ءلايلا سۇلتان قىزى: مەن توقال ەمەسپىن، جۇبايىمنىڭ زاڭدى ايەلىمىن
بۇل تۋرالى سۇلتان قىزى L'officiel سايتىنداعى ءوزىنىڭ جەكە بلوگىندا جازدى.
«مەنىڭ اجەم اتامنىڭ ءۇشىنشى نە ءتورتىنشى ايەلى بولاتىن. ءبىز «نەگە؟» دەپ سۇراعاندا، انامىز ول زاماندا ەرلەر سانىنىڭ وتە از بولعانىن، فرونتتان تەك بىرەن-ساران ەركەكتەردىڭ قايتىپ كەلگەنىن ايتقان ەدى. كەز كەلگەن ەر ازاماتتىڭ «قۇنى» جوعارى بولدى - ول اقساق، ءبىر كوزى نە ءبىر قولى جوق بولسا دا»، - دەپ جازادى ءلايلا سۇلتان قىزى.
ول توقال الۋ كەزىندە قالىپتى نارسە بولعانىن، ول زاماندا كوپشىلىكتىڭ بۇل ۇعىمعا دۇرىس قاراعانىن جەتكىزدى.
«توقال (كىشى ايەل) قوعام رەسمي تۇردە مويىنداعان، وتباسى مۇشەلەرىنىڭ بارلىعى سىيلايتىن، دۇنيەگە بالا اكەلىپ، ولاردى تاربيەلەيتىن، كەيدە باسقا ايەلدەرىمەن بىرگە، ال كەيدە بولەك ءومىر سۇرەتىن ايەل بولعان. ءيا، مۇمكىن ول كەزدە قازاقتىڭ ايەلدەرى الەۋمەتتىك جاعىنان بەلسەندى بولماعان شىعار، كوبىنەسە ءۇي شارۋاسىمەن، بالامەن اينالىستى، ەرىنە كوبىرەك باعىندى، ءبىراق ەرلەرى ولاردى پايدالانىپ تاستاپ كەتكەن جوق قوي. قازاق دالاسىندا «جالعىزباستى انا»، «جەسىر»، «بالالار ءۇيى»، «قارتتار ءۇيى» دەگەن ۇعىم بولماعان»، - دەپ ءتۇسىندىردى سۇلتان قىزى.
ودان كەيىن تەلەجۇرگىزۋشى «زاماناۋي» توقال ۇعىمىنا انىقتاما بەردى.
«بۇگىندە توقال - وتباسى قامالىنان سىرت جاقتا قۇرىلاتىن قۇپيا. ادەتتە توقال وزىنەن ءبىرشاما جاس ۇلكەن ەر اداممەن كوڭىل قوسقان جاس قىز. اينۇر يسينانىڭ ارقاسىندا «توقال» تۇسىنىگى بۇگىنگى جاعىمسىز سيپاتىنا يە بولدى»، - دەپ جالعادى ءسوزىن تەلەجۇرگىزۋشى.
ءسوز سوڭىندا ءلايلا سۇلتان قىزى ءوزىن توقال دەپ اتايتىندارعا نازىن جەتكىزدى. ول رەسمي تۇردە جۇبايىنىڭ توقالى ەمەس، زاڭدى ايەلى ەكەنىن ءمالىم ەتتى.
«ال ءبىز وزگەرۋ، بەيىمدەلۋ زامانىندا ءومىر ءسۇرىپ جاتىرمىز. بۇرىنعىداي كوشپەلى قازاق ەمەسپىز. الەمدىك مادەنيەتتەردىڭ ىقپالى جاڭا ۇلتتى قالىپتاستىرۋدا. ازىرگە ول قولىمىزدان جاقسى كەلىپ جاتقان جوق. ءبىز ءوزىمىز ءۇشىن ماڭىزدى سالت-داستۇرلەرىمىزدى جوعالتىپ بارامىز. ءبىزدىڭ وتباسى ينستيتۋتىمىز داعدارىسقا ۇشىرادى. ءبىر وتباسىمىز بار ما الدە ەكەۋ مە - ماڭىزدى ەمەس، باستىسى وتباسى مۇشەلەرىنىڭ باقىتتى بولۋى (بىرلىگى جوق ۇيدە بەرەكە بولمايدى). ەگەر قاراپايىم وتباسىندا باقىتتى بولا الماساق، ءبىزدىڭ جەتىستىكتەرىمىز بەن ەكونوميكالىق ءوسۋىمىز كىمگە كەرەك؟ بۇل ورايدا مەن، ءلايلا سۇلتان قىزى، ءوزىمدى قازاقستانداعى ەڭ تانىمال توقالداردىڭ تىزىمىنەن كورگەندىكتەن، جۇبايىمنىڭ زاڭدى ايەلى ەكەنىمدى مالىمدەيمىن»، - دەپ تۇيىندەدى ول.
