گامبيانىڭ بۇرىنعى پرەزيدەنتى بيلىكتى بەيبىت جولمەن بەردى

استانا. قازاقپارات - يايا دجاممە اداما بارروۋ سايلاۋدا جەڭىلىس تاپسا دا، تاقتى جاڭا باسشىعا بەرمەي وتىرعان گامبيانىڭ بۇرىنعى پرەزيدەنتى يايا دجاممە بيلىكتەن كەتۋگە كەلىستى.

 جەرگىلىكتى تەلەارنا ارقىلى ول ۇلى حالىقتىڭ جەتەكشىسى بولۋدان ءوز ەركىمەن باس تارتۋعا شەشىم قابىلداعانىن مالىمدەگەن. بۇعان دەيىن جاڭادان سايلانعان پرەزيدەنتتىڭ كەڭەسشىسى ماي احماد فاتي يايا دجاممەنىڭ بيلىكتى بوساتىپ، ەلدەن كەتەتىنىن حابارلاعان بولاتىن.

ەسكە سالايىق، گامبيانى 1994 -جىلدان بەرى باسقارىپ كەلگەن پرەزيدەنت بىلتىر جەلتوقسانداعى پرەزيدەنتتىك سايلاۋدا جەڭىلىس تاپتى. دەگەنمەن ساياسي شارا قورىتىندىسىن مويىندامايتىنىن ايتىپ، سوتقا ونى قايتا قاراۋ تۋرالى پەتيتسيا جولداعان. ال جاڭادان سايلانعان باسشى اداما بارروۋ 19 - قاڭتاردان باستاپ پرەزيدەنتتىك قىزمەتكە كىرىسۋى ءتيىس ەدى. ساياسي داعدارىسقا بايلانىستى ونى ۇلىقتاۋ ءراسىمى كورشىلەس سەنەگالداعى گامبيا ەلشىلىگىندە وتكەن.

 يايا دجاممە، گامبيانىڭ بۇرىنعى پرەزيدەنتى:

 - ەلىمدە قانتوگىس بولعانىن قالامايمىن. سوندىقتان قارسىلىقسىز بيلىكتەن كەتۋگە شەشىم قابىلدادىم. بيلىكتە بولعان 22 جىل ىشىندە گامبيانى قالىپتاستىرۋ جولىندا قولداۋ كورسەتكەن حالقىما، دوستارىما، جالپى بارلىعىنا العىسىم شەكسىز.

اداما بارروۋ، گامبيانىڭ جاڭا پرەزيدەنتى:

 - ساياسي تۇراقسىزدىققا بايلانىستى ەلدەن كەتۋگە ءماجبۇر بولعانداردىڭ بارلىعىن وتانعا ورالۋعا شاقىرامىن. گامبياداعى جاعدايدى وڭالتۋ ءۇشىن ەسكى زاڭدارعا وزگەرىستەر ەنگىزۋ كەرەك. ەلگە ورالىپ، ءومىردى جاڭادان باستاڭىزدار. مەملەكەتتى جاڭا باعىتتا دامىتۋ كەرەك.

www.24.kz