استاناداعى ەكسپوعا ساياحات: كورمەنىڭ ءىشى مەن سىرتى قانداي بولادى - كەسكىن
ەكسپوعا قاتىسۋشى مەملەكەتتەردىڭ وكىلدەرى ءوز پاۆيلوندارىن قابىلداۋعا كىرىستى، دەپ حابارلايدى قازاقپارات. «بۇگىندە 8 مەملەكەت - بەلارۋس، ۆەنگريا، رەسەي، گەرمانيا، قىتاي، تۇركيا، سينگاپۋر مەن فرانسيا ءوز پاۆيلوندارىن قابىلداپ، ءىشىن جابدىقتاۋ جۇمىستارىن باستادى. جاڭا جىلدان كەيىن ونداي مەملەكەتتەردىڭ سانى ارتادى. سونداي-اق ءبىز كورمە قاتىسۋشىلارىنا ارنالعان باسپانانىڭ قۇرىلىسىن اياقتادىق. جالپى، 1374 پاتەر بار. قازىرگى كەزدە 324 پاتەر بويىنشا ءوتىنىش ءتۇستى. شەتەلدىكتەر ول جەردە تۇرىپ، ءتيىستى اقىنى تولەيدى. جالپى، كورمە وتكەننەن كەيىن 4400 پاتەر ساتىلاتىن بولادى. ونىڭ ىشىندە ينۆەستورلار سالىپ جاتقان تۇرعىن ۇيلەر دە بار»، - دەيدى ا. ەسىموۆ.
ونىڭ ايتۋىنشا، بۇگىندە قازاقستاننىڭ پاۆيلونىن تاقىرىپتىق جابدىقتاۋ شارالارىنا ەرەكشە كوڭىل ءبولىنىپ كەلەدى. سونداي-اق ۇزدىك تاجىريبەلەر ايماعىنا جوبالاردى ىرىكتەۋ جۇمىسى اياقتالدى. ول جەردە بالامالى ەنەرگەتيكا سالاسىنداعى الەمدەگى وزىق تەحنولوگيالار تانىستىرىلادى. «كورمەگە 112 مەملەكەت قاتىسادى دەگەن جوسپار بار. الداعى ۋاقىتتا ولاردىڭ سانى تاعى ءسال ءوسۋى مۇمكىن. ال 112 ەلدىڭ ىشىندە 108 مەملەكەت وزدەرىنىڭ ۇلتتىق كوميسسارلارىن بەكىتتى»، - دەيدى كومپانيا باسشىسى.
اۆتور: ارمان اسقاروۆ
