الماتىعا ۋنيۆەرسيادانىڭ العاشقى قاتىسۋشىلارى قىتايدان كەلەدى

الماتى. قازاقپارات - ۋنيۆەرسيادانىڭ ءبىرىنشى قوناقتارى 24 -قاڭتار كۇنى كەلەدى. ول قىتاي دەلەگاتسياسى بولماق.

بۇل تۋرالى 28 بۇكىل الەمدىك قىسقى ۋنيۆەرسياداعا دايىندالۋ جانە وتكىزۋ جونىندەگى ديرەكسيا ديرەكتورى نايل نۇروۆ ب ا ق- پەن كەزدەسۋدە ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ ءبىرىنشى قوناقتارىمىز 24 -قاڭتار كۇنى كەلەدى. ول 60 ادامنان تۇراتىن قىتاي دەلەگاتسياسى. ودان كەيىن، بىرنەشە ساعاتتان سوڭ كانادا حوككەيشىلەرى كەلەدى. 26-29 -قاڭتاردا قوناقتاردىڭ دەنى كەلەدى، بۇل كۇندەرى اۋەجايدا وتە تىعىز جۇمىس بولادى»، - دەدى ن. نۇروۆ.

سونىمەن قاتار ول بۇگىنگى تاڭدا بارلىق نىساندار 90 پايىزعا دايىن ەكەنىن ايتتى.

«20 -قاڭتار كۇنى ديرەكتسيا بارلىق عيماراتتى قالا اكىمىنە تاپسىرادى. وندا نىساندار ابدەن جابدىقتالىپ، جاراقتالعان كۇيدە بولادى. بۇگىندە ءبىز ۋنيۆەرسياداعا تولىعىمەن دايىنبىز دەپ ايتا الامىز»، - دەدى ن. نۇروۆ.

اۆتور: الماس مۇقاش ۇلى