قىزىلوردالىق تۇرعىن ەشكىمدە جوق كولىك قۇراستىرىپ الدى - فوتو
بۇل كولىك ءبىر جاعىنان جەڭىل اۆتوكولىككە ۇقسايدى. الايدا، دوڭگەلەگى باياعى جۇك تاسيتىن گاز-66-نىكى سەكىلدى. جاڭا اۆتوكولىكتى قۇراستىرىپ شىعارعان جاڭاقورعان اۋدانى قىركەڭسە (بۇرىنعى زاداريا) كەڭشارىندا پروراب بولعان يسرايلدىڭ ۇلى بايانباي دەگەن ازامات.
بايانباي ۇزاق جىلدار بويى قاۋىپسىزدىك سالاسىندا قىزمەت ەتىپ، زەينەتكە شىققان. ول جارامسىز دەپ تاستالعان ماشينا بولشەكتەرىن ءبىر جارىم جىلعا جۋىق ۋاقىت جيناپ، قولدان قۇراپتى. جوق جەرلەرىن قولدان جاساپ، دانەكەرلەپ، قوسىمشا بولشەكتەر ورناتاتىن جەرلەردى تەسىپ- كەسىپ ورناتىپتى.
ناتيجەسىندە سىيىمدىلىعى 7 ادامدىق پيكاپ بولىپ شىعادى. ءبىر قىزىعى، اۆتوكولىكتە مەملەكەتتىك ءنومىرى دە بار ەكەن. سان رەت سىناقتان وتكەن. كولىككە بارلىق «پارامەترلەر بويىنشا تەحنيكالىق جاعىنان جارامدى» دەپ قورىتىندى شىعارىلعان. 
