ەرەجە اۋىسقانىمەن باياعى بوكس قوي - ءا. نيازىمبەتوۆ
«ەندى، ونداي وزگەرىستەردىڭ بولعانى دۇرىس دەپ ويلايمىن. نەگە دەسەڭىز، بۇعان دەيىن باسقاسىن دا كوردىك، ءتورت راۋندتى ەكى مينۋتتان دا كوردىك. سوسىن ءۇش راۋند ءۇش مينۋتتان دا بولدى. AIBA ءارتۇرلى ەرەجەلەردى ەنگىزىپ كورىپ جاتىر. جوعارى جاقتاعىلارعا قايسى ىڭعايلى، قايسى جاقسى، وزدەرى قالاي ايتادى، سولاي بولادى. بىزدىكى تەك رينگكە شىعىپ بوكستاسۋ، قارسىلاستى ۇتۋ عانا بولدى»، - دەدى ءا. نيازىمبەتوۆ قازاقپارات تىلشىسىنە بەرگەن سۇحباتىندا.
ونىڭ ويىنشا، ءاربىر راۋندتىڭ قورىتىندىسىن جەكپە-جەكتىڭ سوڭىندا عانا كورسەتۋگە قاتىستى بۇرمالاۋشىلىقتار بولماۋى ءتيىس. «ءار راۋندتىڭ ناتيجەسى باپكەرلەرگە سىرتتان جاقسى كورىنەدى عوي. ولار سونى ايتىپ وتىرادى. سوسىن ءوزىڭ دە ۇتىپ جاتقانىڭدى سەزەسىڭ. سوققى جىبەرمەي، ۇپايدى جيناي بەرسەڭ، بولدى. قانداي ەرەجە بولسا دا، باياعى بوكس قوي. وزىڭە سوققى دارىتپاي، قارسىلاستى كوبىرەك ۇرۋىڭ قاجەت»، - دەپ اتاپ كورسەتتى ءا. نيازىمبەتوۆ.
ايتا كەتەيىك، جاقىندا حالىقارالىق اۋەسقوي بوكس قاۋىمداستىعى (AIBA) اعىمداعى جىلى وتەتىن بارلىق جارىستاردا بوكسشىلاردىڭ ۇپايلارىن جاڭا ەرەجە بويىنشا ەسەپتەيتىنىن مالىمدەدى. ەندى ۇپاي سانىنا جاۋاپ بەرەتىن سۋديالار كوميسسياسىنىڭ جۇمىسىن جالعىز كوميسسيا ءتوراعاسى عانا اتقاراتىن بولادى.
ول ۇپايدى سانايتىن ەلەكتروندى باعدارلامانى تەكسەرىپ وتىرادى. رينگتىڭ جانىنداعى سۋديالار بولسا، شارشى الاڭنىڭ ءتورت بۇرىشىندا وتىرادى. ال ءاربىر راۋندتىڭ قورىتىندىسى جەكپە-جەكتىڭ سوڭىندا عانا جاريالانادى.
اۆتور: ارمان اسقاروۆ
