىڭ رەسۋرستىق بازاسى الدەقايدا باي ەمەس پە؟ ءبىزدىڭ تاۋلارىمىزدىڭ بوكتەرىندە وسەتىن ەمدىك شوپتەردىڭ كەرەك دەسەڭىز، وزگە لاندشافتاردان تابا المايمىز. مۇنىڭ بارلىعى ءبىزدىڭ بايلىعىمىزدى دۇرىس يگەرە الماي وتىرعانىمىزدىڭ كورىنىسى. بۇل ءۇشىن شيكىزات باعىتىن وزگەرتۋ كەرەك.
دەگەنمەن ەندى- ەندى كۇش الىپ كەلە جاتقان كاسىپورىندار دا بار. كوسمەتيكا جانە تۇرمىستىق حيميا شىعاراتىن بىرنەشە وتاندىق كومپانيالاردىڭ ونىمدەرىن دۇكەن سورەلەرىنەن كوزىڭىز شالعان دا بولار؟ ماسەلەن، Avrora, Evita, Bioton, Cremative, Mari Mari, «ايساۋلە» دەگەندەردى ەستۋىڭىز بار ما؟ بۇلار مەملەكەتتىك سەرتيفيكاتتاۋدان وتكەن، الىس- جاقىن شەتەلدەرگە جونەلتىلەدى. ءبىراق اتالعان كاسىپورىنداردا كرەم، سۋسابىن، بالزام سەكىلدى ورگانيكالىق كوسمەتيكالار عانا وندىرىلەدى.
ال ءبىز قوزعاپ وتىرعان تاقىرىپ - دەكوراتيۆتى كوسمەتيكا. ياعني، كۇندەلىكتى بويانۋعا قاجەتتى سۇرمە، ەرىنگە جاعاتىن دالاپ، وپا جانە ت. ب. Bioton كومپانياسىنىڭ وكىلى ەلميرا توقتاقىنوۆا مۇنىڭ سەبەبىن بىلايشا تۇسىندىرەدى: «دەكوراتيۆتى كوسمەتيكا شىعارۋ ءۇشىن بولەك زەرتحانالار كەرەك. شيكىزاتتاردىڭ باسىم بولىگى باتىستان ساتىپ الىنادى. سول سەبەپتى بىزدە شىعاراتىن بولساق، باعاسى دا تيىسىنشە جوعارى بولادى. ءارى الپاۋىت ەلدەرمەن باسەكەلەسۋ دە قيىن. كوسمەتيكانىڭ بۇل تۇرىنە مىقتى پيگمەنتتەر مەن كونسەرۆانتتار كەرەكتىگى تاعى بار.
ابىلايحان جۇماشەۆ، قالا تۇرعىنى:
بويانۋ، ساندەنۋ، كۇتىنۋ قىز بالاسىنىڭ سۇيىكتى جۇمىسى. ول ءبىر جاعىنان دۇرىس. كۇتىم كەرەك. ءاربىر قىز بالانىڭ اجارلى بوپ جۇرگەنى كورەر كوزگە ادەمى، ول كىمگە ۇنامايدى دەيسىز؟ ءبىراق قاتتى بويانىپ الاتىن قىزداردى ونشا ۇناتپايمىن. كوشەدە بەتىنە باتپانداي قىلىپ وپا- دالاپ جاعىپ، كوزىن قاتتى بوياپ العان قىزداردى كورىپ، شوشىپ كەتەمىن كەيدە. كەيبىر قىزدارعا جاراسىپ- اق تۇرادى. وندايلار تىم شەكتەن شىقپايدى دا، رەتىن بىلەدى. كۇندەلىكتى ارالاس- قۇرالاس بولىپ جۇرگەن قىزداردى بويانىپ العان كەزدە كورىپ، تانىماي قالاتىن دا كەزدەر بولادى. جالپى، قانداي دۇنيەنى بولماسىن ءوزىنىڭ مولشەرىمەن قولدانعان دۇرىس دەپ ويلايمىن.
گۇلىم رىسقۇل، ۆيزاجيست:
- بەت ارلەۋشى كۋرسىن ءبىتىرىپ، قىزدارعا make-up جاساپ جۇرگەنىمە 2 جىلدان اسا ۋاقىت بولدى. مارال ەرنازار ەسىمدى ۆيزاجيستىڭ كۋرسىن اياقتاۋ ءۇشىن 10 كۇنگە 30 مىڭ تەڭگە تولەدىم. ساندي بەكسىرعا مەن سانيا يلياسوۆانىڭ كۋرسىنا 10 كۇنگە - 100 مىڭ تەڭگە. قاراجات جاعىنان قولجەتىمدى مامان ىزدەگەندىكتەن مارالدى تاڭدادىم. كۇندىزگى، كەشكى، اراب ستيلىندەگى، بانان تارىزدەس جانە Smokey eyes دەپ اتالاتىن ماكياج تۇرلەرىن ۇيرەتەدى. سوڭعى كۇنى ەمتيحان تاپسىرىپ، سەرتيفيكات الاسىڭ.
ول سەرتيفيكات بويىنشا جۇمىسقا ورنالاسۋعا جانە كاسىبي ماكياج جاساۋعا ارنالعان وپا- دالاپتار دۇكەنىنەن جەڭىلدىك الۋعا بولادى. ەندى سەرتيفيكاتتالعان مامان بولعاندىقتان، سوعان سايكەس قۇرال- سايماندارىڭ بولۋى قاجەت. بارلىق كەرەك زاتتارىمدى الۋعا (كەيس، قىلقالامدار مەن كوسمەتيكالار) كەم دەگەندە 100 مىڭ تەڭگە كولەمىندە قاراجات كەتتى. سونىمەن، مەنەن كەتكەن جالپى شىعىن كولەمى - شامامەن، 130 مىڭ تەڭگە. بۇل - پايداسى مول كاسىپ. وسى ۋاقىتقا دەيىن قانشا قىزبەن جۇمىس جاساعانىمدى بىلمەيمىن. الايدا وزىمنەن شىققان شىعىندى از دەگەندە ەكى ەسە قايتارىپ العانىم انىق.
ءتۇيىن:
«بەتىڭە سۋدان باسقانى جاقىنداتپا» دەگەن ءسوزدى ەستىپ وستىك. اجەلەرىمىز بەن انالارىمىز كوسمەتيكا اتاۋلىعا قارسى. ايتسە دە، زامان وزگەردى. مەكتەپ وقۋشىسىنىڭ ءوزى مودەلدەن كەم ەمەس كورىنەتىن كەز تۋىپ وتىر. سوندا ءبىز كىتاپتان وقىعان، سۇلۋلىق تۋرالى سۋرەتتەمەگە لايىق قىزدار قايدا كەتتى؟ ايتايىن دەگەنىمىز، وقۋشى - اق بانتيگىمەن عانا ادەمى. سول سەكىلدى ورتا جاستان اسقاندار دا قاراپايىمدىلىعىمەن سۇلۋ. زاماندى تۇلكى دەپ، ءوزىن تازى ساناعاندار بۇل ءسوزدىڭ استارىن وسىلاي ءتۇسىنىپ جۇرگەندەرىنە ءىشىڭ اشيدى. ايتپەسە، سۇلۋلىقتىڭ شەگى دە، ولشەمى دە - ماكياج ەمەس-ەتىن. قۇلپىرا تۇسەيىك، بويانا بىلەيىك... رەتىمەن!
«ايقىن»