11:45, 22 - قاڭتار 2017 | GMT +6
استانا پروتسەسى: قازاقستانعا سيريا وپپوزيتسياسىنىڭ دەلەگاتسياسى كەلدى
استانا. قازاقپارات - استانا پروتسەسىنە قاتىسۋشىلاردىڭ ساپارى تۋرالى «قازاقپارات» ح ا ا- نىڭ تىلشىسىنە ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ ءمالىم ەتتى.
«وسى ۋاقىتتا ەلىمىزگە رەسەي، تۇركيا، يران ەلدەرى مەن ب ۇ ۇ- نىڭ باس حاتشىسىنىڭ سيريا بويىنشا ارنايى ەلشىسى ستاففان دە ميستۋرا جانە سيريا وپپوزيتسياسىنىڭ وكىلدەرى كەلدى»، - دەپ ناقتىلادى ءانۋار جايناقوۆ.
ول سونىمەن قاتار بۇگىن كەشكە دەيىن ەلىمىزگە سيريا ۇكىمەتى دەلەگاتسياسىنىڭ كەلەتىندىگى تۋرالى ايتتى.
«ا ق ش- تىڭ اتىنان سيريا ماسەلەسى بويىنشا وتەتىن كەلىسسوزدەرگە وسى ەلدىڭ قازاقستانداعى ەلشىسى قاتىسادى»، - دەپ جالعاستىردى جايناقوۆ.
سيريا ماسەلەسى بويىنشا وتەتىن حالىقارالىق كەلىسسوزدەر استانادا 23 -قاڭتار كۇنى باستالادى.
