08:20, 09 - قاڭتار 2017 | GMT +5
نورۆەگيا ەسكى فورماتتاعى راديو تاراتۋدان باس تارتتى
استانا. قازاقپارات - نورۆەگيا تولىقتاي سيفرلىق راديوتاراتۋعا كوشكەن الەمدەگى العاشقى ەل اتانادى. كەلەسى اپتادا وندا FM راديوستانسالار جەلىسىن وشىرەدى، دەپ حابارلايدى onliner.by.
پارلامەنت شەشىمىن حالىقتىڭ 17 پايىزى قولداسا، 66 پايىزى قارسى بولىپ وتىر، ويتكەنى ەلدەگى 2 ميلليون اۆتوموبيل سيفرلىق راديوقابىلداعىشتارمەن جابدىقتالماعان. سونىڭ سالدارىنان توتەنشە جاعداي تۋرالى حاباردى كەي ادامدار ەستىمەي قالۋى مۇمكىن ەكەن. سوعان قاراماستان نورۆەگيا ۇكىمەتى وتكەن عاسىردىڭ 50- جىلدارى ىسكە قوسىلعان ەسكى فورماتتان باس تارتۋ جونىندە شەشىم قابىلداپ وتىر.
سيفرلىق ستانتسيالار كوپتەگەن ارنالاردى تاراتا الادى، ءارى ولاردىڭ اۋديوسيگنالى ارتىق دىبىستارسىز جەتكىزىلەدى. 2020 -جىلدارى FM تاراتۋدى شۆەيتساريا تولىعىمەن توقتاتادى؛ دانيا مەن بريتانيا دا وسىنداي جولدى تاڭداپ وتىر. بريتاندىق مامانداردىڭ ەسەبى بويىنشا 2017 -جىلدىڭ سوڭىنا قاراي ەلدەگى راديو تىڭدارماندارىنىڭ تەڭ جارتىسىنان كوبى سيفرلىق نۇسقاعا كوشپەك.
