وڭتۇستىك كورەيانىڭ مادەنيەت ءمينيسترى قاماۋعا الىندى

استانا. قازاقپارات- وڭتۇستىك كورەيانىڭ مادەنيەت ءمينيسترى قاماۋعا الىنىپ، جەمقورلىق داۋىنا بايلانىستى وتستاۆكاعا كەتۋگە ءوتىنىش بەردى، - دەپ حابارلايدى ر ي ا نوۆوستي.

 چو يۋن سۋن تەرگەۋشىلەردىڭ ارنايى كوميسسياسى وتكىزگەن سۇراۋدان كەيىن قاماۋعا الىنعان.

 چو يۋن سۋنكەگە پرەزيدەنت پاك كىن حەنىڭ بيلىگىنە قارسى ونەر قايراتكەرلەرىنىڭ «قارا ءتىزىمىن» جاسادى دەگەن كۇدىك كەلگەن.

سونىمەن قاتار، سوت پرەزيدەنت اكىمشىلىگىنىڭ بۇرىنعى باسشىسىن قاماۋعا الۋ تۋرالى شەشىم شىعاردى. ايتا كەتەيىك، چو يۋن سۋن - قىزمەتتىك مىندەتتەرىن اتقارىپ جاتقان كەزدە ۇستالعان العاشقى مينيستر.

وتكەن جىلدىڭ كۇزىنەن باستاپ وڭتۇستىك كورەيادا سوي سۋن سيلدىڭ - پرەزيدەنتتىڭ قۇربىسىنا قاتىستى جەمقورلىق داۋى تۋىنداعان ەدى. قۇقىق قورعاۋ ورگاندارىنداعىلار ونى ەشقانداي مەملەكەتتىك قىزمەتتە بولماۋىنا قاراماستان، پرەزيدەنتتىڭ ساياسي شەشىمدەردى قابىلداۋىنا اسەر ەتتى دەگەن كۇدىك كەلتىرگەن.

ەسكە سالا كەتەيىك، 2016 -جىلدىڭ 9- جەلتوقسانىندا وڭتۇستىك كورەيا پرەزيدەنتىنە يمپيچمەنت جاريالانعان بولاتىن. قازىر مەملەكەت باسشىسى قىزمەتىن پرەمەر- مينيستر حۆان گە ان اتقارىپ جاتىر. قازىرگى ۋاقىتتا كونستيتۋتسيالىق سوت پرەزيدەنتكە جاريالانعان يمپيچمەنتتىڭ قۇزىرەتتىلىگىنە قاتىستى ماسەلەلەردى شەشىپ جاتىر. ەگەر دە وسى شەشىم قابىلداناتىن بولسا، ەلدە ەكى اي ارالىعىندا سايلاۋ وتەدى.

kaz.tengrinews.kz