بوكس قاۋىمداستىعىنىڭ ادەتى سول، ەرەجەنى اۋىستىرا بەرەدى - ەرماحان ىبىرايىموۆ

استانا. قازاقپارات - سيدنەي وليمپياداسىنىڭ چەمپيونى ەرماحان ىبىرايىموۆتىڭ ايتۋىنشا، حالىقارالىق اۋەسقوي بوكس قاۋىمداستىعى (AIBA) ەرەجەنى اۋىستىرسا دا، تورەشىلدىكتىڭ ءادىل بولاتىنىنا كەپىل جوق. سەبەبى اتالعان ۇيىم ەرەجەنى وليمپيادا وتكەن سايىن اۋىستىرىپ وتىرادى،

  دەپ حابارلايدى قازاقپارات ءتىلشىسى.

«شىنىنا كەلگەندە، AIBA وليمپيادا وتكەن سايىن ۇلكەن داۋ- دامايدىڭ اراسىندا قالىپ وتىرادى. سوسىن ءاربىر وليمپيادادان كەيىن مىندەتتى تۇردە ەرەجەنى اۋىستىرۋ تۋرالى شەشىم قابىلدايدى. ونى اركىم ءارقالاي ءتۇسىنىپ جاتادى. وسى جولى ەرەجەگە تاعى وزگەرىس ەنگىزدى. ەندى، اتالعان جۇيە قانشالىقتى ادىلەتتى بولاتىنىن تەك ۋاقىت قانا كورسەتەدى. سوندىقتان ءدال قازىر ءبىر نارسە ايتۋ قيىن»، - دەدى ە. ىبىرايىموۆ قازاقپارات تىلشىسىنە بەرگەن سۇحباتىندا.

 ايتا كەتەيىك، جاقىندا حالىقارالىق اۋەسقوي بوكس قاۋىمداستىعى (AIBA) اعىمداعى جىلى وتەتىن بارلىق جارىستاردا بوكسشىلاردىڭ ۇپايلارىن جاڭا ەرەجە بويىنشا ەسەپتەيتىنىن مالىمدەدى. ەندى ۇپاي سانىنا جاۋاپ بەرەتىن سۋديالار كوميسسياسىنىڭ جۇمىسىن جالعىز كوميسسيا ءتوراعاسى عانا اتقاراتىن بولادى. ول ۇپايدى سانايتىن ەلەكتروندى باعدارلامانى تەكسەرىپ وتىرادى. رينگتىڭ جانىنداعى سۋديالار بولسا، شارشى الاڭنىڭ ءتورت بۇرىشىندا وتىرادى. ال ءاربىر راۋندتىڭ قورىتىندىسى جەكپە- جەكتىڭ سوڭىندا عانا جاريالانادى. قازاقپارات تىلشىسىنە سۇحبات بەرگەن ريو وليمپياداسىنىڭ كۇمىس جۇلدەگەرى ادىلبەك نيازىمبەتوۆ تە AIBA- نىڭ ەرەجەنى اۋىستىرۋىنا قاتىستى ءوز پىكىرىن بىلدىرگەن بولاتىن.

اۆتور: ارمان اسقاروۆ