قازاقستاننىڭ قالالارىندا ادامداردىڭ كينوعا نەگە بارمايتىنى بەلگىلى بولدى

استانا. قازاقپارات - قازاقستاندا استانا مەن الماتى شاھارلارىنان وزگە قالالاردا كينوتەاتر جەلىسى دامىماعان.

بۇل تۋرالى «مەلوماننىڭ» باس ديرەكتورى ۆاديم گولەنكو ءمالىم ەتتى، دەپ حابارلايدى قازاقپارات.

«ەلىمىزدە كينوتەاترلار ايتارلىقتاي جەتىسپەيدى. ورتاشا العاندا 70 مىڭ قازاقستان ازاماتى كينوعا بارىپ تۇرادى. كەيبىر فيلمدەر 200 دەن 300 مىڭعا دەيىن كورەرمەن جينايدى، ءبىراق بۇل كورسەتكىشتەن اسپايدى. ەلىمىزدە 17 ميلليون تۇرعىن بار، سوعان قاراماستان حالىقتىڭ اراسىندا كينوعا بارۋ مادەنيەتى ءتيىستى دەڭگەيدە دامىماعان»، - دەدى ول ق ر «كينەماتوگرافيا تۋرالى» زاڭ جوباسىن ازىرلەۋ ماسەلەسىنە ارنالعان «دوڭگەلەك ۇستەل» وتىرىسىندا.

ونىڭ ايتۋىنشا، كينولار كورسەتىلىمىنەن نەگىزگى ءتۇسىمنىڭ 85 پايىزى استانا مەن الماتىعا تيەسىلى بولىپ وتىر، ال وڭىرلەردە بۇل سالا ارتتا قالعان كورىنەدى. وڭىرلەردە كينوتەاترلاردى اشۋ ماسەلەسىنە توقتالعان ول، بيزنەس وكىلدەرىنە وسىنداي نىسانداردى ىسكە قوسۋ ايتارلىقتاي قيىنداۋ ەكەنىن جەتكىزدى.

«سەبەبى كينوتەاتردىڭ قۇنى 5-7 ميلليون ا ق ش دوللارىن قۇرايدى. بۇل رەتتە قۇرىلىس جۇمىستارىنان باستاپ، جابدىقتاردى ساتىپ الۋعا دەيىنگى شىعىندار وسىنداي كولەمدەگى قارجىنى تالاپ ەتەدى. بارلىق قۇرالدار شەتەلدەن ساتىپ الىنادى. سوندىقتان كينوتەاترلاردى قۇرۋ قوماقتى قارجىنى تالاپ ەتەدى. قانشا كينو تۇسىرگەنىمىزبەن، ەگەر كونتەنتتى كورەرمەنگە دەيىن جەتكىزە الماساق، ادامدار بۇل فيلمدەردى كورمەيدى»، - دەدى ۆ. گولەنكو.

ونىڭ پايىمىنشا، اتالعان كەمشىلىكتەردىڭ سالدارىنان نەگىزىنەن جاقسىلىقتى ناسيحاتتايتىن، تاربيەلىك ءمانى زور ۇلتتىق فيلمدەر اۋديتوريادان بولەكتەنىپ تۇرا بەرۋى مۇمكىن. «وسىعان نازار اۋدارىپ، مۇمكىن بيزنەسكە كومەكتەسۋ كەرەك شىعار نەمەسە جوندەۋدەن وتكەن مادەنيەت ۇيلەرىندەگى جابدىقتاردى جاڭارتۋ قاجەت بولار. شاعىن قالالاردا ادامدار تەك جۇمىس ىستەيدى، سوسىن قالعان ۋاقىتىن ۇيىندە وتكىزەدى، ال كەيبىرەۋلەرى تابيعاتقا شىعىپ كەلۋى مۇمكىن.

سوندىقتان دا مادەنيەت ۇيلەرى تۇرعىنداردى جيناي الاتىن ماڭىزدى ورىن بولىپ تابىلادى جانە سول جەردە ادامدارعا جاقسى تۋىندىلاردى كورسەتۋگە بولار ەدى»، - دەدى «مەلومان» باسشىسى.

اۆتور: رۋسلان عابباسوۆ