التى جاسار الپامىستىڭ ەرلىگى

اجەسى كەلە المايتىن كەزدە بالالاردى وسى بويجەتكەنگە سەنىپ تاپسىرادى. باسقا امالى جوق. وعان اقشانى از تولەيدى. جۇمىستان ايىرىلىپ قالۋعا بولمايدى. بالا- شاعانى اسىراۋ كەرەك. جاس كۇتۋشى تۇسكى استان كەيىن بالالاردى ۇيىقتاتتى. سول كەزدە جىگىتى حابارلاستى. جاڭا كولىگىمەن سەرۋەندەپ قايتۋعا ۇسىنىس جاسادى. ادەتتە بالالار بەسكە دەيىن ويانبايتىن ەدى. بويجەتكەن ەش ويلانباستان جاتىن بولمەنىڭ ەسىگىن سىرتىنان قۇلىپتادى. ويانىپ، ءوزىن ىزدەپ قالماسىن دەگەن ويى. انالارىنا حابارلاسپاسىن دەپ تەلەفون سىمىن دا سۋىرىپ تاستادى. ماشينەنىڭ بيپىلىن ەستىپ، سومكەسىن الا سالا سىرتقا جۇگىردى. نە بولعانى بەلگىسىز. قوسىلىپ تۇرعان تەلەديدار ما، جانىپ تۇرعان شىراعدان با، كاميننەن شوق ءتۇستى مە، بەلگىسىز، ءۇيدىڭ ءىشى لاۋلاي باستادى. ءتۇتىن جاتىن بولمەگە دە جەتىپ قالدى. التى جاسار الپامىس ءتۇتىننىڭ يىسىنەن ويانىپ كەتتى. ەسىكتى اشايىن دەسە اشىلمادى. ايعايلاپ، كۇتۋشى اپايىن شاقىردى. ءبىراق ول كەلمەدى. دەرەۋ اناسىنا قوڭىراۋ شالماق بولىپ تەلەفونعا جارماستى. ءوشىپ تۇر. ول ەندى تەك وزىنە سەنۋ كەرەكتىگىن ءبىلدى. دەرەۋ تەرەزەگە جۇگىردى. كىشكەنتاي ساۋساقتارىمەن بۇرانداسىن اشا المادى. ار جاعىندا بالالار قۇلاپ كەتپەسىن دەپ اتا- اناسىنىڭ جاساتقان تەمىر تورى كورىندى.
ءورت سوندىرۋشىلەر كەلىپ وتتى وشىرگەندە، كورشى قولاڭ جينالىپ قالدى. التى جاسار الپامىستىڭ قالاي دالاعا شىعىپ ۇلگەرگەنىن ايتىپ، جاعالارىن ۇستاستى. جينالعان جۇرت كىپ- كىشكەنتاي بالانىڭ تەرەزەنى ورىندىقپەن شاعىپ، تەمىر توردى كيىم ىلگىشپەن سىندىرعانىنا تاڭ قالىستى. ءبىر جاستاعى بوبەگىن ريۋكزاكقا سالىپ، ونى ارقاسىنا ءىلىپ، ەكىنشى قاباتتاعى تەرەزە جاقتاۋىنا سۇيەنىپ، ءۇي ىرگەسىندەگى اعاشپەن قالاي قورىقپاي جەرگە تۇسكەنىنە باس شايقاستى. مۇنداي سالماققا بالا قالاي شىداس بەردى؟ ءورت سوندىرۋشىلەردىڭ قارت باستىعى ويلى كوزىمەن جان- جاعىنا قاراپ تۇردى دا، جۇرت ىزدەگەن ساۋالدارعا قاراپايىم جاۋاپ بەردى. - الپامىس جالعىز قالدى.. . وعان ەشكىم «سەن مۇنى ىستەي المايسىڭ» دەمەدى.. .
Massaget.kz