تاتارستان تاۋەلسىز مەملەكەت بولا ما؟

استانا. قازاقپارات - تاتارستان پرەزيدەنتى رۋستام ميننيحانوۆ «دونور رەگيوندارعا» قاتىستى فەدەرالدىق ورتالىقتىڭ ساياساتىن وتكىر سىنعا الدى.

ساراپشىلار پرەزيدەنتتىڭ بۇل مالىمدەمەسىن پۋتيننىڭ ساياساتىنا قارسى جاسالىپ جاتقان باتىل ارەكەت دەيدى.

رۋستام ميننيحانوۆتىڭ ايتۋىنشا، دوتاتسيالىق وڭىرلەردى دونور وڭىرلەر ەسەبىنەن اسىراۋ - ويلاستىرىلماعان ساياسات. رەسپۋبليكا ۇكىمەتىنىڭ مۇنداي ساياساتتى قولدامايتىنىن ايتقان ول مۇنداي جونسىزدىكتى تەز ارادا توقتاتۋ كەرەك ەكەنىن مالىمدەدى.

رۋستام ميننيحانوۆتىڭ وسى مالىمدەمەسىنەن كەيىن ماسكەۋ مەن قازاننىڭ قارىم- قاتىناسى قالاي بولۋى مۇمكىن؟ جالپى تاتار پرەزيدەنتىنىڭ ءدال بۇلاي باتىل مالىمدەمە جاساۋىنا نە تۇرتكى بولدى؟

ورايلى ءسات تۋعان سياقتى

ساياسات تانۋشى ءازىمباي عاليدىڭ ايتۋىنشا، ەلدەگى ەكونوميكالىق داعدارىس ميننيحانوۆتىڭ مىنەز كورسەتۋىنە تۇرتكى بولىپ وتىر.

- قازىر رەسەيدە ەكونوميكالىق داعدارىس وتە قاتتى بولىپ جاتىر. سونىڭ سالدارىنان بانكتەر قۇلدىراپ، ءىرى كاسىپورىندار جابىلۋدا، نەمەسە جابىلۋدىڭ شاق الدىندا تۇر. ال تىعىرىققا تىرەلگەن بانكتەرگە ۇلتتىق بانك تاراپىنان كومەك بەرىلمەي جاتىر. ءبىر قىزىعى، تاتارستان دونور- مەملەكەت بولعاننان كەيىن وزگە ايماقتارعا كومەكتەسۋگە مىندەتتى. تاپ قازىر وزدەرى قينالىپ وتىرعان ساتتە رەسەيدەن كومەك سۇراسا ورتالىق «اقشا جوق» دەپ وتىر. ال شەشەنستاننىڭ پرەزيدەنتى رامازان قادىروۆ اقشا سۇراسا، كرەمل بىردەن ولارعا كومەك بەرەدى. وسىنى كورىپ-ءبىلىپ وتىرعان ميننيحانوۆ ساياسي ارەكەت ەتىپ جاتىر، - دەيدى ءازىمباي عالي.

رۋستام ميننيحانوۆتىڭ باس كوتەرىپ، باتىل مالىمدەمە جاساۋىنىڭ استارىندا تاتارلاردىڭ تاۋەلسىزدىك الۋ ماسەلەسى تۇرعانى جاسىرىن ەمەس. ويتكەنى ءبىر كەزدە ايبىنى اسقان تاتارلار ازاتتىق الۋدىڭ ورايلى ءساتىن كوپتەن بەرى كۇتىپ ءجۇر.

ەندەشە باۋىرلاس حالىقتىڭ رەسەيدەن تاۋەلسىزدىك الىپ، ءوز الدىنا بولەك قاشان مەملەكەت بولادى؟

- ەگەر مۇنايدىڭ باعاسى كوتەرىلمەسە، رەسەيگە ودان سايىن قيىن بولادى. ونىڭ ۇستىنە، امەريكا كۆارتس قۇمىنىڭ استىنان ەكى ەسە ارزان مۇناي الۋدى ۇيرەندى. ەگەر وسى جۇمىس ءساتتى جۇزەگە اساتىن بولسا، امەريكا مۇناي ساتىپ الۋشى ەمەس، كەرىسىنشە، ساتۋشى ەلگە اينالادى. مىنە، سول كەزدە مۇناي مەن گازدىڭ باعاسى كۇرت ءتۇسىپ، سونىڭ سالدارىنان رەسەي تىعىرىققا تىرەلەدى.

جالپى، ورىس ۇلتشىل، مىقتى مەملەكەت بولعانىمەن، مورت سىنعىش حالىق.

ماسەلەن 1914 -جىلى گەرمانيامەن سوعىسقاندا ورىس حالقى بەلسەنىپ مايدانعا شىقتى. الايدا 1917 -جىلى حالىقتىڭ ورەكپىگەن كوڭىلى سۋ سەپكەندەي باسىلدى. 1990-1991 -جىلدارى دا وسىنداي جاعداي ورىن الدى. ءبىر ەمەس ەكى رەت قايتالانعان توسىن وقيعا ءۇشىنشى رەت قايتالانۋى ابدەن مۇمكىن.

ال بۇل مۇمكىندىكتى تاتار حالقى ءوز پايداسىنا شەشىپ، تاۋەلسىزدىك الىپ كەتۋى ابدەن مۇمكىن،- دەيدى ساياساتتانۋشى.

ءيا، سولاي! تاتار پرەزيدەنتى مەن حالقى رەسەيدىڭ يمپەريالىق ساياساتىنا قارسى شىعىپ، وزدەرىنىڭ ۇلتتىق مۇددەلەرىن باتىل قورعاپ جاتىر.

 

365info.kz