فينليانديادا سۋرەتشى ايۋدىڭ كورمەسى اشىلدى - فوتو

استانا. قازاقپارات - فينليانديانىڭ استاناسى حەلسينكيدە يۋۋسو اتتى سۋرەتشى ايۋدىڭ كورمەسى اشىلدى.

فينليانديانىڭ سولتۇستىگىندەگى كۋۋسامو جانۋارلار ورتالىعىن مەكەن ەتەتىن 17 جاسار قوڭىر ايۋدىڭ سالماعى 423 كەلى. ول الدىڭعى اياقتارىمەن دە، بوياۋ جاققىشپەن دە سۋرەت سالادى ەكەن.

ورتالىق قىزمەتكەرلەرى: «ءبىز تەك وعان فانەردى، بوياۋ مەن قاعازدى قالدىرىپ كەتەمىز. ارنايى بەرىپ، سۋرەت سالۋدى بۇيىرساق ول ەشتەڭە سالمايدى. جالعىز ءوزى قالعاندا عانا اياقتارىمەن سۋرەت سالادى» - دەيدى.

قىزمەتكەرلەر بوياۋلاردىڭ ايۋدىڭ دەنساۋلىعىنا زيانسىز ەكەنىن دە اتاپ وتكەن.

 

كۇنى بۇگىنگە دەيىن جانۋارلار ورتالىعى يۋۋسونىڭ 15 كارتيناسىن ساتىپ، 8000 ەۋرو قارجى ءتۇسىرىپتى. قازىر حەلسينكيدەگى كورمەگە ايۋدىڭ 11 ءتۇپنۇسقا جۇمىسى مەن ءبىرقاتار باسپادان شىققان تۋىندىلارى قويىلعان. باعالارى 50 ەۋرودان 4000 ەۋروعا دەيىن. ورتالىق باسشىلىعى كورمەدەن تۇسكەن قاراجاتقا ايۋلار تۋرالى دەرەكتى فيلم ءتۇسىرۋدى جوسپارلاپ وتىر.

 

دەرەككوز: www.reuters.com