استانا پروتسەسى نازاربايەۆقا نوبەل سىيلىعىنا جول اشۋى مۇمكىن - رەسەيلىك ساياساتتانۋشى

استانا. قازاقپارات - رەسەيلىك ساياساتتانۋشى اندرەي كازانسەۆتىڭ ويىنشا، استانا پروتسەسى سيريا ماسەلەسىن رەتتەۋگە ىقپال جاساي السا، نۇرسۇلتان نازاربايەۆتى بەيبىتشىلىك ءۇشىن نوبەل سىيلىعىنا ۇسىنۋعا ابدەن بولادى، دەپ حابارلايدى قازاقپارات ءتىلشىسى.

«قازاقستان ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ۇلكەن مىندەتتى موينىنا الىپ وتىر. ونىڭ سيريا ماسەلەسىن رەتتەۋگە دەگەن قۇلشىنىسى ءوز ناتيجەسىن بەرۋى دە مۇمكىن. الايدا، ول جاقتاعى جاعداي وتە قيىن بولىپ تۇر. سەبەبى سيرياداعى شيەلەنىسكە ءبىر ەمەس، بىرنەشە مەملەكەتتىڭ قاتىسى بار. سوندىقتان ونى رەتتەگەننەن بۇرىن، ۋشىقتىرا تۇسپەۋ اسا ماڭىزدى. ول ءۇشىن قىرۋار ديپلوماتيالىق كۇش- جىگەر كەرەك. وسى ورايدا، ۇلكەن ديپلوماتيالىق دارىنى بار ساياساتكەرىمىز - نۇرسۇلتان نازاربايەۆتىڭ بار ەكەنىن ەرەكشە اتاپ وتكەن ءجون. ول ءوزىنىڭ ەڭبەك جولىندا سىرتقى ساياسات جاعىنان ءالى بىردە- ءبىر رەت قاتەلەسكەن جوق. ونىڭ باستى ارتىقشىلىعى سول، ول كەز كەلگەن جاعدايدا دۇرىس بالانس تابا الادى، قاراما- قايشى مۇددەلەر توعىسىندا تەپە- تەڭدىكتى ساقتاي بىلەدى. سول سەبەپتى نۇرسۇلتان نازاربايەۆ الەمدىك ساياسات دەڭگەيىندە ءوز قارىم- قابىلەتىن تاعى ءبىر مارتە كورسەتۋگە مۇمكىندىك الدى»، - دەدى كازانتسيەۆ بۇگىن قازاقستان ستراتەگيالىق زەرتتەۋلەر ينستيتۋتىندا وتكەن جيىندا.

بەينەبايلانىس ارقىلى شىققان ساياساتتانۋشىنىڭ پىكىرىنشە، قازاقستان ءدال وسى سيريا ماسەلەسىن رەتتەۋ بويىنشا ناقتى ءبىر ناتيجەگە قول جەتكىزە السا، نۇرسۇلتان نازاربايەۆتى بەيبىتشىلىك ءۇشىن نوبەل سىيلىعىنان ۇمىتكەرلەردىڭ قاتارىنا قوسۋعا ابدەن بولادى.

ايتا كەتەيىك، قاڭتاردىڭ 23- كۇنى استانادا سيريا داعدارىسىنا قاتىستى بەيبىت كەلىسسوزدەردى (استانا پروتسەسى) وتكىزۋ جوسپارلانعان.

اۆتور: ارمان اسقاروۆ