22:03, 17 - قاڭتار 2017 | GMT +5
اۆستراليادا تىشقاندار قاپتاپ، ەگىنگە قاۋىپ ءتوندى
استانا. قازاقپارات - اۋا رايىنىڭ قولايلى جانە ەگىننىڭ بىتىك ءوسۋى اۆستراليانىڭ استىق تۇقىمداستاردى وسىرەتىن اۋداندارىندا تىشقاندار تارالىمىنىڭ كۇرت وسۋىنە جول اشتى، دەپ ەسكەرتەدى عالىمدار.

ەلدىڭ عىلىمي جانە قولدانبالى زەرتتەۋلەر مەملەكەتتىك بىرلەستىگىنىڭ دەرەگىنە سۇيەنسەك، ۆيكتوريا مەن وڭتۇستىك اۆستراليا شتاتتارىندا بيىل تىشقاندار سانى اس كوپ بولىپ وتىر.
ەگەر ءبىر گەكتارعا 1 مىڭنان استام كەمىرگىشتەن كەلەتىن بولسا، وندا قاۋىپ دەڭگەيى جوعارى بولماق. گەكتارىنا بەس تىشقان ساي كەلسە ول قالىپتى بولىپ سانالادى، دەپ حابارلايدى BBC. ەگەر كەمىرگىشتەردىڭ تاماعى جەتەرلىك بولسا، جاقىن ايلاردا ولاردىڭ سانى ءقاۋىپتى دەڭگەيگە دەيىن كوبەيۋى مۇمكىن، دەپ ەسكەرتەدى عالىمدار.
تىشقانداردى اۆسترالياعا ەۋروپالىقتار الىپ كەلگەن. مۇندا ولاردىڭ تابيعي جاۋلارى بولماعاندىقتان، سانى كۇرت وسۋدە.