پلاستيكالىق وپەراتسياعا جۇمسالاتىن شىعىننان قىتاي كوش باستادى
بۇل سالاعا ارنايى زەرتتەۋ جۇرگىزگەن بريتاندىق «ينسايت ينجينيرس» كومپانياسى الەمنىڭ 16 ەلىندەگى 18 بەن 65 جاس ارالىعىنداعى 7 مىڭ 700 ايەلدىڭ اراسىندا ساۋالناما جۇرگىزگەن. ونىڭ قورىتىندىسى بويىنشا قىتاي تۇرعىندارى پلاستيكالىق وپەراتسياعا ورتاشا ەسەپپەن ايىنا 581 يۋان جۇمسايدى. ال، الەمدىك ورتاشا كورسەتكىش بۇل سومانىڭ تەك جارتىسىن عانا قۇرايدى.
وپەراتسيانىڭ كومەگىمەن سىمباتتى بولۋعا جۇگىنەتىندەردىڭ ىشىندە ەكىنشى ورىندا وڭتۇستىك كورەيالىق بيكەشتەر تۇر. ادەمىلىككە تالپىنعان قىتاي قىزدارىنىڭ باسىم بولىگى ءىرى قالالاردىڭ تۇرعىندارى. بىلتىر پلاستيكالىق حيرۋرگيا نارىعىندا قىتاي ا ق ش پەن برازيليادان كەيىن ءۇشىنشى ورىنعا شىققان. اسپان استى ەلىندە ءتاۋىر جۇمىسقا ورنالاسۋ ءۇشىن باسەكە جوعارى. سوندىقتان قىتايلىقتار تەك بىلىمگە عانا ەمەس، ءوزىنىڭ سىرت كەلبەتىنە دە ينۆەستيتسيا سالۋعا تىرىسادى.
بۇگىندە قىتايداعى پلاستيكالىق وپەراتسيانىڭ ەڭ تانىمال ءتۇرى - بلەفاروپلاستيكا. ياعني قىسىق كوزگە قاباق سالۋ مەن قاستىڭ ءپىشىنىن وزگەرتۋ، سودان كەيىن يەكتى جىڭىشكەلەتىپ، سوپاقشا ەتۋگە سۇرانىس كوپ.
ۋ جياجيا، بەيجىڭ قالاسىنىڭ تۇرعىنى:
- بۇرىن بەتىمنىڭ ءپىشىنى وزىمە ۇنامايتىن. اسىرەسە جاعىمنىڭ تىم شىعىڭقى بولىپ كەلگەنى مازالايتىن. بار- جوعى 3 ايدا كەلبەتىم وسىنشالىقتى كورىكتى بولادى دەپ ويلاماپپىن. وزىمە دەگەن سەنىمدىلىگىم ارتتى.
چەن ۋچجيە، كوسمەتيكالىق ورتالىقتىڭ باسشىسى:
- ءبىزدىڭ كوسمەتيكالىق ورتالىق - ەلىمىز بويىنشا ەڭ ءىرى مەكەمەنىڭ ءبىرى. قىتايدىڭ كوپتەگەن قالالارىندا 20-دان اسا فيليالىمىز بار. ولاردىڭ سانىن 40، شاما جەتسە 50-گە دەيىن كوبەيتۋدى جوسپارلاپ وتىرمىز. ويتكەنى سۇرانىس كوپ.
ارنايى مامانداردان كەڭەس الىپ، بەت الپەتىن وزگەرتكىسى كەلەتىندەر نەگىزىنەن ايەلدەر قاۋىمى. جاس قىزداردىڭ اراسىندا بەتى مەن دەنە پىشىنىنە كوڭىلى تولمايتىندار كوپ، ال ورتا جاستاعىلار تەرىنى جاسارتۋ بويىنشا قىزمەتتەرگە جۇگىنەدى. بۇگىندە قوعامدا ادەمىلىككە دەگەن سۇرانىس ارتىپ كەلەدى. جاقسى جۇمىسقا تۇرۋ ءۇشىن، جار تابۋ ءۇشىن سۇلۋلىق كەرەك. سوندىقتان اركىم ءوز جاعدايىنا قاراي سۇيكىمدىلىككە تالپىنىپ جاتىر.
www.24.kz
