وتاندىق دارىگەرلەر سەۋلدەگى ەڭ وزىق ەمحانالاردا تاعىلىمدامادان ءوتتى
ال ەندى ونىڭ ءىس جۇزىندەگى پايداسى مەن مەملەكەت قولداۋىنىڭ قايتارىمى قانداي بولماق؟
كورەيا دارىگەرلەرى قاتەرلى ىسىكتىڭ ەڭ كۇردەلى تۇرىنە وپەراتسيا جاساپ جاتقان ءسات. وتاندىق ماماندار بارلىق قيمىلدى ءجىتى قاداعالاپ تۇر. ەلدوس سمايىلوۆ قىزمەت ەتەتىن سەمەيلىك اۋرۋحانادا ازىرگە بۇنداي روبوتتار جوق. سونداي- اق ەلىمىزدە لاپوروسكوپيالىق وپەراتسيالار كورەياعا قاراعاندا الدەقايدا سيرەك جاسالادى.
ەلدوس سمايلوۆ، حيرۋرگ- ونكولوگ:
- سەمەيگە بارىپ وسى جيناعان تاجىريبەمدى ءىس جۇزىندە قولدانىپ كورەمىن. اسىرەسە لاپوروسكوپيالىق وپەراتسيالاردى جاساۋ بارىسىنداعى تىڭ تەحنولوگيالارى تاڭقالدىردى. بۇدان بىلاي مۇنداي ادىستەردى ءوز ەلىمىزدە دە جۇزەگە اسىراتىن بولامىز.
ەكى ەلدىڭ حيرۋرگ- ونكولوگتارى اراسىنداعى باستى ايىرماشىلىق جاسايتىن وپەراتسيانىڭ كولەمى مەن كۇردەلىلىگىندە. ياعني كورەيالىق دارىگەرلەر ءبىر عانا اعزاعا وپەراتسيا جاساپ، سول باعىتتاعى ىزدەنىسىن تەرەڭدەتە بەرەدى. ال وتاندىق مامانداردى «ۋنيۆەرسال» دەۋگە بولادى. بۇل ەندى حيرۋرگتاردىڭ جەتىسپەۋشىلىگىنە بايلانىستى. وسى تىعىرىقتان شىعۋدىڭ جولى رەتىندە دارىگەرلەر شەتەلدە تاجىريبە جيناپ، تاعىلىمدامادان ءوتتى.
كيم گون سۋ، KD Medical Research Center اتقارۋشى ديرەكتورى:
- قازاقستان دارىگەرلەرىمەن جۇمىس جاساپ كەلە جاتقانىمىزعا 4 جىل بولدى. وسى ارالىقتا 150 مامان بىلىكتىلىگىن جەتىلدىردى. ونىڭ ىشىندە حيرۋرگ، تەراپيەۆت پەن ۋرولوگتار بار. بۇعان قوسا بىزدە ءۇندىستان، فيليپپين، رەسەي جانە باسقا دا ەلدەردىڭ دارىگەرلەرى تاجىريبە جيناۋعا كەلەدى. قازاقستاندىق ارىپتەستەرىمىز جوعارى جاۋاپكەرشىلىگىمەن جانە قابىلەتتىلىگىمەن ەرەكشەلەنەدى.
ەلدوس سمايىلوۆ «بولاشاق» باعدارلاماسىمەن شەتەلدە ءتالىم الۋ ءۇشىن استانادا ارنايى تەست تاپسىردى. بۇعان قوسا قازاق تىلىنەن سىناق پەن پسيحولوگيالىق ىرىكتەۋدەن ءوتتى. وسىلايشا ول 80 حيرۋرگتىڭ اراسىنان تاڭدالعان تورتەۋدىڭ ءبىرى بولدى. جالپى بيىل 700 ادام «بولاشاق» ستەپەندياسىنىڭ يەگەرى اتاندى. ونىڭ 24 ءى دارىگەرلەر.
www.24.kz
