ءمادىعالي قارسىبەكوۆ: الپاۋىت ەلدەر ءبىزدىڭ سپورتشىلاردان قايمىعا باستادى

استانا. قازاقپارات - بۇگىن استانادا شورت-ترەكتەن قازاقستان قۇراماسىنىڭ باس جاتتىقتىرۋشىسى ءمادىعالي قارسىبەكوۆتىڭ قاتىسۋىمەن باسپا ءسوز وتىرىسى ءوتتى، دەپ حابارلايدى قازاقپارات ءتىلشىسى.

وندا قازاقستانداعى شورت-ترەك سپورتىنىڭ بيىلعى تاريحي جەڭىستەرى ءسوز بولىپ، الداعى جوسپارلار تۋرالى تىلشىلەردىڭ سۇراقتارىنا جاۋاپ بەرىلدى.

وتىرىس بارىسىندا باس جاتتىقتىرۋشى قارسىبەكوۆ: «2016-جىلدىڭ اياعى ءبىز ءۇشىن، قازاق شورت-ترەگى ءۇشىن وتە تابىستى بولدى. وزدەرىڭىز كورگەندەي شورت-ترەكشىلەرىمىز الەم كۋبوگى كەزەڭدەرىندە ءارتۇرلى دارەجەدە بىرنەشە مەدال سىيلادى. بۇل - بۇرىن-سوڭدى بولماعان جەتىستىك. وڭتۇستىك كورەيا، گوللانديا، ا ق ش، كانادا، رەسەي سياقتى وسى سپورت ءتۇرىنىڭ الپاۋىتتارى ءبىزدىڭ سپورتشىلارمەن ساناسىپ، ولاردان قايمىعا باستادى. ودان باسقا ءبىزدىڭ سپورتشىلار وسى ماۋسىمداعى الەمدىك شورت-ترەكتىڭ توپ-پاراعىن (رەيتينگىن) باستاپ تۇر. مۇنداي جاعداي قاشان بولىپ ەدى؟» - دەدى.

سونداي-اق، بۇل قاجىرلى ەڭبەكتىڭ ناتيجەسى ەكەنىن باسا ايتتى باس جاتتىقتىرۋشى.

«وتاندىق شورت-ترەكشىلەردىڭ اتى-ءجونى جۇرتتىڭ اۋزىندا ءجۇر. ەڭ باستىسى، بۇل جەڭىستىڭ سەبەپكەرى - قازاقستان قۇراماسىنىڭ قاجىرلى ەڭبەگىنىڭ جەمىسى. كوپتەگەن قيىندىقتارعا قاراماستان، ءبىز وسىدان 20 جىل بۇرىن قازاقستاندا شورت-ترەك سپورتىن قولعا الدىق. ونىڭ تاباندىلىعى، قايسارلىعى، ەرىك-جىگەرى مەن تالپىنىسى ارقاسىندا قازاقستاندىق سپورتشىلار ءوز جەمىسىن كورسەتە باستادى»، - دەپ اتاپ ءوتتى قارسىبەكوۆ.

باس جاتتىقتىرۋشى الدا الماتى تورىندە وتەتىن 28- قىسقى دۇنيەجۇزىلىك ستۋدەنتتەر ويىنىنا قاتىساتىندارىن، قازىر ۇلتتىق قۇراما گوللاندياعا جاتتىعۋعا كەتكەنىن دە اتاپ ءوتتى.

ەستەرىڭىزگە سالا كەتەيىك، بيىل قازاقستاندىق شورت- ترەكشىلەرىمىز الەم كۋبوگىنىڭ ءتورت كەزەڭىنە قاتىستى. الەم كۋبوگىنىڭ 1- كەزەڭى كانادادا ءوتتى. وندا 500 مەتردەن ەرلەر اراسىندا - ابزال اجىعاليەۆ پەن دەنيس نيكيشا 4- ورىندى، 1000 مەتردە ايەلدەر اراسىنان كيم يونگ 10-ورىندى يەلەندى.

ەكنىشى كەزەڭ ا ق ش- تا ءوتتى. وندا 500 مەتردەن ەرلەر اراسىندا ابزال اجىعاليەۆ باس جۇلدەنى جەڭىپ الدى. ال ايدار بەكجانوۆ 13-ورىنعا، دەنيس نيكيشا 18-ورىنعا تابان تىرەدى. 1500 مەتردەن نۇربەرگەن جۇماعازيەۆ 9-ورىنعا تابان تىرەدى. ال وسى كەزەڭدە 5 مىڭ مەترلىك ەستافەتالىق جارىستا ەرلەر قۇراماسى قولا جۇلدەگەر اتاندى.

الەم كۋبوگىنىڭ 3-كەزەڭى قىتايدا ءوتتى. وندا 500 مەتردەن ابزال اجىعاليەۆ ءتورتىنشى، ايدار بەكجانوۆ بەسىنشى ورىننان كورىندى. 1000 مەتر قاشىقتىقتا نۇربەرگەن جۇماعازيەۆ 6-ورىنعا تۇراقتادى.

الەم كۋبوگىنىڭ 4-كەزەڭى وڭتۇستىك كورەيادا ءوتتى. وندا 1000 مەتردەن نۇربەرگەن جۇماعازيەۆ چەمپيون اتانسا، دەنيس نيكيشا كۇمىس جۇلدەنى قانجىعاسىنا بايلادى. ءتورت كەزەڭنىڭ قورىتىندىسى بويىنشا قازاقستان قۇراماسى الەمدىك رەيتينگتە 6-ورىندا كەلەدى.

اۆتور: كۇنسۇلتان وتارباي