الەمدەگى ەڭ قىمبات جالاقىلى جۇمىس

استانا. قازاقپارات - ءبىزدى قورشاعان ورتانىڭ ءوز زاڭدىلىقتارى بار. سونىڭ ءبىرى ادامنىڭ ءومىر ءسۇرۋى، قاجەتتىلىگى مەن مۇمكىندىگى.

وسىلاردى قالىپتاستىراتىن جۇمىس كۇشى. جۇمىستان الاتىن ءلاززاتىڭىز. ال ول ءلاززاتتى -  بەرەتىن جالاقى.

ءسىز الەمدەگى ەڭ قىمبات جالاقىعا يە بولاتىن جۇمىستى بىلەسىز بە؟! ول كاسىپكەرلەر نەمەسە پرەزيدەنتتەر دەپ ويلارسىز. جوق. ول جۇمىستىڭ اتى - جاقسىلىق.

جاقسىلىق جاساۋ الەمدەگى ەڭ قىمبات جانە وتە قاراپايىم جۇمىس. ەڭ قىمبات بولاتىنى ونى جاساۋ ءۇشىن ءسىز ءتۇرلى قيىندىقتارعا باراسىز. ءوزىڭىزدىڭ ۋاقىتىڭىزدى وزگەگە قياسىز. ال قاراپايىم بولاتىنى ول ءۇشىن ءسىز جالاقى المايسىز. ءبىراق العىس الاسىز.

ءبىر العىستىڭ قۇنى ءسىز تاۋىپ جۇرگەن ماتەريالدىق قۇندىلىقتان مىڭ ەسە كوپ. ويتكەنى ءبىر رەتتىك جالاقى ءسىزدى ول بىتكەنشە عانا قاناعاتتاندىرۋى مۇمكىن. ال العىس كوڭىلىڭىزدە ۇزاعىنان قالادى.

ول ادام نەمەسە جاقسىلىق جاساعان نىساناڭىز ءسىزدى كورگەن سايىن ماقتاپ جۇرەدى، سىزدەي ازاماتتىڭ بارىنا قۋانادى، ءسىزدى جاقىن تارتادى. ال بۇل ادامگەرشىلىكتىڭ ەڭ بيىك شىڭى.

جاقسىلىق جاساۋدان ءلاززاتتانۋ ەڭبەك ەتىپ العان جالاقىمەن ءلاززاتتانۋ سەكىلدى دۇنيە. كوڭىلدىڭ توقتىعى جاقسى، ءبىراق كوڭىل شەكاراسىنان اسىپ قۋانىشقا بولەنسىن دەسەڭىز جاي عانا جاقسىلىق جاساڭىز.

جاقسىلىقتى ىزدەۋدىڭ قاجەتى جوق. ول جۇمىس ءسىزدى قورشاپ تۇر. اينالاڭىزدا جاقسىلىقتان اسقان جۇمىس جوق. كۇندەلىكتى ەسىكتەن شىققاندا كورشىڭىزگە امانداسىڭىز، جولىڭىزدا جاتقان تاستى بىرەۋگە كەدەرگى بولار دەگەن ويمەن عانا الىپ تاستاي سالىڭىز، ەڭ وڭايى قۇلازىپ وتىرعان ادامعا «ءبارى جاقسى بولادى» دەڭىز.

ءسوز - دەرتتىڭ ەمى. سوندىقتان ىسپەن دە، سوزبەن دە جاقسىلىق جاساۋعا بولادى. بىرەۋدى كۇلدىرۋ، بىرەۋدى قۋانتۋ، بىرەۋدى جۇباتۋدان اسقان ادام ءۇشىن ءلاززات بولماس. ادامنىڭ بايلىعى ادامدىعىندا. ماتەريالدىق قۇندىلىق قاجەتتىلىك قانا. ال ونى سۇيىسپەنشىلىكپەن جاساۋ، پارىزىم دەپ ءبىلۋ باسقا دۇنيە.

ەرتەڭ-اق جۇمىسقا ورنالاسىڭىز. ءسىزدى مول تابىس كۇتىپ تۇر. قولىڭىزدان كەلەتىن كەز كەلگەن نارسەمەن جاقسىلىق جاساڭىز. اقىسىز، ءبىراق باقىتتى بولۋعا، كۇلىپ جۇرۋگە ۇيرەتەتىن جۇمىستىڭ ءلاززاتىن سەزىنىڭىز. جاقسىلىق جاساۋ السىزدىك نەمەسە ۇيات دۇنيە دەپ ساناساڭىز، ءسىز الەمدەگى ەڭ كەدەي ادامسىز.

Massaget.kz