پرەزيدەنت جاڭا جىل ءداستۇرىن بۇزدى

استانا. قازاقپارات - وزبەكستان پرەزيدەنتى شاۆكات ميرزيەيەۆ وزبەك حالقىن جاڭا جىل مەرەكەسىمەن قۇتتىقتاۋ كەزىندە قاعيدانى بۇزدى. ول اۋەلى ورىس تىلىندە قۇتتىقتاۋ جولداپ، سودان كەيىن عانا وزبەكشە سويلەگەن، دەپ حابارلايدى ر ي ا نوۆوستي.

وزبەكستاننىڭ ۇلتتىق ارناسىنان بەرىلگەن قۇتتىقتاۋ ءداستۇرلى تۇردە ساعات ءتىلى 00:00 دە ەمەس، ودان بۇرىن بەرىلىپ قويعان. جانە ول ەكى تىلدە، اۋەلى ورىسشا، سوسىن بارىپ وزبەك تىلىندە جاريالاندى.

وزبەكستان پرەزيدەنتى وتكەن جىلعا وكپەسى جوق ەكەنىن، 2016-جىلى ەلدە ءتۇرلى وقىيعالار ورىن العانىن ايتتى.

«ارتتا قالىپ بارا جاتقان جىلدا ەلىمىز كوپتەگەن جەتىستىكتەرگە قول جەتكىزدى، ءبىز ءۇشىن ەرەكشە ماڭىزدى وقيعالار ورىن الدى. ارينە، قيىندىقسىز جەڭىس تە كەلمەيتىنى بەلگىلى. دەگەنمەن ءبىز حالقىمىزدىڭ تاباندىلىعى مەن جىگەرىنىڭ ارقاسىندا بارلىعىنان دا ءساتتى وتە بىلدىك» - دەدى شاۆكات ميرزيەيەۆ.

مەملەكەت باسشىسىنىڭ ايتۋىنا قاراعاندا وتكەن جىل وزبەكستان تاۋەلسىزدىگىنىڭ 25 جىلدىق تاريحىندا ەرەكشە ورىن العان جىل بولدى. اسىرەسە پرەزيدەنت وتكەن جىلى وزبەك سپورتشىلارىنىڭ جەتكەن جەتىستىكتەرىنە ەرەكشە توقتالدى. ريوداعى جەڭىس ەل تاريحىنداعى ەڭ ساۋلەلى ءسات ەكەنىن اتاپ ءوتتى.

سونىمەن قاتار ميرزيەيەۆ 2017-جىل وزبەكستان ءۇشىن جەكە ادامدار مەن حالىقتىڭ قارىم-قاتىناس جىلى بولاتىنىن دا ەسكەرتتى.