قازاقستاندىق ستۋدەنتتەر شيان قالاسىنىڭ جەتىم بالالارى ءۇشىن ەكى اربا سىيلىق جينادى - فوتو، كەسكىن
«21 -جەلتوقساندا شيان قالاسىنداعى بارلىق ۋنيۆەرسيتەتتەرگە حابارلاندىرۋ ىلدىك. ينتەرنەت جەلىسىنە مۇمكىندىگى شەكتەۋلى جەتىم بالالارعا ويىنشىق، ءتاتتى، كيىم، جەكە گيگيەنا زاتتارى، جەمىستەر، مەكتەپكە قاجەتتى زاتتار قابىلداۋ باستالعانى تۋرالى حابارلاما بەرىلدى. اكسياعا 100 دەن استام ادام قاتىستى. ولاردىڭ ىشىندە بانگلادەش، قازاقستان، قىرعىزستان، رەسەي جانە باسقا ەلدەردەن ەرىكتىلەرى بار. 4 كۇندە ەكى فۋرگون سىيلىق جينادىق»، - دەدى قازاقپاراتقا بەرگەن سۇحباتىندا KSAC شيان بولىمشەسىنىڭ ءتوراعاسى، چاڭان ۋنيۆەرسيتەتىنىڭ حالىقارالىق قاتىناستار جانە ساۋدا فاكۋلتەتىنىڭ 4- كۋرس ستۋدەنتى جانسەرىك تۇرسىنبەك. 
ونىڭ ايتۋىنشا شيان ق. بالالار ءۇيىنىڭ تاربيەلەنۋشىلەرىنە سىيلىقتى 16 ادام اپاردى. ونىڭ ەكەۋى رەسەي مەن ۋكراينادان «م م studio» ءبي مەكتەبىنىڭ وقىتۋشىلارى، ولار كۋنفۋ- پاندا مەن جولبارىس كوستيۋمىمەن ونەر كورسەتتى. بالالارعا سىيلىقتى اياز اتا (چاڭان ۋنيۆەرسيتەتىنىڭ قازاقستاندىق ستۋدەنتى دميتري پوزاكشين) تاراتتى.
«ءبىز تاڭداعان بالالار ءۇيى شيان قالاسىنداعى ءۇش ەڭ ءىرى جەتىمدەر ءۇيىنىڭ ءبىرى. وندا 2-14 جاستاعى 700 دان استام بالا تاربيەلەنەدى. ولاردىڭ باسىم بولىگى - مۇمكىندىگى شەكتەۋلى بالالار. شيان بولىمشەسى ءانۋار اسىلحانعا ەرەكشە العىس بىلدىرەدى. ول كومەككە العاشقىلاردىڭ ءبىرى بولىپ كەلىپ، اقپاراتتى تانىستارىنا، دوستارىنا تاراتتى. موبيلدى WeChat كوممۋنيكاتسيالىق جۇيەدە توپ قۇردى. وعان 100 گە جۋىق پايدالانۋشى كىردى.
ەسكە سالساق، بۇدان بۇرىن بيىل شيان بولىمشەسىنىڭ بەلسەندىلەرى ق ح ر شانشي پروۆينسياسى شياندا «باۋىرساق كۇنىن»، سونداي-اق كەڭ اۋقىمدا قازاقستان تاۋەلسىزدىگىنىڭ 25 جىلدىعىن وتكىزدى.
