يران پرەزيدەنتى جۇرگىزىپ وتىرعان ساياسات كاسپي توڭىرەگىندەگى ەلدەر ءۇشىن وتە پايدالى - نازاربايەۆ
بۇل تۋرالى بۇگىن اقوردادا ەلىمىزگە رەسمي ساپارمەن كەلگەن يران يسلام رەسپۋبليكاسىنىڭ پرەزيدەنتى حاسان رۋحانيمەن كەڭەيتىلگەن قۇرامدا كەلىسسوز وتكىزىپ جاتقان ەلباسى نۇرسۇلتان نازاربايەۆ ايتتى،
دەپ حابارلايدى قازاقپارات.
«يران قازاقستان ءۇشىن مۇسىلمان الەمىندەگى ەڭ ماڭىزدى ارىپتەس جانە كاسپي جاعالاۋىنداعى تاتۋ كورشى، دوس دەپ سانايمىز. ءسىزدىڭ كەيىنگى كەزدەگى يادرولىق ماسەلەنى شەشۋدە جاساعان زور ەڭبەگىڭىزدى ءبىز، قازاقستان حالقى وتە جوعارى باعالايمىز. بۇل ماسەلە جونىندە كوپ ەڭبەك ءسىڭىردىڭىز. دۇنيەجۇزىندە ءسىزدىڭ بۇل جۇمىسىڭىز جوعارى باعا الدى. مىنە ءسىزدى وسى جەڭىسىڭىزبەن شىن جۇرەكتەن قۇتتىقتايمىن. يادرولىق باعدارلاماعا قاتىستى سانكسيالار الىنعالى ءبىر جىل ۋاقىت ءوتتى. وسى از عانا ۋاقىتتىڭ ىشىندە يران ءوز ەكونوميكاسىن جۇيەلى دامىتىپ، كوپ تابىستارعا جەتكەنىن بايقاپ وتىرمىز. بۇل يران مەن قازاقستان اراسىنداعى قارىم- قاتىناسقا ءوزىنىڭ ەڭ ۇلكەن ىقپالىن تيگىزدى. ءبىز ءۇشىن يراننىڭ، ءسىزدىڭ جۇرگىزىپ وتىرعان ساياساتىڭىز بۇكىل كاسپي توڭىرەگىندەگى ەلدەر ءۇشىن ۇلكەن پايداسىن تيگىزەدى دەپ ويلايمىز»، - دەدى ەلباسى.
سونىمەن قاتار ق ر پرەزيدەنتى بيىلعى جىلى ءساۋىر ايىندا تەھرانعا ساپار جاساعانىن، ەندى مىنە يران پرەزيدەنتىنىڭ ءبىزدىڭ ەلىمىزگە كەلۋى مەملەكەتتەر ءۇشىن پايدالى بولعانىن اتاپ ءوتتى.
«مەن جاساعان ساپاردان كەيىنگى ناتيجە شەڭبەرىندە جالپى سوماسى 1 ميلليارد دوللاردان اساتىن كوممەرتسيالىق كەلىسىمگە قول قويىلعان. ول جۇمىستىڭ بارلىعى قازىر ءجۇرىپ جاتىر. كەيبىرەۋلەرى ويداعىداي ىسكە اسىرىلىپ جاتىر. قۋانتارلىق جايت. ءبىراق، ءالى دە كۇش سالۋىمىز كەرەك. الدىمىزدا ۇلكەن شارۋالار بار. ساپارىڭىز وڭ بولسىن دەپ تىلەيمىن. ءسىزدىڭ دەلەگاتسيانىڭ، ءسىزدىڭ قازاقستانعا ساپارىڭىزدا العا قويعان بارلىق ماسەلەلەنى شەشۋگە ءبىز دايىنبىز»، - دەدى نازاربايەۆ.
اۆتور: مارلان جيەمباي
