تۇركيا: تۇنگى كلۋبتا ادامدارعا وق جاۋدىرعان لاڭكەس - وزبەكستان ازاماتى

Daily Sabah باسىلىمىنىڭ جازۋىنشا، 1- قاڭتارعا قاراعان ءتۇنى ىستانبۇل ورتالىعىنداعى تۇنگى كلۋبتا ادامدارعا وق اتقان «ابۋ مۋحاممەد حوراسان» لاقاپ اتى بار وزبەكستان تۋماسى ابدۋلگادير ماشاريپوۆ ەكەنى بەلگىلى بولدى.
پوليتسيا بولعان وقيعانىڭ كارتيناسىن جاساپ شىقتى. ماشاريپوۆ تۇنگى كلۋبقا كىرىپ كەلىپ، ونداعى ادامدارعا قارسى 180 وق اتقان. ودان كەيىن اس بولمەسىنە بەت العان، وندا 13 مينۋتتىڭ ىشىندە كيىمىن اۋىستىرىپ، دۇرلىككەن جۇرتپەن بىرگە سىرتقا شىعىپ كەتكەن.
ودان ءارى لاڭكەس تاكسي ۇستاپ، كورشى اۋدانعا دەيىن جەتكەن. ماشينادان ءتۇسىپ بارا جاتىپ، جۇرگىزۋشىگە اقشاسىنىڭ جوقتىعىن ايتقان. پوليتسيا انىقتاعانداي، ول 500 ليردى تۇنگى كلۋبتىڭ اس بولمەسىندە قالعان كۋرتكاسىنىڭ قالتاسىندا ۇمىتىپ كەتكەن.
Olay باسىلىمىنىڭ جازۋىنشا، وسى تاكسيستىڭ ارقاسىندا لاڭكەستىڭ تۇلعاسىن انىقتاۋ مۇمكىن بولعان. سىرتقى باقىلاۋ كامەرالارى ارقىلى قىلمىسكەردىڭ تۇنگى كلۋبتان باستاپ ماشيناعا دەيىنگى جولى قارالدى، كەيىن پوليتسيا تاكسي جۇرگىزۋشىسىن تاپتى.
ماشاريپوۆ ىستانبۇلعا كونيا قالاسىنان كەلگەنى انىقتالدى. ول 1988-جىلى تۋعان، تۇرىك، اراب جانە ورىس تىلدەرىن بىلەدى.
ىستانبۇلداعى Reina كلۋبىندا تەراكت 1- قاڭتارعا قاراعان ءتۇنى بولدى. قىلمىسكەر قالىڭ جۇرتقا قارسى وق جاۋدىرىپ، سالدارىنان 39 ادام مەرت بولدى. قاسكوي قاشىپ كەتكەن. لاڭكەستىك ءۇشىن جاۋاپكەرشىلىكتى «يسلام مەملەكەتى» (قازاقستان اۋماعىندا تىيىم سالىنعان) توبى ءوز موينىنا الدى.