كۇيەۋىمەن اجىراسقىسى كەلمەيتىن قازاقستاندىق ايەل جۇرتتان كەڭەس سۇرادى

ول ءوزىنىڭ قاتەلىگىن تولىقتاي مويىنداپ، ونى ۇستاپ قالۋ ءۇشىن بارلىعىنا دايىن ەكەنىن تىلگە تيەك ەتتى.
بۇل تۋرالى «ايەل باقىتى» باعدارلاماسىندا ايتىلدى.
جانسايا حانىم كۇيەۋىن وزگە ايەلدەردەن قىزعاناتىنىن مويىندايدى. ۇيدەگى ۇرىس-كەرىستى دە ءوزى ءبىرىنشى بولىپ باستايدى ەكەن. ول ءوزىنىڭ بۇل ارەكەتتەرىن بوسانعاننان كەيىنگى دەپرەسسيا بولار دەپ بولجادى.
«كۇيەۋىممەن وسىدان 9 جىل بۇرىن ءبىر-ءبىرىمىزدى ءسۇيىپ قوسىلدىق. ءومىردىڭ اشىسىن دا، ءتاتتىسىن دە بىرگە كورىپ كەلدىك. ۇرىسىپ قالساق، ۇيدەن شىعىپ كەتىپ قالادى. مۇنداي جاعداي قانشا رەت بولعانىن ساناعان ەمەسپىن. ءبىراق ءجيى بولىپ تۇرادى. ءبىر-ەكى كۇننەن سوڭ اشۋى باسىلىپ، ءوزى قايتىپ كەلەدى. بولمايتىن نارسەلەرگە بولا ۇرىسامىز. شىنىمدى ايتسام، ۇرىستى كوبىنەسە مەن باستايمىن. بالا تۋعاننان كەيىنگى كۇيزەلىستە ءجۇرمىن دەپ ويلايمىن. بالام ەكى جاستا. كەيدە جولداسىمدى قىزعانىپ قويامىن. قىرسىق مىنەزىمنىڭ سالدارىنان وڭايلىقپەن كەشىرە المايمىن»، - دەيدى جانسايا حانىم.
وسىدان ءبىر اي بۇرىن تاعى دا ۇرىس بولىپ، كۇيەۋى ۇيدەن كەتىپ قالعان. سودان بەرى ءالى ۇيگە كەلمەگەن ەكەن. ال جانسايانى تىڭداعىسى دا، كورگىسى دە كەلمەيدى. تەك اجىراسقىسى كەلەتىنىن ايتقان.
«ءبىر اي بۇرىن دا بولمايتىن نارسەگە ۇرىستىق. سودان ءبىر اي ۇيدە بولعان جوق. جاقىندا حابارلاسىپ، «ءبىز ەندى اجىراسامىز. مەن بالا-شاعامدى قالدىرمايمىن. ولاردىڭ بۇكىل جاعدايىن جاسايمىن. ءبىراق ەكەۋىمىز ءبىر شاڭىراقتىڭ استىندا تۇرا المايمىز» دەدى. مەنىڭ اجىراسقىم كەلمەيدى. سودان كەيىن ءالى سويلەسپەدىك، مەن كەشىرىم سۇرامادىم. ول مەنى ءتىپتى تىڭداعىسى كەلمەيدى، ال مەن ونى جىبەرگىم كەلمەيدى. ويتكەنى ول مەنىڭ بالالارىمنىڭ اكەسى، جان جارىم. كەيدە ءوزىم كوڭىلىن قالدىردىم دەپ ويلايمىن. كەيدە وعاش س م س- حاتتاردى بايقاپ قالامىن. ولار كوڭىلدەسىنەن كەلگەن سياقتى. جۋىردا ءوزى ەسەپشى ايەلدى جۇمىستان ۇيىنە دەيىن جەتكىزىپ تاستاعان ەكەن. سودان قىزعاندىم. بالالارىن قاتتى جاقسى كورەدى. تۇرمىسىمىز جاقسى»، - دەيدى كەلىنشەك.
ءلايلا سۇلتان قىزى مەن ستۋديا قوناقتارى جانسايانىڭ ءوز كىناسىن مويىنداعانىنا قايران قالدى. وسىعان وراي، ول ءوزىنىڭ پسيحولوگيالىق قيىندىقتارىن تولىقتاي جەڭە الادى دەگەن بولجام جاسادى. ال پسيحولوگ مامان وعان كۇيەۋىنىڭ ءاربىر ءسوزىن تىڭداۋعا كەڭەس بەردى.
«بۇل جەردە ناقتى شەشىم قابىلداۋ قيىن. سەبەبى، مۇمكىندىك ءاردايىم بار. ءبىز سولاي جاراتىلعانبىز. جانسايا ءوزى «كەتەدى- كەلەدى» دەپ ايتىپ وتىر. ونى ءالى دە ۇستاپ تۇرعان بىرنارسە بار. ەركەك شەشىم قابىلدايتىن بولسا، ول ەشقاشان قايتىپ كەلمەيدى. اجىراسىپ جاتقان وتباسىندا ەر مەن ايەل وزدەرىنىڭ قاتەلىكتەرىن تابۋى كەرەك. قاتەلىك ەكى جاقتا بولادى. جالعىز ادامدا بولۋى مۇمكىن ەمەس. ەر-ازاماتىڭ ۇيگە كەلگەن كەزدە ونى مۇقيات تىڭدا. وعان نە كەرەك ەكەن؟ ءسىز نەنى وزگەرتكەن كەزدە ول قايتىپ كەلەدى؟ ويتكەنى ول ءالى تۇپكىلىكتى كەتكەن جوق. ەر ازاماتىڭمەن العاش كەزدەسكەن كەزدە، سەن ءوزىڭنىڭ قىلىقتارىڭمەن، قاسيەتىڭمەن باۋراعان شىعارسىڭ. ايەل قاۋىمى بالالى بولعان سوڭ، كوپ نارسەنى جىبەرەدى. وزىنە قاراماي كەتەدى»، - دەيدى مامان.
بۇگىندە جانسايا حانىمنىڭ قانداي ارەكەتتىڭ كومەگىنە جۇگىنگەنى بەلگىسىز. دەسە دە، ول كەز كەلگەن جاعدايدا وتباسىن ساقتاپ قالۋعا تىرىساتىنىن ايتىپ جاتىر. ال بۇل وقيعاعا قاتىستى ءسىزدىڭ پىكىرىڭىز قانداي؟ جانسايا حانىمعا قانداي كەڭەس بەرەر ەدىڭىز؟