ەڭ كوپ تابىس الىپ كەلگەن قازاقستاندىق فيلمدەردىڭ ءتىزىمى جاريالاندى

استانا. قازاقپارات - ق ر مادەنيەت جانە سپورت مينيسترلىگى نارىقتا سۇرانىسقا يە، ءوزىنىڭ ماتەريالدىق جانە ماتەريالدىق ەمەس ديۆيدەنتتەرىن اكەلە باستاعان تابىستى قازاقستاندىق فيلمدەر ءتىزىمىن جاريالادى،

 دەپ حابارلايدى «قازاقپارات» ح ا ا ءتىلشىسى.

«28 پانفيلوۆشى» فيلمى بۇل وتكەن جىلعى رەسەيلىك جانە قازاقستاندىق پروكاتتىڭ كوشباسشىسى. ر ف مادەنيەت مينيسترلىگى مەن ق ر مادەنيەت جانە سپورت مينيسترلىگىنىڭ قولداۋىمەن تۇسىرىلگەن كينوكارتينا پروكاتتىڭ ستاندارتتى مەرزىمدەرىن بۇزىپ، ءبىر اي بويى كورسەتىلدى.

كاسسالىق تۇسىمدەر بارلىق ءوندىرىس شىعىندارىن وتەۋگە مۇمكىندىك بەردى. قازاقستانداعى كاسسالىق ءتۇسىم 61, 3 ميلليون تەڭگە (11,2 ميلليون رۋبل) جيناعان. كينو قورىنىڭ حابارلاۋىنشا، رەسەيدەگى كاسسالىق ءتۇسىم 361 ميلليون رۋبلدى (1,96 ميلليارد تەڭگە) قۇراعان. ەندىگى قادام حالىقارالىق كينونارىققا شىعۋ، اسىرەسە قىتاي حالقى فيلمگە اسا قىزىعۋشىلىق تانىتىپ وتىر.

 رەجيسسەر سەرگەي سنەجكين تۇسىرگەن «كوشباسشى جولى» - «جۇلدىزدار توعىسقاندا» فيلمىن دە تابىستى جوبالاردىڭ ءبىرى دەپ اتاۋعا بولادى.

 فيلمنىڭ پرەمەرالىق كورسەتىلىمى فرانسيا، رەسەي، قىتاي، گرەكيا جانە گونكونگتا ءوتتى. تەلەۆيزيالىق پروكاتپەن رەسەيلىك «دوم كينو»، «مير 24» ارنالارىندا جانە گرۋزيا، ارمەنيا، ازەربايجان، وزبەكستان، تاجىكستان، قىرعىزستان، تۇركمەنستاندى قامتيتىن «پەرۆىي كانال. ۆرەميا» بۇكىلالەمدىك جەلىسىندە كورسەتىلدى. پولشا، بەلارۋس، ۋكراينا جانە ت م د ەلدەرىندە كورسەتۋ جوسپارلانعان.

جالپى ۇلتتىق پروكات كوشباسشىلارىنىڭ ۇزدىك بەستىگىنە اقان ساتايەۆتىڭ «اناعا اپارار جول» كارتيناسى ەندى. فيلم پروكاتتا رەكوردتى ەكى اي ءجۇردى جانە كورەرمەننىڭ ىستىق ىقىلاسىنا بولەندى. يالتاداعى «ەۋرازيالىق كوپىر» كينوفەستيۆالىنىڭ گران- پري يەگەرى اتاندى. وتكەن جىلدىڭ قازان ايىندا كارتينا لوس- اندجەلەستە كورسەتىلىپ، باتىس باسپا ءسوزى مەن جەرگىلىكتى قاۋىمنىڭ ۇلكەن قىزىعۋشىلىعىن تۋدىردى.

 العاش رەت ادەبيەت پەن ونەر سالاسىنداعى قازاقستاننىڭ مەملەكەتتىك سىيلىعى دوسحان جولجاقسىنوۆتىڭ «قۇنانباي» كوركەم فيلمىنە بەرىلدى. فيلم ەۋرازيا حالىقارالىق كينوفەستيۆالىندە ورتالىق ازيانىڭ ۇزدىك فيلمى دەپ تانىلدى.

ساتىبالدى نارىمبەتوۆتىڭ «امانات» كارتيناسى «وسكار» جۇلدەسىنىڭ «شەت تىلىندەگى ۇزدىك فيلم» نوميناتسياسىنا ۇمىتكەرلەر تىزىمىنە ەندى.

وڭتۇستىك كورەيادا 20- پۋسان حالىقارالىق فەستيۆالىنىڭ (2015 ج.) «جاڭا اعىم» بولىمىندە ەرلان نۇرمۇحامبەتوۆتىڭ «جاڭعاق تال» فيلمى باس جۇلدەنى جەڭىپ الدى.

بيىل «وسكار» جۇلدەسىن العان رەجيسسەر ەدوم دجونس پەن گولليۆۋدتىك كەري گرانات «امىرە» فيلمىن ۇسىنعالى وتىر. رۇستەم ابدىراشيەۆتىڭ «الماس قىلىشى» («قازاق ەلى» سەريالىنىڭ كينونۇسقاسى) قازاقستان تاۋەلسىزدىگىنىڭ 25 جىلدىعىنا ەڭ ۇلكەن تارتۋ بولدى. كارتينا ەلىمىزدىڭ بارشا كينوتەاترلارىندا كورسەتىلىپ جاتىر جانە قازاقستاندىق كورەرمەندەردىڭ جوعارعى باعاسىنا يە بولدى.