استانادا اۋلا كلۋبتارى اراسىندا جاڭاجىلدىق تۋرنير ءوتتى

استانا. قازاقپارات - جاڭا جىل قارساڭىندا استانا قالاسىندا اۋلا كلۋبتارى اراسىندا تۋرنير ۇيىمداستىرىلدى.

«قىسقى دەمالىس» دەپ اتالعان تۋرنيرگە 8 اۋلا كومانداسى قاتىستى، دەپ حابارلايدى قازاقستاننىڭ فۋتبول فەدەراتسياسىنىڭ سايتى. ا توبىندا «جاستار -19»، «استانا»،
«Astana life» جانە «بارىس» كوماندالارى سىنعا ءتۇستى.

ب توبىندا «Dream Team»، «جەڭىس»، 56 جانە 59 مەكتەپتىڭ كوماندالارى كەزدەستى. ا توبىندا التى ۇپاي جيناعان «Astana life» فينالدىق كەزەڭگە ءبىرىنشى ورىنمەن شىقتى. «Astana life» كومانداسى «جاستار-19» جانە «بارىس» كوماندالارىن 1:0 ەسەپتەرىمەن ۇتسا، «استانا» ۇجىمىنا ءدال وسىنداي ەسەپپەن ەسە جىبەردى.

ەكىنشى ورىن «جاستار-19» كومانداسىنا بۇيىردى. ب توبىندا 56 مەكتەپتىڭ قۇراماسى ۇزدىك شىقتى. ولار ءوز توبىنداعى ءۇش ويىندا جەتى ۇپاي جيناپ، قاقپالارىنا بىردە- ءبىر گول جىبەرمەدى. ەكىنشى ورىندا - «جەڭىس» فۋتبولشىلارى. فينالدىق كەزەڭدە ءتورت كوماندا سىنعا ءتۇستى. جارىس جەڭىمپازى اتانعان «Astana life» كومانداسى «جاستار-19» جانە «جەڭىس» كوماندالارىن 1:0 ەسەپتەرىمەن ۇتىپ، شەشۋشى ويىندا 56 مەكتەپتىڭ كومانداسىمەن 1:1 ەسەبىمەن تەڭ وينادى.

«جەڭىس» فۋتبولشىلارى 56 مەكتەپتىڭ قۇراماسىن 3:0 ەسەبىمەن ۇتىپ، ەكىنشى ورىندى يەلەندى. ءۇشىنشى جانە ءتورتىنشى ورىنداردى 56 مەكتەپ پەن «جاستار-19» كوماندالارى ءبولىستى. 5-8 ورىنلار ءۇشىن وتكەن ويىندار دا تارتىسقا تولى بولدى.

بۇل كەزەڭدە «Dream Team» مەن 59 مەكتەپتىڭ كوماندالارى جاقسى ناتيجە كورسەتتى. ال، «بارىس» پەن «استانا» كوماندالارى سوڭعى ورىنداردان كورىندى. تۋرنير قورىتىندىسى بويىنشا ۇيىمداستىرۋشىلار ەڭ ۇزدىك ويىنشىلاردى ماراپاتتادى. ەڭ ۇزدىك قاقپاشى - بەكجان قايىربەكوۆ («Astana life»)، ەڭ ۇزدىك قورعاۋشى - اليجان تۇراروۆ («جاستار-19»)، ەڭ ۇزدىك شابۋىلشى - ادىلەت سماعۇلوۆ («جەڭىس»).

ەسكە سالا كەتەيىك، قازاقستان فۋتبول فەدەراتسياسى مەن استانا قالاسىنىڭ اكىمدىگى اۋلا كلۋبتارىندا تەگىن فۋتبول سەكسيالارىن اشۋ باستاماسىن بيىل قولعا العان بولاتىن. بالالاردى فۋتبولعا باۋلۋ ءۇشىن كاسىبي جاتتىقتىرۋشىلار شاقىرىلدى.