كولىك اپاتىنان ادامداردى قۇتقارۋدا ەرلىكپەن قازا تاپقان قۇماربەك جاكەتايعا «باتىل جۇرەك» سىيلىعى بەرىلدى

استانا. قازاقپارات - «حالىق سۇيىكتىسى» ۇلتتىق سىيلىعى اياسىندا تاعايىندالعان «باتىل جۇرەك» سىيلىعى استانا- بۋراباي تاس جولىندا بولعان كولىك اپاتى كەزىندە ادامداردى قۇتقارىپ ءجۇرىپ، ەرلىكپەن قازا تاپقان قۇماربەك جاكەتايعا بەرىلدى.

 اتالمىش سىيلىق بۇگىن استانادا ونىڭ تۋىستارىنا تابىس ەتىلدى. قۇماربەك جاكەتاي - شىندىعىندا بەيبىت كۇننىڭ باتىرى. ول جانتۇرشىگەرلىك اپاتتا ادامداردى قۇتقارۋ جولىندا جانىن پيدا ەتتى.

«حالىقتىڭ سۇيىكتىسى» قوعامدىق سىيلىعىنىڭ ۇيىمداستىرۋشىلارى مەن ءادىلقازىلارى «باتىل جۇرەك» قۇرمەتتى سىيلىعىن ەرەن ەرلىگى ءۇشىن قۇماربەك جاكەتاي ۇلىنا بەرۋدى دۇرىس دەپ شەشتى.

 «قۇماربەك جاكەتاي جۇرەگى باتىل ادام رەتىندە حالىق ەسىندە ماڭگى قالدى جانە وسى مۇسىنشەنى ءبىز ونىڭ بالاسى نۇربولاتقا تابىستاۋدى ءجون كوردىك»، دەدى ۇلتتىق سىيلىقتىڭ جۇرگىزۋشىسى دينارا ءساتجان. ءوز كەزەگىندە، باتىردىڭ ۇلى نۇربولات اكەنىڭ جانقيارلىعى حالىقتىڭ ۇلكەن باعاسىنا يە بولعانىنا رازى ەكەنىن جەتكىزدى.

ەسكە سالساق، 4 - جەلتوقساندا كوكشەتاۋ تاس جولىندا جانتۇرشىگەرلىك اپاتتا ءۇش جاسار بالا قۇتقارىلدى. كۋاگەرلەر قۇماربەك جاكەتاي ۇلىنىڭ ساۋ- تامتىعى قالماعان كولىك ىشىنەن كىشكەنتاي بالانى امان الىپ شىققانىن ايتادى. ودان كەيىن ارتقى ورىندىقتا وتىرعان قىز بالانى قۇتقارۋعا ۇمتىلعان ول ارت جاقتان قاتتى جىلدامدىقپەن كەلىپ سوعىلعان اۆتوبۋستىڭ استىندا قالعان. الەۋمەتتىك جەلىلەردە قازاقستان حالقى مارقۇمنىڭ وتباسىنا كومەك كورسەتۋ اكسياسىن ۇيىمداستىردى. ودان بولەك «قازاقپارات» ح ا ا اقمولا وبلىسىندا بولعان اپات جايلى تولىققاندى ماقالا جاريالاعان ەدى. قۇماربەك جاكەتاي ۇلى بۋراباي اۋدانى جاڭاجول اۋىلىنىڭ تۇرعىنى. 1991 -جىلى موڭعوليادان اتامەكەنگە ورالعان. ارتىندا ءۇش بالاسى، جارى قالدى. ول ءومىرىنىڭ سوڭعى ساتىندە قارشاداي بالانى امان الىپ الۋعا كومەكتەسىپ، ورىمدەي جاس قىزدى قۇتقارىپ قالدى. ەكى جاستىڭ ءومىرى ءۇشىن ءوز جانىن پيدا ەتتى.

 اۆتور: جاسۇلان جولدىبايەۆ