قۋ دۇنيەگە قۇشتارلىق
كەنەت وعان ءبىر ادام كەلىپ ءوزىن دە الا كەتۋىن وتىنەدى. پايعامبار كەلىسەدى.
ەكەۋى جولداس بوپ، بىرگە ساپار شەگەدى. ۇزاق ءجۇرىپ ءبىر وزەننىڭ جاعاسىنا دەمالىپ، سول جەردە تاماقتانىپ، اياق سۋىتادى. داستارحانعا قويىلعان ءۇش ناننىڭ ەكەۋىن جەپ، بىرەۋى قالادى. حازىرەت يسا (ا. س. ) وزەننەن سۋ ءىشىپ كەلگەندە، ءۇشىنشى نان جوعىن بايقايدى.
- ناندى كىم الدى؟ - دەپ سەرىگىنەن سۇرايدى.
- بىلمەيمىن، - دەپ جاۋاپ بەرەدى جولداسى.
يسا (ا. س. ) قايتالاپ سۇراماي، تۇرىپ جۇرە بەرەدى. جولداسى ەرىپ وتىرادى. ولار ۇزاق جۇرەدى. جولدا ەگىز لاعىمەن ءبىر كيىك جايىلىپ جۇرەدى. يسا (ا. س. ) لاقتىڭ بىرەۋىن ۇستاپ سويىپ، ەكەۋى ەتتىڭ جارتىسىن اسىپ جەپ الادى. يسا پايعامبار (ا. س. ) قالعان شيكى ەتكە: «اللانىڭ رۇقساتىمەن قايتادان ءتىرىل» ، - دەگەندە، ەت دەرەۋ باياعى سۇيكىمدى لاق قالپىنا كەلىپ، ەنەسىنە قوسىلىپ جورتىپ كەتەدى. يسا (ا. س. ) جولداسىنا قايتادان:
- وسى مۇعجيزانى كورسەتكەن اللانىڭ اتىمەن سۇرايمىن، ناندى كىم الدى؟ - دەيدى. جولداسى تاعى دا بىلمەيتىنىن قايتالايدى. يسا (ا. س. ) قازبالاپ سۇراماستان ارى قاراي قادام باسادى، جولداسى ەرىپ وتىرادى. ءبىراز جۇرگەننەن كەيىن الدارىنان ۇلكەن كول شىعادى. پايعامبار سەرىگىن قولىنان جەتەكتەپ، وزەننىڭ ارعى بەتىنە سۋ ۇستىمەن جەر باسىپ جۇرگەندەي ادىمداپ وتە شىعادى. سوسىن تاعى دا:
- وسى مۇعجيزانى كورسەتكەن اللانىڭ اتىمەن سۇرايمىن، ناندى كىم الدى؟ - دەيدى. جولداسى ادەتتەگىدەي جارىتىپ جاۋاپ بەرمەيدى. ەكەۋى ۇزاق جەردى باعىندىرادى. الدارىنان ءشول دالا كەزدەسەدى. يسا (ا. س. ) سۋسىعان قۇمدى ۋىستاپ ءبىر جەرگە جيناپ، كولەمى ءبىرشاما ۇلكەن ءبىر تومپەشىك جاسايدى. ودان سوڭ پايعامبار: «اللانىڭ رۇقساتىمەن التىن بول»، - دەگەندە، جاڭاعى ءۇيىندى ءاپ- ساتتە التىنعا اينالادى. يسا (ا. س. ) سەرىگىنە باياعى سۇراقتى تاعى قويادى. سەرىگى باستاپقى جاۋابىنان تانبايدى. «ەندەشە، - دەيدى يسا پايعامبار، - مىنا التىننىڭ ۇشتەن ءبىرى مەنىكى، ۇشتەن ءبىرى سەنىكى، قالعان ۇشتەن ءبىرى ناندى العاندىكى». بۇل جولى جولداسى بەتى بۇلك ەتپەستەن ناندى ءوزى العانىن ايتادى. ەرتكەن ادامىنىڭ ارسىزدىعىنا قىنجىلعان يسا (ا. س. ) دۇنيەنىڭ قۇلى بولعان وتىرىكشى جول سەرىگىن التىنداردىڭ جانىنا تاستاپ جەكە كەتىپ قالادى. ۇرى بولسا ويلانباستان وڭاي ولجاعا ءماز بوپ قالا بەرەدى. كەنەت الىستان ەكى ادامنىڭ قاراسى كورىنەدى. ولار جاقىنداپ كەلىپ توبە بوپ ۇيىلگەن التىندى كورىپ، يەلەنە قالعان ارسىزدان تارتىپ الماق بولادى. التىن يەسى قاراقشىلاردىڭ ءارقايسىسىنا التىننىڭ ۇشتەن ءبىرىن بەرىپ ايتەۋىر جانىن الىپ قالادى. بىرىگىپ، التىندى قالاعا اپارۋ جاعىن ويلاستىرىپ ۇشەۋى ءبىر شەشىمگە كەلەدى. قاراقشىلاردىڭ بىرەۋى قالادان كولىك پەن ازىق- تۇلىك اكەلمەك بولىپ اتتانادى. الايدا جولدا ارام ءبىر ويدىڭ جەتەگىمەن وزىنە تيەسىلى التىندى ازىرقانىپ، قالعان ەكەۋىن ءولتىرىپ بايلىعىن ەسەلەي تۇسكىسى كەلەدى. سول نيەتپەن اكەلەتىن تاماعىنا ۋ قوسۋدى ءجون كورەدى. مىنا جاقتا التىندى كۇزەتىپ قالعان ەكەۋ دە ناشار پيعىلدارىن جوسپارلاپ، ىسكە اسىرماققا كەلىسىپ الادى. ماقساتتارى انانىڭ اكەلگەن اسىن ءىشىپ، كولىگىن پايدالانباق، ءوزىن ءولتىرىپ، التىندى ۇشكە ەمەس ەكىگە بولمەك. كوپ ۇزاماي قالاعا كەتكەن سەرىكتەرى كەلدى دە، سول جەردە ەكى دوسىنىڭ قولىنان قازا تاپتى. دۇنيە مەن بايلىققا تويماعان ەكى سورلى دا مارقۇمنىڭ اكەلگەن اسىن قوماعايلانا ءىشىپ، ارتىنشا ۋلانىپ، جان تاپسىردى. ءبىرازدان سوڭ ەلىنە قايتىپ كەلە جاتقان يسا (ا. س. ) ءۇش بىردەي ادامدى جۇتىپ تىنعان ءۇيىندى التىن مەن ءۇش اشكوزدىڭ ولىگىن كوردى. تاماعىنا كەپتەلگەن وكسىكتەن داۋسى دىرىلدەپ جانىنداعىلارعا:
- مىنە، قۋ دۇنيەگە قۇشتار بولعان ادامداردىڭ تاعدىرى. مۇندايدان ساق بولىڭدار. تۇسىنگەن ادامعا بۇدان ارتىق قانداي عيبرات كەرەك؟! - دەدى.
قۇدايبەردى باعاشار
