اقتوبە وبلىسىندا ايتەكە بيگە ەسكەرتكىش ورناتىلدى

استانا. قازاقپارات - تاۋەلسىزدىكتىڭ ارقاسىندا تاريحىمىزدى تۇگەندەپ، قازاق مەملەكەتتىلىگىن قالىپتاستىرۋدا ولشەۋسىز ەڭبەك ەتكەن ءبي-شەشەندەرىمىزدى، ەلدىگىمىزدى قورعاۋدا ەرلىكتىڭ ەرەن ۇلگىسىن كورسەتكەن باتىرلارىمىزدى باعالاۋعا قول جەتكىزدىك.

مۇنداي جاڭالىقتار مەن جاقسىلىقتار تاۋەلسىزدىكتىڭ 25 جىلدىعى اياسىندا بۇرىنعىدان دا كوبەيە ءتۇستى. وسىنداي ءبىر ايتۋلى دا ايشىقتى وقيعا - قارابۇتاق اۋىلىندا قازاق جۇرتىنىڭ تىنىشتىعى مەن تۇتاستىعى جولىندا كوسەمدىگىمەن دە، شەشەندىگىمەن دە قىزمەت ەتكەن دارابوز تۇلعا، ەلدىڭ بىرلىگىن نىعايتۋعا ۇلەس قوسقان اتاقتى ءۇش ءبيىمىزدىڭ ءبىرى - ايتەكە ءبي ەسكەرتكىشىنىڭ اشىلۋى دەر ەدىك.

تولە جانە قازىبەك بيلەرمەن بىرگە قالىڭ قازاعىنىڭ مۇڭىن مۇڭداپ، جوعىن جوقتاعان ايتەكە ءبي - فيلوسوف، دالا دانىشپانى، مەملەكەت قايراتكەرى. ول 25 جاسىندا كىشى ءجۇزدىڭ باس ءبيى بولعان، ءاز تاۋكە حان قۇرعان بيلەر كەڭەسىنىڭ مۇشەسى، ابىز بابا، دارابوز تۇلعا قانداي قۇرمەتكە دە لايىق.

ايتەكە ءبيدى ەستە قالدىرۋ باعىتىندا ءبىراز شارۋالار دا جاسالدى. وبلىس ورتالىعىندا ەسكەرتكىشى ورناتىلدى. ونىڭ اتىندا اۋدان، كوشەلەر، اۋىل بار. وسى قارابۇتاق وڭىرىندە ايتەكە ءبيدىڭ 350 جىلدىعى اتالىپ ءوتتى. عىلىمي-پراكتيكالىق كونفەرەنتسيالار وتكىزىلۋدە. «ايتەكە ءبي» اتىنداعى قايىرىمدىلىق قورى جۇمىس ىستەيدى، دەپ جازادى ەگەمەن قازاقستان.

بيىكتىگى 7 مەتر بولاتىن ايتەكە ءبيدىڭ ەسكەرتكىشى قارابۇتاق اۋىلىنا كىرەبەرىستەگى ءۇش جولدىڭ، «باتىس ەۋروپا - باتىس قىتاي» حالىقارالىق كولىك ءدالىزىنىڭ  قىزىلوردا باعىتىنا جانە قوستاناي باعىتىنا بۇرىلاتىن ايرىعىنا ورناتىلعان. مۇنىڭ ءوزى - ءۇش باعىتقا جۇرەتىن اۆتوكولىك جۇرگىزۋشىلەرى مەن جولاۋشىلاردىڭ نازارىنا بىردەن ىلىگەتىن كورنەكتى ورىن. بۇل ەسكەرتكىشتى ورناتۋعا «قازاۆتوجول» ۇ ك» ا ق اقتوبە وبلىستىق فيليالىنىڭ ديرەكتورى باعلان بايماعامبەتوۆ پەن باس مەردىگەر، «قازاۆتوجول» رەسپۋبليكالىق مەملەكەتتىك كاسىپورنى اقتوبە وبلىستىق فيليالىنىڭ ديرەكتورى اكىمجان وتەمۇراتوۆ باستاماشى بولدى.

«ايتەكە ءبي بابامىزعا ءبىر ادەمى ەسكەرتكىش ورناتۋ كوپتەن بەرى ويدا ءجۇر ەدى. سونى اقىلداسا كەلە، وسى ءۇش جولدىڭ ايرىعىنا قويۋدى شەشتىك. ءمۇسىنشى اياپبەرگەن قارپىقوۆتىڭ قولىنان شىققان ەسكەرتكىش ەڭسەلى دە كورنەكتى. بۇل اقتوبەلىك جولشىلاردىڭ تاۋەلسىزدىكتىڭ 25 جىلدىعىنا جاساعان تارتۋى دەسە دە بولادى. بۇل باعىتتاعى شارۋالاردى الدا دا جالعاستىرامىز. باتىرلارىمىزدى، حاندارىمىزدى جانە بيلەرىمىزدى، الاشتىڭ ايتۋلى تۇلعالارىن ەستە قالدىرۋ ارقىلى تاۋەلسىزدىكتىڭ قادىر-قاسيەتىن جاستارعا ونەگە-ۇلگى ەتۋدىڭ تاربيەلىك ءمانى زور»، - دەيدى «قازاۆتوجول» ۇ ك» ا ق اقتوبە وبلىستىق فيليالىنىڭ ديرەكتورى باعلان بايماعامبەتوۆ.

ونىڭ ايتۋىنشا، ەسكەرتكىش ماڭايىن كورىكتەندىرۋ جانە كوگالداندىرۋ جۇمىستارى كوكتەم شىعا باستالادى. ەسكەرتكىش تۇعىرىنا كەلەر ۇرپاققا جولداۋ جازىلعان كاپسۋل سالىندى. وسى جەرگە «قازاقستان رەسپۋبليكاسىنىڭ تاۋەلسىزدىگىنە - 25 جىل» دەپ جازىلعان ستەللا ورناتىلعان.

ەسكەرتكىشتى ايتەكە ءبي اۋدانىنىڭ اكىمى مالىمبەت ىبراشەۆ پەن ەڭبەك ارداگەرى، ايتەكە ءبيدىڭ تىكەلەي ۇرپاعى سارسەنالى قالتايەۆ اشتى. ايتەكە ءبي بابامىزعا اس بەرىلىپ، قۇران باعىشتالدى.