سۇم تاعدىرى قازاقستان حالقىن الاڭداتقان ايدانا قوشانوۆا تۇرمىسقا شىقتى
بويجەتكەنگە دەيىن نە ءوزىنىڭ تولىق اتى-ءجونىن، نە قاي جىلى، قاي كۇنى دۇنيەگە كەلگەنىن بىلگەن جوق.
قاتارلاستارى سياقتى بالا بولىپ ويناعان جوق، ءتىپتى، مەكتەپكە بارعان جوق. دەسە دە، ەشتەڭەگە قاراماستان ول بۇگىن ءوزىن باقىتتى جان سانايدى.
بۇل تۋرالى «قازاقستان» ارناسىنىڭ «ايتۋعا وڭاي» باعدارلاماسىندا ايتىلدى.
ەستەرىڭىزدە بولسا، بىرنەشە اي بۇرىن ايدانا قوشانوۆا تۋرالى جازعان بولاتىنبىز. كەزىندە اتا- اناسى جانە باۋىرلارىمەن بىرگە قاراقالپاقستاننان كوشىپ كەلگەن بويجەتكەن وتباسىنان بالا كۇنىندە ايىرىلىپ قالعان. اكەسىنەن زورلىق كوردى، ال ىشكىلىككە سالىنعان اناسى بالالارىن تاستاپ كەتتى. تۋعان اپكەسى زورلىققا ۇشىراسا، ءسىڭلىسى قايتىس بولدى. ال تاعى ءبىر باۋىرىنىڭ بار ەكەنىن ايدانا مۇلدەم بىلمەگەن. تاعدىر ونى ايامادى. ونىڭ حيكاياسى قازاقستاندىقتاردىڭ جۇرەگىن اۋىرتتى. بۇكىل ەل ايدانانىڭ باقىتتى بولۋىن تىلەدى.
سول تىلەك پەرىشتەنىڭ قۇلاعىنا شالىنعان شىعار، ايدانا ءوزىنىڭ تەڭىن تاۋىپ، تۇرمىسقا شىقتى. بۇگىندە ول استانادا جارى دوسجان تولەنديەۆپەن بىرگە تۇرىپ جاتىر.
«مەندە ءبارى جاقسى، باقىتتى ءومىر ءسۇرىپ جاتىرمىن. جاعدايىم جاقسى. جارىممەن ءبىر پاتەردە تۇرادى ەكەنبىز. ونى ءبىر ايعا دەيىن بىلمەگەنبىز. تەلەفون قۋاتتاعىش سۇراپ كەلگەن كەزدە ءبىر- ءبىرىمىزدى كورىپ قالدىق. سولاي سويلەستىك، ول مەنىڭ ءنومىرىمدى الدى. سول ارقىلى تانىسىپ سويلەسىپ كەتتىك. مەيىرىمدى، اقىلدى. مەن بىلمەگەن كوپ نارسەلەردى ۇيرەتەدى»، - دەيدى ايدانا.
شىنى كەرەك، ايدانانىڭ بولاشاعى بۇكىل ەلدى الاڭداتۋدا. سول سەبەپتى كوپشىلىك ونىڭ كۇيەۋىن كورگىسى كەلدى. سول ساتتە ستۋدياعا دوسجاننىڭ ءوزى دە كىرىپ كەلدى.
«ايدانانى باقىتتى ەتۋگە تىرىسامىن» دەگەن ول تىم بايسالدى جىگىت بولىپ شىقتى. ەلدەن ۇيالىپ، كوپ سوزگە جوق ەكەنىن مويىندادى.
ال ستۋديا قوناقتارى جاس جۇبايلارعا سارقىلماس باقىت پەن شەكسىز ماحاببات تىلەدى.
