قازاقستان ب ۇ ۇ قاۋىپسىزدىك كەڭەسىنىڭ وتىرىسىن مەملەكەت باسشىلارى دەڭگەيىندە وتكىزىپ وتىرۋدى ۇسىندى

بۇل تۋرالى بۇگىن ورتالىق كوممۋنيكاتسيالار قىزمەتىندە قر سىرتقى ىستەر ءمينيسترىنىڭ ورىنباسارى ەرجان اشىقبايەۆ ءمالىم ەتتى.
«بىرەر كۇن بۇرىن نيۋ- يوركتە قازاقستان العاش رەت ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ونىڭ «شيەلەنىستەردىڭ الدىن الۋ جانە بەيبىتشىلىكتى ساقتاۋ» تاقىرىبىنداعى اشىق پىكىرتالاستارىنا قاتىستى. نيۋ- يورك قالاسىندا وتكەن شارا اياسىندا قازاقستاننىڭ سىرتقى ىستەر ءمينيسترى قايرات ءابدىراحمانوۆ پرەزيدەنت نۇرسۇلتان نازاربايەۆتىڭ «قاۋىپسىز، ءادىل جانە گۇلدەنگەن الەم قۇرۋ ءۇشىن جاھاندىق ارىپتەستىكتى نىعايتۋعا قازاقستاندىق تۇجىرىمدامالىق كوزقاراس» اتتى ساياسي جولداۋىن تانىستىردى»، - دەدى اشىقبايەۆ.
ونىڭ سوزىنە قاراعاندا، جولداۋدا ب ۇ ۇ ق ك تۇراقتى ەمەس مۇشەسى رەتىندەگى قازاقستان جۇمىسىنىڭ 7 باسىم باعىتى اتاپ كورسەتىلدى.
ءبىرىنشى مىندەت - يادرولىق قارۋسىز الەمدى جاقىنداتۋ، ەكىنشى - جاھاندىق سوعىس قاتەرىن بولدىرماۋ، اۋعانستانداعى بەيبىتشىلىككە ىقپالداسۋ، ءۇشىنشى - ورتالىق ازيادا بەيبىتشىلىكتىڭ وڭىرلىك ايماعىن قالىپتاستىرۋ، ءتورتىنشى - ب ۇ ۇ قامقورلىعىمەن جاھاندىق لاڭكەستىككە قارسى كواليتسيا (جەلى) قۇرۋ، بەسىنشى - افريكانىڭ بەيبىت دامۋىنا جاردەمدەسۋ، التىنشى - ب ۇ ۇ- نىڭ ورنىقتى دامۋ ماقساتتارىن، بەيبىتشىلىك، قاۋىپسىزدىك جانە دامۋ اراسىنداعى اجىراماس بايلانىستى ىلگەرىلەتۋ، جەتىنشى - ب ۇ ۇ- نى 21- عاسىر تالاپتارىنا بەيىمدەۋ جانە جاھاندىق پروبلەمالاردى شەشۋ ءۇشىن ۇجىمدىق ساياسي ەرىكتى نىعايتۋ ماقساتىندا مەملەكەتتەر مەن ۇكىمەتتەر باسشىلارى دەڭگەيىندە ق ك- نە مۇشە مەملەكەتتەردىڭ تۇراقتى كەزدەسۋلەر تەتىگىن كەلىسۋ، ازيا، ەۋروپا، امەريكا جانە افريكا قۇرلىقتارىنىڭ ايماقتىق قاۋىپسىزدىك ۇيىمدارىنىڭ اراداعى ارىپتەستىگىن كەڭەيتۋ.
اۆتور: جاسۇلان جولدىبايەۆ