ءبىر قىزبەن كوپەن بولىپ تانىسىپ ەدىم... - قۇلبەك ەرگوبەك

- وتكەندە ماعان جىبەرگەن ماقالاڭدى «قازاق راديوسىنا» بەرگەنمىن. نازاربەك دەگەن جىگىت حابارلاسىپ: «ءوزىڭىز كەلىپ قول قويماساڭىز، اتى بەيمالىم بالانىڭ ماقالاسىن باسشىلىق وتكىزبەي جاتىر» دەدى. ەڭبەكتى اتاق ەمەس، ادام ىستەيدى عوي. تۇسىنبەيدى بۇگىنگى باسشىلار. ايتپەسە قارتايعان كەنجەبايەۆتان گورى بەيتانىس جاستاردى تانىتۋ، ولاردىڭ شىعارماشىلىق ىزدەنىمپازدىعىن ارتتىرۋ بۇگىنگى مۇرات ەمەس پە، - دەيدى.
بىرنەشە كۇن وتكەن سوڭ ۇستازىم تاعى دا شاقىرتتى. وتكەندەگى ماقالانى راديودان وقىعان ەكەن. سوعان بەرگەن قالاماقىنى مەنىڭ مەكەنجايىمدى بىلمەي، ۇستازىمنىڭ ۇيىنە جىبەرتىپتى. عالىمنىڭ ۇيىنەن شىعىپ تىكە پوچتاعا تارتتىم. 18 سوم 60 تيىن قالاماقى الدىم. باس پوچتانىڭ عيماراتىنىڭ ارتىندا اكادەميالىق كىتاپ دۇكەنى بولاتىن. سول دۇكەننەن نيكولاي كونرادتىڭ كىتابىن ساتىپ العانىم ەسىمدە.
ودان سوڭ بىردەن ۇستازىما قوڭىراۋ شالدىم.
- اعاي، قالاماقىمدى الدىم. بىراق، بۇل ماقالادا مەنىڭ ەڭبەگىم از عوي... كىشكەنە ىڭعايسىزدانىپ تۇرمىن، - دەدىم.
- از دەيمىسىڭ؟ العاشقى قالاماقىعا ازدىق ەتپەس. ازسىنساڭ تاعى جاز! ءبىراق، ماقالانى قالاماقى ءۇشىن جازۋعا ۇيرەنبە. شاراپقا ەمەس، قالام مەن پاراققا ءۇيىر بول، - دەدى جاناشىر ۇستاز. بەيسەكەڭنىڭ وسى سوزدەرى مەن ءۇشىن ومىرلىك ازىق بولدى. ءومىردىڭ كەيبىر قيىنشىلىقتارىنا مويىعان ساتتەرىمدە «ازسىنساڭ تاعى جاز، قۇلبەك» دەپ ءوزىمدى جىگەرلەندىرىپ وتىرامىن.
ستۋدەنت كەزىمدە نەمەرە اعام كوپەن امىربەكتى وزىمە ۇلگى تۇتىپ جۇرەتىنمىن. ول اعام قىزدارمەن تانىسقاندا ءوزىن «سابىرحان اسانوۆپىن» دەپ تانىستىرادى ەكەن. سول ءادىستى مەن دە قولدانىپ كورەيىن دەپ ءبىر كۇنى الما ەسىمدى قىزبەن «كوپەن امىربەك» بولىپ تانىستىم. اڭگىمەمىز جاراسىپ- اق جۇرگەن. ءبىر كۇنى جاتاقحانا الدىندا المامەن تۇرعانىمدا كوپەن اعامنىڭ كەلىپ قالماسى بار ما؟! اسىعىس- ۇسىگىس: «قۇلبەك، مەن 2-قاباتتاعى پالەنىنشى بولمەگە جايعاستىم. سوسىن كەلەرسىڭ ماعان» دەدى دە كەتىپ قالدى. الگى قىز ماعان قاراپ اڭ- تاڭ، مەن باسىم سالبىراعان كۇيى قول بەرىپ قوشتاسقانمىن.
جازىپ العان ەربولات اينابەكوۆ
http://okg.kz