08:09, 04 - قاڭتار 2017 | GMT +5
بەيجىڭدى باسقان قارا تۇنەكتىڭ بەينەكورىنىسى پايدا بولدى - كەسكىن
استانا. قازاقپارات - قىتايدا جۇمىس ىستەيتىن بريتانيالىق چەس پوۋپ YouTube جەلىسىندە بەيجىڭدى تورلاعان قارا تۇنەكتىڭ بەينەكورىنىسىن جاريا ەتتى، دەپ جازادى ر ي ا نوۆوستي. جەدەل تۇسىرىلگەن بەينەكورىنىستە 20 مينۋتتىڭ ىشىندە قاراتۇنەكتىڭ قىتاي استاناسىنىڭ اسپانىن قالاي باسىپ قالعاندىعى ايقىن بايقالادى.
سەيسەنبى، 3 -قاڭتار كۇنى قىتاي اۋانىڭ لاستانۋىنا بايلانىستى دابىلدىڭ ەڭ جوعارعى «قىزىل» دەڭگەيىن جاريالادى، دەپ جازدى شينحۋا اگەنتتىگى. قاراتۇنەكتىڭ سالدارىنان اۋە رەيستەرى كەشىگۋدە، كەيبىر اۆتوماگيسترالداردا جولدار جابىق، جەكە كولىكپەن جۇرۋگە تىيىم سالىنعان. قاراتۇنەك قىتاي استاناسىن جىل بويىنا تورلاپ تۇراتىن كەزدەرى بولادى.
دەگەنمەن، جىلۋ ماۋسىمى باستالعان قاراشا ايىنىڭ ورتا تۇسى مەن ناۋرىز ايى ارالىعىندا بۇل پروبلەما ەرەكشە وزەكتىلەنە تۇسەدى. 2017 -جىلى بەيجىڭ قورشاعان ورتانىڭ لاستانۋىمەن كۇرەسكە 2,5 ميلليارد دوللار شىعىنداۋدى جوسپارلاپ وتىر.
