گولوۆكين بوكس الەمىندەگى قيىندىقتار تۋرالى ايتىپ بەردى

«وتكەن جىلى مەنىڭ بوكسقا دەگەن قىزىعۋشىلىعىم ءبىرشاما باسەڭسي ءتۇستى. مەنىڭ اتىمنان كوپتەگەن ۇساق-تۇيەك، الىپ-قاشپا اڭگىمەلەر تارادى. «مەن شىعامىن...»، «مەن شىعۋعا دايىنمىن...» دەگەن سياقتى. شىن مانىندە مەن ولاردىڭ بارلىعىنىڭ دايىن ەكەندىگىنە كۇمانىم بار. الايدا مەن كەشە دەننيدىڭ (دجەيكوبس) راسىندا دا دايىن ەكەندىگىنە كوز جەتكىزدىم»، - دەدى گولوۆكين.
ايتا كەتەيىك، 2016-جىلى گەننادي گولوۆكين رينگكە تەك ەكى رەت شىقتى. ءساۋىر ايىندا دومينيك ۋەيدپەن كەزدەسسە، قىركۇيەكتە كەلل برۋككە قارسى كەزدەسۋ وتكىزدى. GGG جەلتوقسان ايىندا تاعى ءبىر كەزدەسۋ وتكىزەدى دەپ كۇتىلگەن ەدى. الايدا، كىشى كريس يۋبەنكتىڭ كومانداسىمەن كەلىسسوزدەر تىعىرىققا تىرەلدى. ال، دەنيەل دجەيكوبستىڭ پروموۋتەرلەرىمەن قارجى ماسەلەسى رەتتەلمەدى. سونىڭ سالدارىنان جەكپە-جەك ناۋرىز ايىنا قالدىرىلدى.
گولوۆكين بۇعان قوسا، The Breakfast Club حابارىندا Power راديوستانتسياسىنا بەرگەن سۇحباتىندا اندرە ۋوردپەن بولۋى ىقتيمال كەزدەسۋ تۋرالى ايتتى.
«بۇل كەزدەسۋ وتەدى دەگەن ۇمىتتەمىن. الايدا بۇل بوكس. ول 175 فۋنتقا اۋىرلادى، ال مەن 160 فۋنتتا قالدىم. دەسەك تە بولاشاقتا كەزدەسۋ وتكىزەتىن مۇمكىندىك تۋسا مەن ودان قاشپاس ەدىم. بۇل كەزدەسۋدى ءبارى كۇتىپ ءجۇر. ول 168 فۋنت بولىپ تۇرعان كەزدە ءبىز ءبىر-ەكى مارتە تىلدەستىك. الايدا، ايتارلىقتاي سالماقتى اڭگىمە وربىگەن جوق. دەگەنمەن بۇل كەزدەسۋ بولاشاقتا بولۋى ابدەن مۇمكىن. مەن كىممەن بولسا جەكپە-جەككە شىعۋعا دايىنمىن»، - دەپ كەلتىرەدى گولوۆكيننىڭ ءسوزىن Sports.kz.