بەكبولات تىلەۋحان «ءناپسىنىڭ قۇربانى بولدى» دەگەن ايىپقا جاۋاپ بەردى
Baq.kz ءتىلشىسى وسىعان قاتىستى بەكبولات تىلەۋحاننىڭ ويىن سۇرادى، ءارى شىعارماشىلىق كەشى قالاي وتەتىنىن ءبىلدى.
«بەكبولاتتىڭ ءدۇيىم جۇرتتى جيناپ، ەسترادامەن كونسەرت بەرۋى قانشا ءتاۋھيدشىل دەسەك تە، اقىلعا قونىمسىز ەكەنى راس. ۇلتتىق فولكلور دەپ، دومبىراسىن قۇشاقتاپ ءبىراز ءجۇردى دە، مىنە ەندى، قانشا دەگەنمەن ءناپسىسىنىڭ دەڭگەيىن كورسەتىپ تىندى. ءجۇز جەردەن اقتاساق تا، شاريعات تۇگىلى اتا-بابام بۇلاي باتىستىڭ داڭعازا- ەستراداسىمەن «كونسەرت» قويماعان ەدى... ءبىر اللاھقا قۇلشىلىق ەتىپ-اق جۇرگەن شىعار. دەگەنمەن جەمە-جەمگە كەلگەندە ءناپسىسىنىڭ قۇربانى بولعانى وكىنىشتى- اق»، - دەپ جازعان ەدى تالعات رىسقۇلبەك الەۋمەتتىك جەلىدەگى جەكە پاراقشاسىندا.
بەكبولات تىلەۋحان ءوزىن سىنايتىن ادامنىڭ كوپ ەكەنىن ايتىپ، نەلىكتەن ەسترادانى قوسىپ جاتقانىن ءتۇسىندىردى.
«مەنى سىنامايتىن ادام جوق. ولاردىڭ ءوز ويى. ولاردىكى دە، مەنىكى دە دۇرىس. ەسترادا دەگەندە، مەن تاقىرىپتىق سياقتى ەسترادامەن ايتايىن دەپ جاتقان جوقپىن. كەيبىر نارسەنى جاستارعا جەتكىزۋدىڭ باسقا ءبىر جولىن كورىپ وتىرعان جوقپىن. بىلايشا قۇر دومبىرامەن ايتقاندى كەيبىر ادامدار قابىلداي المايدى. مەنىڭ ماقساتىم بىرەۋ-اق - بابالاردان قالعان مۇرانى قالاي دا تىڭداۋشىنىڭ قۇلاعىنا جەتكىزۋ. ال بۇل ءۇشىن مەن كەز كەلگەن تاسىلگە بارۋعا دايىنمىن. ءارى «ەلىم مەنىڭ» ەڭ ءبىرىنشى ەسترادامەن شىققان ءان. حالىق ءانىنىڭ نەگىزىندەگى ءان ەسترادا ارقىلى بۇكىل جاستارعا تارادى. انەۋكۇنى قۋات دەگەن ءىنىم چەمپيون بولعان كەزدە ماسكەۋدە «ەلىم مەنىڭدى» ورىنداپ جاتىر عوي. دومبىرامەن ورىنداعان جاعدايدا ەلدىڭ ءبارىنىڭ قۇلاعىنا جەتەتىنىنە كۇمانىم بار. ەسترادامەن ورىنداعاننىڭ ارقاسىندا جالپى بۇقاراعا جەتىمدى بولدى. سوندىقتان كەيبىر نارسەنى ەسترادامەن ورىنداۋعا ءماجبۇر بولىپ وتىرمىز»، - دەيدى ب. تىلەۋحان.
بەكبولات تىلەۋحان 2014 -جىلدان بەرى جەكە كونسەرت بەرمەگەنىن ايتادى. جاڭالىققا تولى بولاتىن وسى جولعى «ەلىم مەنىڭ» شىعارماشىلىق كەشى ءتورت بولىمنەن تۇرماق. اسىرەسە، جىرشى جىراۋلاردىڭ مۇراسىنا ۇلكەن كوڭىل بولمەكشى.
«بۇل جەردە تەك ءان عانا ەمەس قوي، جىراۋلار مۇراسىن ەلگە جەتكىزەيىن دەپ ەدىم. جىراۋلار تەك ونەر ادامى عانا ەمەس، سول كەزدەگى ساحارانىڭ ىقپالدى تۇلعالارى بولعان. ولاردىڭ اۋزىمەن ورىلگەن ءسوز ارقىلى سول زامانداعى تەكتىلىك، ەل باسقارۋ ىسىندەگى شارۋالار كورىنەدى. ەكىنشىدەن، حورعا كوبىنەسە سوزىلىڭقى اندەردى قوسامىز عوي، وسى جولى كۇيدى جىرعا ءتۇسىرىپ، سونى ايتقىم كەلىپ وتىر. وسىدان بەس جىل بۇرىن وپەرانى جازىپ تاستادىق. ءبىراق ەلدىڭ قۇلاعىنا ءالى جەتكەن جوق. سول وپەرا ۇزىكتەرىن بەرگىم كەلەدى. وپەرا ارقىلى جەلتوقساننىڭ 30 جىلدىعىن بەلگىلەپ وتسەم دەيمىن. وعىزدان تۇرىكمەندەردى، التايدان قىرعىزداردى، ءوزىمىزدىڭ قىپشاق توبىنان نوعايدى شاقىرعىم كەلەدى. شاقىردىق، امانشىلىق بولسا، كەلەمىز دەپ وتىر»، - دەدى ول.
كونسەرت شامامەن 2,5-3 ساعاتقا سوزىلماق. كەشتەن تۇسكەن قارجى ارۋجان سايىننىڭ قايىرىمدىلىق قورىنا اۋدارىلادى.
